ශ්‍රී ලංකා නිදහස් පක්ෂයේ පාර්ලිමේන්තු කණ්ඩායමේ පිරිසක් යහපාලන පොරොන්දු වෙනුවෙන් “ජනවාරි 08 මිතුරෝ” ලෙස විකල්ප කණ්ඩායමක් ලෙස කටයුතු කිරීමට තීරණය කර තිබේ.
එම කණ්ඩායම යහපාලන මූලධර්ම ඉටු කර ගැනීමේ අරමුණින් ඉදිරි එක්සත් ජාතික පෙරමුණු ආණ්ඩුවට සහාය දීමට එකඟ වී ඇති බවයි එජාප ආරංචි මාර්ග පවසන්නේ.
ජනවාරි 08 ජනතාවට දුන් “යහපාලන” පොරොන්දු යථාර්තයක් බවට පත්කිරීමේ අරමුණින් යුතුව ශ්‍රීලනිපයේ මෙම කණ්ඩායම හා රනිල් වික්‍රමසිංහ මහතා සහ මංගල සමරවීර ඇතුළු එජාප ජේෂ්ඨයන් සමඟ කළ සාකච්ඡාවලදී ප්‍රතිපත්තිමය එකඟතාවයකට පසුගිය සතිය වන විට එළඹ ඇත.
පාර්ලිමේන්තු මන්ත්‍රීවරුන් වන දුමින්ද දිසානායක, මහින්ද අමරවීර, විජිත් විජිතමුනි සොයිසා, ලසන්ත අලගියවන්න, වීරකුමාර දිසානායක, ෆයිසර් මුස්තාපා, සාරතී දුෂ්මන්ත මිත්‍රපාල, ඉන්දික බණ්ඩාරනායක, ලක්ෂ්මන් සෙනවිරත්න, කාදර් මස්තාන්, ශ්‍රියානි විජේවික්‍රම ඇතුළු පිරිසක් ‘ජනවාරි 08 මිතුරෝ’ නමින් ශ්‍රීලනිපය තුළ අභ්‍යන්තර සංවිධානයක් ලෙස මෙසේ කටයුතු කරනු ලබයි.
මෙම එකමුතුවේ කැඳවුම්කරු ලෙස ශ්‍රීලනිප ජාතික සංවිධායක පාර්ලිමේන්තු මන්ත්‍රී දුමින්ද දිසානායක කටයුතු කරන අතර පසුගියදා “ජනවාරි 08 මිතුරෝ” මහින්ද අමරවීර මහතාගේ නිවසේදී සිය පළමු නිල හමුව පවත්වා ඇත.
තවද මෙම කණ්ඩායම ශ්‍රී ලංකා පොදුජන පෙරමුණ සමඟ පොදු පෙරමුණක් වෙත සහය දැක්වීමට ද එරෙහිව කටයුතු කරන බවයි ශ්‍රීලනිප ආරංචි මාර්ග වැඩි දුරටත් පවසන්නේ.
Facebook Comments
