බැඳුම්කර සිද්ධියට චෝදනා එල්ලවී සිටින මහ බැංකුවේ හිටපු අධිපති අර්ජුන් මහේන්ද්‍රන් යළි මුදල් අමාත්‍යංශයේ මහ බැංකු උපදේශකවරයෙක් ලෙස කටයුතු කරමින් සිටින බව දූෂණ විරෝධී පෙරමුණ චෝදනා කරයි.
මුදල් අමාත්‍යවරයා විසින් සතියේ මහ බැංකුවේ වත්මන් අධිපති ඉන්ද්‍රජිත් කුමාරස්වාමි, ආර්.පාස්කරලිංගම් සහ අමාත්‍යාංශ ලේකම් ආචාර්ය ආර්.එච්.එස්. සමරතුංග සමග පවත්වනු ලැබු රැස්වීමට මුදල් අමාත්‍යාංශය නියෝජනය කරමින් අර්ජුන් මහෙන්ද්‍රන් සහභාගි වී ඇති බවයි ජනාධිපතිවරයා වෙත ලිපියක් යොමු කරමින් දුෂණ විරෝධී පෙරමුණ පෙන්වා දෙන්නේ.
ප්‍රශ්නකාරී බැඳුම්කර සිද්ධියට චෝදනා එල්ලවී සිටින මහ බැංකුවේ හිටපු අධිපති අර්ජුන් මහේන්ද්‍රන් මුදල් අමාත්‍යාංශයේ මහ බැංකු උපදේශකයකු ලෙස කටයුතු කිරීම ගැටලු සහගත බව පවසන දුෂණ විරෝධි පෙරමුණ බැඳුම්කර වංචාව පිළිබඳව විමර්ශනය කිරීම සදහා විශේෂ ජනාධිපති කොමිෂන් සභා පත් කිරීම සම්බන්ධයෙන් ජනාධිපතිවරයාට ස්තුති කර සිටී.
යහපාලනය ක්‍රීයාවෙන් පෙන්වන්න
අදාළ රැස්වීමේදී අර්ජුන් මහේන්ද්‍රන් වත්මන් බැංකු අධිපති කුමාරස්වාමි වෙත ශ්‍රී ලංකා මුල්‍ය මණ්ඩලය විසින් ගත යුතු තීන්දු සහ තීරණ සම්බන්ධයෙන් උපදෙස් ලබාදීම සිදු කර ඇති අතර මෙය ශ්‍රී ලංකා මහ බැංකු පනතේ විධිවිධාන උල්ලංඝනය කිරීමක් වන බැවින් අල්ලස, දූෂණය වංචාව මැඩලීම සදහා වත්මන් යහපාලන රජයේ කැපවීම වචනයෙන් නොව ක්‍රියාවෙන් ඔප්පු කළ යුතු බවයි දුෂණ විරෝධී පෙරමුණේ උලපනේ සුමංගල හිමි සහ රජිත් කීර්ති තෙන්නකෝන් ජනාධිපතිවරයාට යොමු කල ලිපියේ සඳහන්ව ඇත්තේ.
චෝදනා එල්ල වී ඇති හිටපු මහ බැංකැ අධිපති මුල්‍ය මණ්ඩලයට උපදෙස් ලබා දෙන්නෙක් ලෙස කටයුතු කරමින් සිටයදී ජනාධිපතිවරයා පත් කල කොමිසම කාළය කා දැමීමක් යන්න ජනතාවට තේරුම් ගනු ඇති බැවින් අර්ජුන් මහේන්ද්‍රන් මුදල් අමාත්‍යාංශයේ උපදේශක ලෙස මහා භාණ්ඩාගාරය සමග කටයුතු කිරීම නවතා දැමීම කෙරෙහි ජනාධිපතිවරයාගේ අවධානය යොමු කරන ලෙසද එම ලිපිය මඟින් වැඩිදුරටත් ඉල්ලා ඇත.
Facebook Comments
