අසුව දශකය අග භාගයේ බලහත්කාරයෙන් අතුරුදහන් කිරීම් සම්බන්ධයෙන් වගකිව යුතු බවට ජනාධිපති කොමිෂන් සභා විසින් චෝදනා කර ඇති අපරාධකරුවන් සියල්ලන්ගේම නම් ශ්‍රී ලංකාවේ පාර්ලිමේන්තුව අද රැස්වන විට ප්‍රසිද්ධියට පත් කළ යුතු බවට අතුරුදහන් කිරීම් වලට එරෙහිව හඩ නගන දිවයිනේ ප්‍රමුඛතම සංවිධානයක් ඉල්ලා සිටී.
හත්සියයකට ආසන්න පිරිසක් අතුරුදහන් කරන ලද මාතලේ දිස්ත්‍රික්කය භාරව සිටි ජනාධිපති ගෝඨාභයගේ නම සඳහන් වන ලැයිස්තුවත් ඊට ඇතුලත් විය යුතු බවයි අතුරුදහන් වුවන්ගේ පවුල් එකමුතුව පවසන්නේ.
1988- 89 දී රාජ්‍යය විසින් සිංහල තරුණයන්ගේ දෙවැනි කැරැල්ල මර්දනය කිරීමේදී මාතලේ දිස්ත්‍රික්කයේ සිදුවූ අතුරුදහන් කරවීම්, ඝාතන සහ 2012 මාතර රෝහල් භූමියෙන් සොයාගත් සමුහ මිනීවල පිළිබඳව ශ්‍රී ලංකාවේ සත්‍යය හා යුක්තිය පිළිබඳ ව්‍යාපෘතිය (ITJP) සහ ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් ඒ සම්බන්ධයෙන් වගකිව යුතු බවට සැකකෙරෙන ප්‍රධානීන් පිලිබඳ වාර්තාවක් නිකුත් කර ඇත.
ඒ සඳහා මෙතෙක් කල් ප්‍රසිද්ධියට පත් කර නොමැති රාජ්‍ය ලේඛන උපයෝගී කරගෙන ඇත.
මහින්ද රාජපක්ෂ ජවිපෙ කැරැල්ල සමයේ අතුරුදහන් කිරීම්වලට එරෙහි පුරෝගාමී නායකයකුව සිටියදී සිදුකෙරුණු බරපතල මානව විරෝධී අපරාධ සම්බන්ධයෙන් මෙවන් වාර්තාවක් 33 වසරකට පසු හෝ නිකුත් වීම ශ්‍රී ලංකාවේ වින්දිතයන්ට යුක්තිය ඉටු කිරීම වෙනුවෙන් සටන් වදින සැමටම ධෛර්යය සපයන බවයි අතුරුදහන් වූවන්ගේ පවුල් එකතුවේ සභාපති බ්‍රිටෝ ප්‍රනාන්දු පවසන්නේ.
“ගෝඨාභය රාජපක්ෂ: 1989 මහා පරිමාණ අපරාධ සම්බන්ධ ශ්‍රී ලංකා ජනාධිපතිගේ භූමිකාව” නමින් යුත් එම වාර්තාව, අතුරුදහන් කරන ලද, නඩු නැතිව මරා දමා සොහොන් කොතක් නොමැතිව වල දමන ලද හා ටයර් සෑයේ පුළුස්සන ලද තම නෑසියන්ට යුක්තිය ඉටු කරවා ගැනීම වෙනුවෙන් දිවා රෑ නොබලා සටන් වදින සැමත්, අනාගතයෙදී තමන්ගේ දුවා දරුවන්ට මේ සා විපත්තියක් සිදුවීම වලක්වන්නට පියවර ගැනීමට වෙහෙසෙන දෙමාපියනුත් අනිවාර්යයෙන් පරිහරණය කළ යුත්තකි,”
මානව හිමිකම් ක්‍රියාධර බ්‍රිටෝ ප්‍රනාන්දු වැඩි දුරටත් අවධාරණය කරන්නේ අතුරුදහන් කිරීම් වලට වග කිය යුත්තන්ගෙන් සමහරකු අද වන විට රටේ බලවත් නිලතල දරන බවයි.
