“එන්ටප්‍රයිස් ශ්‍රී ලංකා” ව්‍යවසායක පාරාදීසය ප්‍රදර්ශනය ඇරඹෙයි

අමාත්‍ය මංගල සමරවීරගේ සංකල්පයක් අනුව ව්‍යාපාරික පාරාදීසයක් බිහි කිරීමේ රජයේ වැඩපිළිවෙළේ තවත් අදියරක් ලෙස ක්‍රියාවට නංවන “එන්ටප්‍රයිස් ශ්‍රී ලංකා” ජාතික ප්‍රදර්ශණය අග්‍රාමාත්‍ය රනිල් වික්‍රමසිංහගේ ප්‍රධානත්වයෙන් ආරම්භ විය.

මොණරාගල දිස්ත්‍රික් ලේකම් කාර්යාලය අසල අක්කර 22 ක භූමියක පුරා පැවැත්වෙන මෙම ප්‍රදර්ශනය අගෝස්තු මස 29,30,31 යන තෙදින පුරා පැවැත්වෙන බවයි සංවිධායකයින් පවසන්නේ.

යහපාලන රජය බලයට පත්වීමෙන් පසු ගතවූ වසර තුනක කාලය තුල රටට සිදුවූ සංවර්ධනය සහ සිදුවෙමින් පවතින සංවර්ධනය මෙන්ම වසර 2025 වන විට රට ගමන් කිරීමට නියමිත සංවර්ධන මාර්ගය පිළිබද කරුණු මෙම ප්‍රදර්ශනය හරහා ඉදිරිපත් කිරීමටයි සැලසුම් කර ඇත්තේ.

කළාප 12 කින් සමන්විත මෙම ප්‍රදර්ශණය රාජ්‍ය හා පෞද්ගලික අංශයේ ප්‍රදර්ශණ කුටි 512 කට අධික සංඛ්‍යාවකින් සමන්විතයි.

ප්‍රදර්ශනය විවෘත කරමින් අග්‍රාමාත්‍යවරයා විසින් මොණරාගල දිස්ත්‍රික්කයේ පවුල් 800 කට ඉඩම් ඔප්පු පිරිනැමීමට නියමිතව ඇත.

සංහිදියාව, ප්‍රජාතන්ත්‍රවාදය සහ සංවර්ධනය යන තේමාවෙන් “එන්ටප්‍රයිස් ශ්‍රී ලංකා” ප්‍රදර්ශනය 29.30,31 යන තෙදින තුළ පෙරවරු 10.00 සිට රාත්‍රී 12.00 දක්වා පැවැත්වෙන බවයි සංවිධායකයින් වැඩි දුරටත් නිවේදනය කරන්නේ.