දොට්ට දැමූ කම්කරු නායකයාට රැකියාව දෙන්න බෑ කියයි

ආර්ථික අර්බුදය හමුවේ කම්කරුවන් බලෙන් විශ්‍රාම ගැන්වීමට එරෙහි වීම නිසා සේවයෙන් දොට්ට දැමූ වෘත්තීය සමිති නායකයකු යළි සේවයේ පිහිටු වීමට නොහැකි බව ප්‍රකට බහුජාතික සමාගමක් කම්කරු කොමසාරිස් හමුවේ පවසා තිබේ.

සියවසකට අධික කාලයක සිට මෙරටට පොහොර සහ අනෙකුත් කෘෂි රසායනික ආනයනයේ නිරත ඒ. බවර් සමාගමට ආණ්ඩුව විසින් කිසිදු සහනයක් ලබා නොදෙන බව පවසා එහි කම්කරුවන් බලෙන් විශ්‍රාම ගැන්වීමට එරෙහිවූ මෙරට කීර්තිමත් වෘත්තීය සමිති නායකයකු වූ බාලා තම්පෝ දිවි සැරිය පුරා නායකත්වය දුන් ලංකා වෙළෙඳ කර්මාන්ත හා පොදු සේවක සංගමයේ (CMU) වත්මන් සභාපති මෙන්ම CMU බවර් ශාඛා සමිතියේ සභාපති වූ මංගල අබේවික්‍රම සේවයෙන් දොට්ට දමා දැමිණි.

වසර 28 ක් පුරා බවර් සමාගමේ සේවය කළ වෘත්තීය සමිති නායක අබේවික්‍රම තමන්ව අත්තනෝමතිකව සේවයෙන් ඉවත් කිරීමට එරෙහිව කම්කරු දෙපාර්තමේන්තුව වෙත කළ පැමිණිල්ල ජනවාරි 5 වැනිදා විභාග කෙරිණි.

දොට්ට දැමූ තම වෘත්තීය සමිති සගයා යළි සේවයේ පිහිටුවන ලෙස ලංකා වෙළෙඳ, කර්මාන්ත හා පොදු කම්කරු සංගමයේ නියෝජිතයන් ඉල්ලා සිටියද, බවර් සමාගම් පාලකයෝ එය ප්‍රතික්ෂේප කරමින්,සේවය අවසන් කරමින් වන්දි මුදලක් ලබා දීමට එකඟවී තිබේ.

දෙපාර්ශවයටම ලිඛිතව කරුණු දැක්වීමට සති දෙකක කාලයක් කම්කරු කොමසාරිස් කාර්යාලය විසින් ලබා දුන් බවත්, ඒ අනුව ජනවාරි 19 වැනිදාට පෙර තම කරුණු ඉදිරිපත් කිරීම කරන බව CMU සභාපති මංගල අබේවික්‍රම පවසයි.

කොරෝනා ආසාදනයෙන් ආතුර වන රෝගීන්ගේ දිවි ගලවාගැනීම සඳහා අත්‍යාවශ්‍ය සේ සැලකෙන ලක්ෂ ගණනක් අයකර විකුණන ටොසිලිසුමාබ් එන්නත් ශ්‍රී ලංකාවට ගෙන්නන්නේද ස්විට්සර්ලන්තයේ මුලස්ථානය පිහිටි බවර් සමාගමයි.

“ඔක්කොම සේවකයෝ කැඳවලා කිව්වා පොහොර ප්‍රශ්නයත් එක්ක ආණ්ඩුව අපිට කිසිම සහනයක් දෙන්නේ නැහැ. ඒ හින්දා සේවක සංඛ්‍යාව අඩු කරන්න ඕනෑ, වන්දියක් දෙනවා ඒක අරන් කැමැත්තෙන් අයින් වෙන්න කියලා. මේ ගැන මගේ වෘත්තීය සමිතිය එක්ක කතා කරන්න ඕනෑ කියලා මම කිව්වා. ඒ එක්කම මාව සේවයෙන් අයින් කරලා ලියුම දුන්නා,“යැයි සේවයෙන් දොට්ට දැමූ වෘත්තීය සමිති නායක මංගල අබේවික්‍රම පවසයි.

වසර 60 කට වැඩි කාලයක් බවර් සමාගමේ කම්කරුවන් CMU වෘත්තීය සමිතියට ඒකරාශි වී සිය වෘත්තීය අයිතීන් දිනා ගෙන තිබේ.

“ අපිත් එක්ක සාමුහික ගිවිසුමෙන් මෑතකදී ඒකපාර්ශ්විකව අයින් වෙලා ඉන්න බවර් පාලකයෝ කම්කරුවන්ගේ පඩි වැඩි කිරීමක් කරන්න කියලා ඉල්ලුහම ඒක කරන්නේ නැතුව පසුගිය කාලේම වෘත්තීය සමිති විරෝධී වැඩ පිළිවෙලක් ගෙනිච්චේ. මේ එකේ එක පියවරක්,“යැයි සී.එම්.යූ නියෝජ්‍ය ලේකම් සෙල්ලයියා පලනිනාදන් පෙන්වා දෙයි.

ඔහු පවසන්නේ තම වෘත්තීය සමිති සගයා සේවයෙන් ඉවත් කිරීම අසාධාරණ කම්කරු පිළිවෙතක් බැවින් බවර් සමාගමට එරෙහිව නීතිමය පියවර ගන්නා බවයි.