රෝග ලක්ෂණ පෙන්නුම් නොකරන හෝ සුළු රෝග ලක්ෂණ පෙන්වන කාණ්ඩයන්ට අයත් කොවිඩ් ආසාදිතයින් වෛද්‍ය අධීක්ෂණය මත නිවෙස් තුළ තබාගැනීමේ වැඩපිළිවෙල අද සිට දිවයිනපුරා ආරම්භ වනවා.
අවුරුදු 02 ත් 65 ත් අතර වයස්වල පසුවන සංකූලතා නොමැති, කොවිඩ් ආසාදිතයින් මේ අනුව නිවෙස් තුල තබාගනිමින් වෛද්‍යවරුන් විසින් අධික්ෂණය කරනු ඇත.
මෙම වැඩපිළීවෙල බස්නාහිර පළාත තුළ මීට පෙර සිටම ක්‍රියාත්මක වූ අතර ඩෙල්ටා ප්‍රභේදය ව්‍යාප්තියත් සමග දිනෙන් දින කොවිඩ් ආසාදිතයින් සංඛ්‍යාව ඉහළයාම සැළකිල්ලට ගෙන දිවයින පුරා මෙම වැඩපිළිවෙල ක්‍රියාත්මක කිරීමට රජය තීරණය කළේය.
මෙම වැඩපිළිවෙලට අදාලව සෞඛ්‍ය අමාත්‍යංශය විසින් මාර්ගෝපදේශ මාලාවක්ද නිකුත් කර තිබේ.
පැය 24 පුරා ක්‍රියාත්මක ප්‍රධාන දුරකථන මධ්‍යස්ථානයක් ස්ථාපිත කර ඇති අතර එහි කෙටි ඇමතුම් අංකය වන්නේ 1390 අංකයයි.
මෙම දුරකථන අංකය හරහා නිවෙස් තුළ සිටින කොවිඩ් ආසාදිතයින්ට පහසුවෙන් තම නිවසේ සිට දින 14 ක් වෛද්‍ය අධීක්ෂණය යටතේ ප්‍රතිකාර ලබාගත හැකියි.
මෙහිදී රෝගියා නිවෙස් තුල ප්‍රතිකාර ලබාගන්නේ නම් ඒ සදහා තම කැමැත්ත ද පළ කළ යුතුයි.
නිවෙස් තුල රඳවන රෝගීන් කළමණාකරණය කළ යුතු ආකාරය ද මාර්ගෝපදේශ මාලාවෙන් පෙන්වා දී ඇති අතර පරිගණක තාක්ෂණය ඔස්සේ රෝගීන් ලියාපදිංචිය සිදු කිරීමට නියමිතයි.
දින 14 කින් පසු රෝගියා මුදා හැරීමෙන් පසු රෝගීන් අධීක්ෂණ කටයුතු එම ප්‍රදේශයේ සෞඛ්‍ය වෛද්‍ය නිලධාරී කාර්යාල හරහා අඛණ්ඩව සිදු කිරීමට ද පියවර ගෙන තිබේ.
බරපතල රෝගී තත්වයෙන් පෙලෙන කොවිඩ් ආසාදිතයින් සදහා මෙම වැඩපිළිවෙල අදාල නොවන අතර ඔවුන් පෙර පරිදිම රෝහල්ගතකිරීම අඛණ්ඩව සිදුකෙරෙනු ඇත.
Facebook Comments