“ආණ්ඩුව විසින්ම එකතු කරන ලද මෙම ලැයිස්තු දශක ගණනාවක් තිස්සේ සඟවා තබන ලද ඒවාය. මේවායේ පොලිස් නිලධාරීන්, හමුදා නිලධාරීන් සහ දේශපාලකයන්ගේ නම් සඳහන් වන බව අපේ අවබෝධයයි. ඉන් සමහරකු අද බලවත් නිලතල දරන්නවුන්ය. තම දරුවන් අතුරුදහන් වූ දස දහස් සංඛ්‍යාත ඥාතීහු මේ කොමිසන් වලට සාක්ෂි දී ඇත්තාහ. ඒ සම්බන්ධ සැකකරුවන් ලෙස නම් කරන ලද්දේ කවුද, නඩු දමන ලද්දේ කාටද සහ කවර නඩු ඉවත දමන ලද්දේද යන්න දැනගැනීමේ අයිතියක් ඔවුන්ට ඇත. මේ රටේ යුග තුනකදී මහා පරිමාන අපරාධ සිදුවී ඇතත් ඒ සම්බන්ධයෙන් කිසිවකුත් වගඋත්තරදායකත්වයෙන් බැඳ තබා නැත. මෙය නැවත සිදු වීම වැලැක්වීමට උපකාරී වන්නක් නොවේ. ඉතිහාසයේ පෙර නොවූ විරූ අර්බුදයක ගිලි ඉන්නා අපේ රටේ ජනතාවට තමන්ගේ පාලකයන් කවුදැයි හඳුනාගැනීමට කාලය දැන් එළැඹි තිබේ.”
මාතලේ අපරාධවලට ප්‍රධාන වශයෙන් වග උත්තර බැඳිය යුතු හමුදා ප්‍රධානියා ලෙස අද කවුරුත් “ගෝහෝම් ගෝටා” ලෙස එලවා දැමීමට හඬ නගන වර්තමාන ජනාධිපති නන්දසේන ගෝඨාභය රාජපක්ෂ නම් කර ඇත.
ගෝඨාභය රාජපක්ෂ ජනාධිපතිගේ අදටත් ඉතාමත් කිට්ටු අගසව්වකු වන වර්තමාන හමුදාපති ශවේන්ද්‍ර සිල්වා මෙන්ම ජගත් ඩයස් හා සුමේධ පෙරේරා යන ඉහලම හමුදා නිලධාරීන් වාර්තාවේ විමර්ශනයට අදාළ කාල සීමාවේ ජනාධිපති යටතේ ගජබා රෙජිමේන්තුවේ මාතලේ දිස්ත්‍රික්කයේ සේවය කර ඇති බව එම වාර්තාවෙන් හෙළිදරව් වන බවත් බ්‍රිටෝ ප්‍රනාන්දු තව දුරටත් පෙන්වා දෙයි.
අතුරුදහන් වුවන් පිළිබඳව සොයා බැලීමට පත් කළ ජනාධිපති කොමිසමේ වාර්තාවකට අනුව මෙම භීෂණ සමයේදී එම කොමිසමට වාර්තා වූ මාතලේ දිස්ත්‍රික්කයේ පමණක් අතුරුදහන් කරන ලද පිරිස 1042 කි.
හැමවිටම ‘මම තමයි හොඳටම කළේ’ යනුවෙන් වහසිබස් දොඩන එවකට මාතලේ දිස්ත්‍රික්කය භාර හමුදා නිලධාරියා වූ කර්නල් ගෝඨාභය රාජපක්ෂ යටතේ අසුව දශකය අග භාගයේ මාස නමයක් තරම් කාලය තුල 700ක් පමණ අතුරුදහන් කර ඇති බව කොමිසන් වාර්තා ඇසුරින් ITJP හා JDS පෙන්වා දෙයි.
