ඔස්ට්‍රේලියානු වෙබ් අඩවියක පළවු ප්‍රවෘත්තියක් සම්බන්ධයෙන් ජනාධිපති මෛත්‍රීපාල සිරිසේනගේ පෞද්ගලික අවධානය යොමුව ඇත.
මෛත්‍රීපාල සිරිසේන කෘෂිකර්ම හා ගොවිජන සේවා අමාත්‍යවරයා ලෙස කටයුතු කළ අවධියේ ඔහුගේ කාර්ය මණ්ඩල සාමාජිකයෙකු සම්බන්ධව සිදුවූවා යැයි පැවසෙන සිද්ධියක් පිළිබඳව සිඩ්නි මෝනින් හැරල්ඩ් වෙබ් අඩවියේ පළ වූ ප්‍රවෘත්තිය පිළිබඳව ජනාධිපතිවරයාගේ එසේ පෞද්ගලික අවධානය යොමුව තිබේ.
ජනාධිපති මාධ්‍ය අංශය නිවේදනයක් නිකුත් කරමින් සඳහන් කරන්නේ එවැනි සිද්ධියකට කිසිදු සම්බන්ධයක් හෝ දායකත්වයක් නැතැයි ජනාධිපති මෛත්‍රීපාල සිරිසේන ප්‍රකාශ කළ බවයි.
අදාළ ප්‍රවෘත්තිය සම්බන්ධයෙන් වැඩිදුර ක්‍රියාමාර්ග ගැනීම සඳහා ජනාධිපතිවරයා විසින් නීතිපතිවරයාට උපදෙස් දී ඇති බවද එහි වැඩිදුරටත් සඳහන්ය.
තම දේශපාලන ජීවිතයේදී කිසි දිනෙක දූෂණ අක්‍රමිකතාවක් සඳහා මැදිහත් වීමක්, අනුබල දීමක් හෝ සම්බන්ධවීමක් සිදු වී හෝ සිදු කර නැතැයිද ජනාධිපතිවරයා අවධාරණය කරන බව එම නිවේදනයේ දැක්වෙයි.
මෛත්‍රීපාල සිරිසේන කෘෂිකර්ම හා ගොවිජන සේවා අමාත්‍යවරයා ලෙස කටයුතු කළ අවධියේ ඔහුගේ කාර්ය මණ්ඩල සාමාජිකයෙකු විසින් ඔස්ට්‍රේලියානු සමාගමකින් අල්ලස් මුදලක් ලබාගත් බව, එකී වෙබ් අඩවිය මගින් වාර්තාකර තිබිණ.
මේ ගැන අද පැවැති මාධ්‍ය හමුවකදී මුදල් රාජ්‍ය අමාත්‍ය ලක්ෂ්මන් යාපා අබේවර්ධනගෙන් මාධ්‍යවේදීන් විමසූ අවස්ථාවේ අමාතයවරයා පැවසුවේ අදාළ සිද්ධිය ගැන නිවේදනයක් නිකුත් කරනු ඇති බවයි.
වසර ගණනකට පෙර වූ සිද්ධියක් මෙතරම් කලක් ඇවෑමෙන් යළි මතුව ඒම ද සැකයක් ඇතැයි හෙතෙම පෙන්වාදුන්නේය.
Facebook Comments
