යුද්ධය නිමා වී දහතුන් වසරකට පසුවත් රජයේ ආරක්ෂක අංශ බලහත්කාරයෙන් වාඩිලා සිටින උතුරු නැගෙනහිර දෙපළාතේ දෙමළ ජනයාගේ පෞද්ගලික ඉඩම් වහාම නිදහස් කරන ලෙස බල කරමින් යාපනයේදී විරෝධතාවයක් දියත් කර තිබේ.
යාපනය විශ්වවිද්‍යාල ශිෂ්‍ය සංගමයේ සංවිධානත්වයෙන් ඉඩම් හිමියන්, සිවිල් සංවිධාන ක්‍රියාකාරීන් හා ආගමික නායකයන් ද ඇතුළු සිය ගණනකගේ සහභාගීත්වයෙන් නොවැම්බර් 2 වැනි බදාදා තෙල්ලිපලෙයි හන්දියෙන් ආරම්භ කළ විරෝධතා පා ගමන අවසන් කර තිබුනේ වලිකාමම් උතුර ප්‍රදේශිය ලේකම් කාර්යාලය දක්වා පැමිණ සිය ඉල්ලීම් ඇතුලත් සන්දේශයක් භාර දෙමිනි.
රජයේ ආරක්ෂක අංශ බලහත්කාරයෙන් අල්ලාගෙන සිටින දෙමළ ජනයාට අයත් උතුරු නැගෙනහිර දෙපළාතේ සියලුම පෞද්ගලික ඉඩම් වහාම නිදහස් කරන ලෙස ඉල්ලා සිටින එම සංදේශය මගින් වැඩි දුරටත් ඉල්ලා ඇත්තේ එම දෙපළාතේ කදවුරු බැද සිටින යුද හමුදාවන් වහාම එම භුමියෙන් ඉවත් කරන ලෙසයි.
දෙමළ ජනයාට අවශ්‍ය ස්තීර දේශපාලන විසදුම කුමක්දැයි දැනගැනීම සදහා ජනමත විචාරණයක් පවත්වන ලෙසද එම සන්දේශය මගින් ඉල්ලා ඇති බව පළාත් බද වාර්තාකරුවෝ වැඩි දුරටත් පවසති.
ප්‍රදේශවාසීන් පවසන පරිදි යුද සමයේදී වලිකාමම් උතුර ප්‍රදේශයේ පමණක් යුද හමුදාව විසින් අත්පත්කරගෙන ඇති දෙමළ ජනයාට අයත් පෞද්ගලික ඉඩම් ප්‍රමාණය අක්කර 6384 කි.
යුද්ධය නිමා වීමෙන් පසුව ඉඩම් හිමියන් විසින් සිදු කරන ලද විරෝධතා හමුවේ ඉඩම් අක්කර 3384 ක් නිදහස් කර ගැනීමට හැකිවු බව ඔවුන් වැඩි දුරටත් පවසති.
මේ තාක් නිදහස් නොකළ ඉතිරි ඉඩම් අක්කර 3000 න් ඉඩම් අක්කර 1600 ක් හමුදා කදවුර පුළුල් කිරීම සදහා වෙන් කරන ලෙස පසුගිය සැප්තැම්බර් මාසයේදී ඉඩම් අමාත්‍යවරයා විසින් ප්‍රාදේශිය ලේකම්වරයාට ලිපියක්ද යොමු කර තිබෙන ද ප්‍රදේශවාසීන් සදහන් කරයි.
ඉඩම් හිමියන් විසින් අද දිනයේ ඊටද විරෝධය පළ කළ බව පළාත් බද වාර්තාකරුවෝ වැඩි දුරටත් පවසති.
Facebook Comments
