නිවසක් ඉදි කර ගැනීම සදහා සහනදායි පොලී ක්‍රමයක් යටතේ කොටස් වශයෙන් ලබා දෙන ණය මුදලේ වාරික නියමිත පරිදි නොලැබීමෙන් අසරණ තත්වයට පත්ව සිටින උතුරේ යුද අනාථයන් පිරිසක් හිඟ මුදල් ඉල්ලා විරෝධතාවයක් පවත්වා තිබේ.
යාපනය කන්කසන්තුරේ සන්දිලිප්පායි ප්‍රාදේශීය ලේකම් කොට්ඨාශයට අයත් පෙරියවිලාන් ගම්වාසීන් පිරිසක් නිවාස සංවර්ධන අධිකාරියට එරෙහිව පෙබරවාරි 17 බදාදා හවස විරෝධතාවය දියත් කර ඇත්තේ උතුරු පළාත් ආණ්ඩුකාර කාර්යාලය ඉදිරිපිටදී ය.
මෛත්‍රී, රනිල් පාලන සමයේ නිවාස සංවර්ධන අධිකාරිය මගින් අඩු ආදායම් ලාභී පවුල් සඳහා නිවාස ඉදිකරදීම වෙනුවෙන් ලබා දුන් ණය යොජනා ක්‍රමයේ පළමු ණය වාරිකය පමණක් ලබා දී ඉතිරි මුදල ලබා නොදීමෙන් ගම් වැසියෝ සිය නිවාස වල වැඩ කටයුතු අවසන් කර ගැනීමට නොහැකිව අසරණ තත්වයට පත්ව සිටිති.
පළාත් බද වාර්තාකරුවන් පවසන්නේ එක් නිවාසයක් ඉදිකරගැනිම වෙනුවෙන් රුපියල් ලක්ෂ හතහමාරක මුදලක් සහන පොලී ක්‍රමය යටතේ ලබා දෙන බවට පොරොන්දු ලබා දී තිබුනත් මේ වන විට ඔවුන්ට ලබා දී ඇත්තේ රුපියල් එක්ලක්ෂ හැත්තෑපන්දහසක මුදලක් පමණක් බවයි.
කාන්තාවන් බහුතරයකින් සැදුම් ලත් ගම්වාසීන් එහිදී පෙන්වා දී ඇත්තේ උතුරේ දියත් වු යුද්ධය නිමා වීමෙන් පසු සිය මුල්ගම්බිම්වල නැවත පදිංචි වූ තමන් තාවකාලික නිවාසවල වසර ගණනක් ජීවත් වු පසු ස්ථීර නිවාස සාදාගැනීමට නිවාස සංවර් ධන අධිකාරිය විසින් සහනදායි පොලී ක්‍රමයක් යටතේ ලබා දෙන ණය යෝජනා ක්‍රමයේ පළමු ණය වාරිකය ලබා දුන්නද ඉතිරි ණය වාරිකයන් ලබා දීම නවතා දැමීම හේතුවෙන් ගම්වාසීන් දැඩි පීඩාවන්ට ලක්ව සිටින බවයි.
නිවාසවල වැඩ කටයුතු සම්පුර්ණ කරගැනීම සදහා ඉතිරි ණය මුදල්ද ලබා දීමට බලධාරීන් කඩිනම් පියවර ගත යුතු බවට ඔවුහු බල කර සිටිති.
“ආණ්ඩුව මාරු වූ පසු කළ හැකි දීයක් නොමැති” යයි නිලධාරීන් ප්‍රකාශ කළ බව විරෝධතා කාරියෝ පැවසුහ.
පළමු ණය වාරික මුදල සහ ඉතිරි මුදල්ද ලබා ගත් විශාල පිරිසක් උතුරු ප්‍රදේශයේ මේ වන විට සිටින බැවින් අදාල විරෝධතාකරුවන්ගේ ගැටළුව බලධාරීන් සමග සාකච්ඡා කර කඩිනම් විසඳුමක් ලබා දීමට පියවර ගන්නා බවට උතුරු පලාත් ආණ්ඩුකාර කාර්යලය විසින් විරෝධතා කරුවන්ට දැනුම් දීමෙන් පසු විරෝධතාව නැවත්වීමට ඔවුන් පියවර ගත් බව පළාත් බද වාර්තාකරුවෝ වැඩි දුරටත් පවසති.
යුද අනාථයන්ට තවමත් ඉඩම් නෑ
උතුරේ දියත් කළ යුද්ධය අවසන් වී දොලොස් වසරකට ආසන්න කාලයක් ගත වී ඇතත් යාපනය දිස්ත්‍රික්කයේ අනාථ කඳවුරු තුළ පවුල් හාරසීයකට අධික සංඛ්‍යාවක් තවමත් සිටින බව පසුගියදා හෙළි වී තිබුනි.
යාපනය දිස්ත්‍රික්කයේ අවතැන්වුවන්ගේ සුභසාධන මධ්‍යස්ථාන තුළ සිටින පවුල් 409 න් පවුල් 233 ක්ම ඉඩම් නොමැති පවුල් වශයෙන් හදුනාගෙන ඇති බව රජය පවසයි.
කම්පාසහගත මෙම තොරතුරු අනාවරණය වී තිබුනේ ජනාධිපතිවරයාගේ ප්‍රධානත්වයෙන් පෙබරවාරි 1 සඳුදා රැස්වු කැබිනට් මණ්ඩලයේදීය.
Facebook Comments
