ත්‍රිකුණාමලයේ සිංහල මැරයෝ දෙමළ මන්ත්‍රීට පහර දෙති

දෙමළ විමුක්ති අරගලය වෙනුවෙන් මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී තිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණය වෙනුවෙන් ගමන් ගත් රථ පෙළපාලියකට හා දෙමළ ජනතා නියෝජිතයෙකුට නැගෙනහිර දී සිංහල මැර කණ්ඩායමක් විසින් ප්‍රහාරයක් එල්ල කර තිබේ.

එම ප්‍රහාරයෙන් දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් හා එම පෙරමුණේ නීතිඥ නටරාජ් කාන්දීපන් ද තුවාල ලබා ඇති බවයි ත්‍රිකුණාමලය වාර්තාකරුවන් පවසන්නේ.

ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී තිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණ සතිය නිමිත්තෙන් සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය මඩකලපුව, ත්‍රිකුණාමලය, කිලිනොච්චිය හරහා නල්ලුර් කන්දසාමි කෝවිල අසල ඉදිකර තිබී 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය දක්වා ගමන් කිරීමට සැලසුම් කර තිබුනි.

සැප්තැම්බර් 17 වැනිදා ත්‍රිකුණාමලය හරහා ගමන් කරමින් තිබු තිලීපන්ගේ රුව සහිත රථයට සර්ධාපුර සංසන්ධියේදී පොලු මුගුරු අතැතිව පැමිණි කාන්තාවක්ද සහිත මැර කණ්ඩායමක් දැඩි ලෙස පහර දී දැඩි අලාභහානි කර පාර්ලිමේන්තු මන්ත්‍රීවරයාටද පහර දෙන ආකාරය පළාත් බද මාධ්‍යවේදීන් විසින් විඩියෝ ගත කර තිබේ.

ඔවුන් පවසන්නේ පොලිස් නිලධාරීන් බලාසිටියදීම සිංහල මැර කණ්ඩායම දෙමළ ජනතා නියෝජිතයාට පහර දුන් බවයි.

“මු එල්.ටී.ටී.ඊ නායකයා. එල්.ටී.ටී.ඊ නායකයා.” යනුවෙන් හා අසභ්‍ය වචන වලින් සිංහල මැර කණ්ඩායම මන්ත්‍රීවරයාට චෝදනා කරමින් පහර දෙද්දි කාන්තාවක් මන්ත්‍රීවරයාට පහර දී තිබුනේ සිංහ කොඩිය සවිකර තිබෙන ලීයකිනි.

පොලිසිය බලා සිටියදී මැර ප්‍රහාරය දියත් කළ කිසිවකුත් ඒ අවස්ථාවේ අත් අඩංගුවට ගනු දකින්නට නොලැබේ.

මැර කණ්ඩායමේ තවත් සාමාජිකයෙක් සෙල්වරාජා ගජේන්ද්‍රන් මන්ත්‍රීවරයාට පහර දී තිබුනේ යතුරුපැදිය සදහා පළදින හෙල්මටයකිනි.

“මේක රාජ්‍යය විසින් කරන ලද පහර දීමක්,” යයි ගජේන්ද්‍රන් මන්ත්‍රීවරයා මාධ්‍යවේදීන්ට පවසා තිබුණි.

සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා තීලිපන් උපවාසයක් ආරම්භ කළේය.

යාපනය විශ්ව විද්‍යාලය ඉදිරිපිට උපවාසයක යෙදී සිටියදී තිලීපන් මිය ගියේ 1987 සැප්තැම්බර් 26 වෙනිදා ය.