“89 ඔක්තෝබර් 7 දා පමණක් 60කට ආසන්න පිරිසක් අතුරුදහන් කර තිබීමෙන් ගෝඨාභය 89 දීද ‘මම තමයි හොඳටම කළේ’ බව තහවුරු කර ඇත.” මැයි 17 වැනිදා අතුරුදහන් වුවන්ගේ පවුල් එකමුතුව නිකුත් කළ නිවේදනයේ වැඩි දුරටත් සදහන්ය.
කොමිසන් සභා වාර්තා උපුටා දක්වන ITJP/JDS වාර්තාවේ දැක්වෙන පරිදි එක් දිනකදී පමණක් පැල්වෙහෙර ගමින් 22ක් පැහැරගෙන ගොස් ඝාතනය කර පුළුස්සා දමා තිබේ. ඒ අතර අවුරුදු 13, 15 සහ 17 වයසේ දරුවන් තිදෙනෙක්ද වෙති.
මාතලේ රෝහල් භූමියෙන් 2012 දී සොයාගත් සමූහ මිනීවලේ අස්ථි කොටස් සම්බන්ධයෙන් මහින්ද රාජපක්ෂ ජනාධිපති සමයේ ඇමරිකාවේ සිදුකළ කාබන් පරීක්ෂණයක ප්‍රතිපල ලෙසින් රජය ඉදිරිපත් කළ වාර්තාවේ දැක්වෙන්නේ ඒවා 1950 ට පෙර යුගයක බවයි.
උතුරේත් දස දහස් ගණනක් අතුරුදහන් කළ යුද්ධයක් දියත් කළ හමුදාවකට නායකත්වය දුන් ආණ්ඩුවක බලසම්පන්න ආරක්ෂක ලේකම් පදවිය ගෝඨාභය රාජපක්ෂ උසුලන කාලයක මීට වඩා වෙනස් ප්‍රතිපලයක් බලාපොරොත්තු වීම අසීරු බව පවසන අතුරුදහන් වුවන්ගේ පවුල් එකමුතුව තව දුරටත් පෙන්වා දෙන්නේ කැනීම් කටයුතු කළ ශ්‍රී ලාංකික වෝහාරික හා පුරාවිද්‍යා විශේෂඥයන් දෙපළම එය ප්‍රතික්ෂේප කරමින් කියා සිටින්නේ මාතලේ සමූහ මිනීවලේ ඇත්තේ 1986 ත් 1990ත් අතර කාලයකදී වලදමන ලද පුද්ගලයන්ගේ අස්ථි කොටස් බවය.
“මහින්ද රාජපක්ෂගේම වචනයෙන්ම කිවහොත් හැටදහසක් අතුරුදහන් කරන ලද යුගයක පැවති රජයේ අමාත්‍යවරයකු වූ රනිල් වික්‍රමසිංහ නැවතත් අද රටේ අගමැති ලෙස පත්වී සිටී. ඔහු එම ධුරයට පත් කරන ලද්දේ මාතලේදී සිංහල තරුණයන්, තරුණියන් හා දරුවන් ට එරෙහි කුරිරුකම් සිදුවන සමයක එම දිස්ත්‍රික්කයේ සර්වබලධාරී හමුදා පාලකයා වශයෙන් නන්දසේන ගෝඨාභය රාජපක්ෂයි. මූල්‍යමය මෙන්ම, මානව විරෝධී අපරාධ සම්බන්ධයෙන් මේ දෙදෙනාම නීතිය ඉදිරියට පැමිණවීම සඳහා වෙහෙසෙන අරගලයක නිරත සැමට ITJP/ JDS වාර්තාව ඒ සඳහා අවශ්‍ය සාක්ෂි සපයයි,” යනුවෙන් බ්‍රිටෝ ප්‍රනාන්දු වැඩිදුරටත් සදහන් කරයි.
“ගෝඨාභය රාජපක්ෂ: 1989 මහා පරිමාණ අපරාධ සම්බන්ධ ශ්‍රී ලංකා ජනාධිපතිගේ භූමිකාව” වාර්තාව මෙතැනින්: https://itjpsl.com/reports/gotabaya-rajapaksa-the-sri-lankan-presidents-role-in-1989-mass-atrocities
Facebook Comments
