ආණ්ඩුව පෙරලා දැමීමට මේ වසර තුල කටයුතු සුදානම් කර ඇති බවට හිටපු ජනපති මහින්ද රාජපක්ෂ කර තිබෙන තර්ජනය අගමැතිවරයා දෙන ආකාරයේ විහිලු සහගත පිළිතුරු මගින් සුලු කොට නොතකන ලෙස අාණ්ඩුව පිහිටුවීමට මුලිකත්වය ගත් වාමාංශික නායකයෙක් රජයට අනතුරු අගවා සිටී.
රටේ ජාතිවාදය අවුස්සා සිංහල බහුතරය තමන් සතුව සිටින බව පෙන්වමින් එය පෝෂණය කර එය ප්‍රහාරක ආයුධයක් කරගෙන රටේ කළබලකාරි තත්වයක් තුලින් ඉදිරියට යෑම මහින්ද රාජපක්ෂගේ ක්‍රියා කලාපය බවයි නව සම සමාජ පක්ෂ නායකයා පවසන්නේ.
මේ වසරේ ආණ්ඩුව පෙරලන බවට හිටපු ජනපති කළ අභියෝගයට අගමැති රනිල් වික්‍රමසිංහ ප්‍රතිචාර දක්වා තිබුනේ තමන් විදේශ ගතවන සතියේ ඊට ඉඩ සලසා ගන්නා ලෙස පවසමිනි.
අගමැතිවරයා ශ්‍රී ලංකාවේ සිටියදීම බලය සියතට ගන්නා බව ඊට පිළිතුරු වශයෙන් කුරුණෑගල පාර්ලිමේන්තු මන්ත්‍රී මහින්ද රාජපක්ෂ කියා තිබුනි.
මහාචාර්ය ගුණදාස අමරසේකර, ආචාර්ය නලින්ද සිල්වා හා භික්ෂුන්වහන්සේ නමක් මුලාසනයේ තබමින් හම්බන්තොට ඉඩම් කොල්ලයක් සිදුවන බවට කොළඹදී පැවැත්වු රැස්වීමද සංවිධානය කර ඇත්තේ සිංහල ජාතිය ඇවිස්සීමේ අරමුණෙන් බව ආචාර්ය වික්‍රමබාහු කරුණාරත්න පවසා සිටියේ 5 බ්‍රහස්පතින්දා කොළඹදී පැවැති ප්‍රවෘත්ති සාකච්ඡාවකදීය.
ඉඩම් සහ වරාය විදේශීය රටවලට බදු දීමට කටයුතු කරන බවට චෝදනා කරන මහින්ද රාජපක්ෂ සහ ඔහුගේ හිතවාදීන් ඔවුන්ගේ පාලන සමයේද ඒ ආකාරයෙන් බදු දීම් කළ බව පෙන්වා දෙන ආචාර්ය වරයා අවධාරණය කර සිටියේ මහින්ද රාජපක්ෂ පාලන සමයේ වඩාත්ම දරුණු තත්වයන් යටතේ එම බදු දීම සිදුකිරීම රටට වඩාත්ම නරක තත්වයක් උදා කිරීමට හේතු වු බවයි.
පැසිස්ට්වාදය මර්දනය නොකිරීම
ජාතිවාදය, ආගම්වාදය අවුස්සා ඉතාම කුරිරු විදිහට ගහ මරා ගන්න තත්වයට රට පත් කර ඉදිරියට යන තත්වයක් මහින්ද රාජපක්ෂ හිතවාදීන් විසින් පෝෂණය කරමින් සිටින බවට අනතුරු අඟවන නසසප නායකයා අවධාරණය කරන්නේ එම ෆැසිස්ට්වාදී තත්වය මර්දනය කිරීම සදහා ආණ්ඩුව ලබා දෙන පිළිතුරු ප්‍රමාණවත් නොවන අතර ඒ සදහා බල සම්පන්න පිළිතුරු ලබා දිය යුතු බවයි.
පාර්ලිමේන්තුවේ බහුතරය දිනා ගෙන ආණ්ඩුවක් පිහිටුවන බවට මහින්ද රාජපක්ෂ හිටපු ජනාධිපතිවරයා පැවසුවත් ඔහු ක්‍රියා කරන්නේ එලෙස නොව බව පෙන්වා දෙන නව සම සමාජ නායකයා අවධාරණය කරන්නේ ඒ සදහා විවිධ උපක්‍රම පාර්ලිමේන්තුවෙන් පිටත ඔහු ක්‍රියාත්මක කරමින් සිටින බවයි.
“ඇවිස්සීමට කප්පිත්තෙක්”
හමුදා ඇවිස්සීමක් සිදු කර ඉන් ප්‍රයෝජන ගැනීමටද හිටපු ජනාධිපතිවරයා කටයුතු කරමින් සිටින බවටද චෝදනා කරන ඔහු වැඩි දුරටත් පවසන්නේ එමෙන්ම විවිධ නිලධාරීන් සුදානම් කරමින් මහින්ද රාජපක්ෂ ක්‍රියාත්මක වෙමින් සිටින බවයි.
නමුත් මෙම තත්වයට මුහුණ දීම සදහා රජය ප්‍රමාණවත් වැඩ පිළිවෙලක් ආරම්භ කර නැති බව පැවසු ආචාර්ය වික්‍රමබාහු කරුණාරත්න ආණ්ඩුවට මතක් කර දුන්නේ “මහින්ද රාජපක්ෂ කියන්නේ ජනතාව ඇවිස්සීමට දක්ෂ කප්පිත්තෙක්” වන බැවින් සුදුසු අවස්ථාවේදී ජනතාව තමාගේ පැත්තට හරවා ගන්නේ කෙසේදැයි ද කියා හිටපු ජනාධිපතිවරයා හොදින් දන්නා බවයි.
ඒ හේතුවෙන් ජනතාව අතර ඔහු ගොඩ නගමින් සිටින ප්‍රචණ්ඩ බලවේගයේ බලය සුලු කොට නොතකන ලෙස අනතුරු අඟවන ආචාර්ය වික්‍රමබාහු කරුණාරත්න ආණ්ඩුවට අවධාරණය කර සිටියේ ඒ සම්බන්ධයෙන් ආණ්ඩුව ප්‍රමාණවත් අවධානය යොමු කිරීමේ වැදගත්කමයි.
(Radiogagana)
Facebook Comments
