ජනවාරි 08 ජයග්‍රහණයට උර දුන් සිවිල් සංවිධාන පෙනී සිටින්නේ තිබෙන ව්‍යවස්ථාවට සංශෝධන එකතු කිරීම වෙනුවෙන් නොව අලුතින්ම ව්‍යවස්ථාවක් සැකසීම වෙනුවෙන් බව නව ව්‍යවස්ථාවක් සඳහා වු ජාතික ව්‍යාපාරයේ සාමාජිකයෙක් පෙන්වා දෙයි.
සිවිල් සංවිධාන මෛත්‍රීපාල සිරිසේනගේ ජයග්‍රහණය වෙනුවෙන් පෙනී සිටි එක් මුලික කොන්දේසියක් වන නව ව්‍යවස්ථාවක් සැකසීම අනිවාර්යයෙන්ම සිදු විය යුතු බව මෙන්ම ඒ වෙනුවෙන් සිදු වන ජනමත විචාරණයකට සිවිල් සංවිධාන වල පුර්ණ සහාය හිමි වන බවයි එම ව්‍යාපාරයේ බ්‍රිටෝ ප්‍රනාන්දු පවසන්නේ.
විධායක ජනාධිපති ධුරය අහෝසි කිරීම සහ දෙමළ ජනයාට පිළිගත හැකි විසඳුමක් නව ව්‍යවස්ථාවෙන් ලැබිය යුතු බවත් සිවිල් සංවිධාන පෙනී සිටින්නේ එම ප්‍රතිසංස්කරණ ඇතුලත් ව්‍යවස්ථාවක් වෙනුවෙන් බැව් සිහිකරන ඔහු ජනාධිපතිවරයා විසින් මැතිවරණ පොරොන්දු ඉටු කරමින් නව ව්‍යවස්ථාවක් ගෙන එනු ඇති බවට විශ්වාසය පළ කළේය.
ද්‍රෝහීන් හෙළී කරනවා
ඇතැම් දේශපාලකයින් සහ නිලධාරින් ජනාධිපතිවරයා නොමඟ යවමින් තම පටු දේශපාලන අරමුණු වෙනුවෙන් නව ව්‍යවස්ථාවක් සඳහා වන ක්‍රීයාවලියට අකුල් හෙලන බව පවසන බ්‍රිටෝ ප්‍රනාන්දු ජනාතාවට ද්‍රෝහී වන එවැනි පුද්ගලයන් ගැන නුදුරේදීම රටට හෙළිදරව් කරන බව කියා සිටියේ නව ව්‍යවස්ථාව සම්බන්ධව සිලෝන් ජර්නල්ස් වෙත ප්‍රකාශයක් ලබා දෙමිනි.
නව ව්‍යවස්ථාවකට එරෙහි වන ඇතැම් ශ්‍රීලනීප මන්ත්‍රීවරුන් ජනවාරි 08 පෙර ජනාධිපතිවරයා සමඟ නොසිටි බැවින් ජනාධිපතිවරයා කල යුත්තේ ඔවුන්ට ඇහුම්කන් දීම නොව ජනතාවට දුන් පොරොන්දු ඉටු කිරීම බවයි නව ව්‍යවස්ථාවක් සඳහා වු ජාතික ව්‍යාපාරයේ බ්‍රිටෝ ප්‍රනාන්දු අවධාරණය කර සිටියේ.
Facebook Comments
