හැත්තෑ පස්වන නිදහස් දිනය කළු දිනයක් ලෙස නම් කරමින් නිදහස් උළෙල වර්ජනය කිරීමට දෙමළ ජාතික සන්ධානය තීරණය කර තිබේ.
දෙමළ ජනතාවට ඔවුන්ගේ නිදහස තවමත් නිසි ආකාරයෙන් නොලැබීම හේතුවෙන් එම තීරණය ගෙන ඇති බවයි පාර්ලිමේන්තු මන්ත්‍රී එම්.ඒ සුමන්තිරන් පවසන්නේ.
“නිදහස ලැබුණ විගසම ප්‍රජාතන්ත්‍රවාදය කියන මුවාවෙන් බහුතරවාදයක් වෙලා ඒක පරිවර්තනය වුණා. ඒ නිසා මේ රටේ ජීවත්වන අනිත් ජන කොටස්වලට නිදහසක් ලැබුණේ නෑ. සිංහල බෞද්ධ ජනතාව තමන්ට නිදහස ලැබුණා කියලා, හිතාගෙන හිටියා. ඒ වුණත් ඒ අයටත් දැනෙනවා තමන්ටත් නිදහස ලැබුණේ නෑ කියලා.”
“ඒ නිසා තමයි මේ 75 වන නිදහස් දිනය කියලා පෙබරවාරි 4 වෙනිදා ජනාධිපතිතුමා ඒක සමරන වෙලාවේදී මේ රටේ ජීවත්වන කාටත් ඒ නිදහස ලැබුණේ නෑ කියලා අපි ප්‍රකාශ කරන්න කැමතියි. ඒ නිසාම අපි මේක සමරන වෙලාවේ මේක කළු දිනයක් කියලා ප්‍රකාශ කරලා, රටට හරියාකාරව නිදහස ලැබෙන්නට අපි ව්‍යාපාරයක් පටන් ගන්නවා.”
“කළු දිනයක්”
මේ අතර සිංහල බෞද්ධ රාජ්‍ය මගින් දෙමළ ජනයාට එරෙහිව නොකඩවා දියත් කෙරෙන මර්දනයට එරෙහිව “නිදහස් දිනය“ කළු දිනයක් බවට උතුරේ ශිෂ්‍ය සංවිධානයක් විසින් ප්‍රකාශයට පත් කර තිබේ.
දෙමළ ජනයාගේ අයිතීන් දිනා ගැනීම වෙනුවෙන් පෙනී සිටින සියලු පාර්ශවයන් වෙත යාපන සරසවියේ මහා ශිෂ්‍ය සංගමය ඇරයුම් කර ඇත්තේ පෙබරවාරි 4 වැනිදා උතුරු නැගෙනහිර පළාත් වල පැවැත්වෙන විරෝධතා උද්ඝෝෂණ සඳහා එක් වන ලෙසයි.
යාපන සරසවියට ප්‍රදේශයේ මාධ්‍යවේදීන් ඉකුත් දා කැඳවූ මහා ශිෂ්‍ය සංගම් නියෝජිතයන් කියා සිටියේ බ්‍රිතාන්‍ය අධිරාජ්‍යවාදීන්ගෙන් නිදහස ලැබූ දා පටන් දෙමළ ජනයාගේ අයිතීන් දිනෙන් දින කප්පාදු වූ බවයි.
යුද්ධය අවසන්ව වසර 14 ක් ගත වුවත්, රජයේ හමුදා බලහත්කාරයෙන් රැගෙන ගොස් අතුරුදහන් කළවුන්ට යුක්තිය මෙතෙක් ඉටු නොකිරීම නිසා ඔවුන්ගේ ඥාතින් තවමත් සටන් කරමින් සිටින බව පෙන්වා දෙන යාපන සරසවි ශිෂ්‍ය සංගමය අවධාරණය කර ඇත්තේ ත්‍රස්ත පනත අහෝසි කරමින් දේශපාලන සිරකරුවන් නිදහස් නොකිරීම මෙන්ම දෙමළ ජන සංහාරයට වගකිව යුත්තන් ආරක්ෂා කිරීම මගින් තවදුරටත් දෙමළ ජනයාට එරෙහි මර්දනය පෙන්නුම් කරන බවයි.
“නොයෙකුත් පොරොන්දු දෙන සිංහල- බෞද්ධ රාජ්‍ය දෙමළ ජනයාත්, ජාතයන්තරයත් රවටමින්, ප්‍රජාතන්ත්‍රවාදී අයිතීන් වෙනුවෙන් පෙනී සිටින දෙමළ ජන ක්‍රියාධරයන් අනීතිකව අත්අඩංගුවට ගනිමින්, බිය වැද්දීම රජයේ ආරක්‍ෂක අංශ වල දෛනික කාර්යයක් බවට පත්ව ඇත.”
මෙවැනි පීඩනයක සිටින දෙමළ ජනතාවට සිංහල-බෞද්ධ රාජ්‍යයේ “නිදහස් දිනය“ කළු දිනයක් ලෙස නම් කරමින්, විරෝධය දක්වා, අද දවසේ දෙමළ ජනයා මුහුණ දෙමින් සිටින යතාර්ථය ජාත්‍යන්තර ප්‍රජාව හමුවේ පෙන්නුම් කළ යුතු යැයි උතුරේ සරසවි නායකයෝ පවසති.
Facebook Comments
