රජය යුනෙස්කෝ කොන්දේසි නිසි ලෙස ක්‍රියාත්මක කිරීම හේතුවෙන් ගාල්ල කොටුව ලෝක උරුම තත්ත්වයෙන් ඉවත්වීමේ අවධානම පහව ගොස් ඇති බව නීතිය හා සාමය සහ දක්ෂිණ සංවර්ධන අමාත්‍යවරයා පවසයි.
පසුගිය කාලයක් පුරාවට මේ කොන්දේසි කඩකර ඉදිකිරීම් සිදු වූ නිසා ගාල්ල කොටුව ලෝක උරුම ලේඛනයෙන් ඉවත්වීමේ අවධානමක් තිබු බව පෙන්වා දුන් අමාතය සාගල රත්නායක යහපාලන රජය බලයට පත්වූ වහාම එම කොන්දේසි පිළිබඳ සැළකිලිමත් වී ඒවා දැඩි ලෙස ක්‍රියාත්මක කල බව ද කියා සිටියේය.
” ගාල්ල කොටුව සජීවී ලෝක උරුමයක්. යුනෙස්කෝ සංවිධානය කොටුවේ ගෘහ නිර්මාණ ලක්ෂණ හා එහි පෞරාණික තත්ත්වය සැළකිල්ලට ගෙන මෙය ලෝක උරුමයක් ලෙස පිළිගෙන තිබෙනවා. එය ඒ ආකාරයෙන් ම පවත්වාගෙන යාම සඳහා අදාල කොන්දේසි යුනෙස්කෝ සංවිධානය විසින් ඉදිරිපත් කර තිබුණා.” යැයි 08 සඳුදා ගාල්ල කොටුවේ නිරීක්ෂණ චාරිකාවකින් අනතුරුව අමාත්‍යවරයා මාධ්‍ය වෙත ප්‍රකාශ කළේය.
අනවසරයෙන් ඉදිකර ඇති ආයතන 14ක් කොටුවෙන් ඉවත් කිරීමට සැලසුම් කර තිබෙන බවද ඇමැතිවරයා මෙහිදි කියා සිටියේය.
“අපි ගාලු උරුමය රකින්න උත්සාහ කරන්නේ අපේ උරුමයක් ලෙස හිතාගෙනයි. දැන් මේ තියෙන විදිහට තව ටින දවසක් පැවතුණොත් පැරණි ගොඩනැඟිලි විශාල ප්‍රමාණයක් යළි ප්‍රයෝජනයක් ගත නොහැකි තත්ත්වයටම විනාශ වෙනවා. මේ දැනට නියමිත සියලු සංවර්ධන කටයුතු සිදු කරන්නේ ගාලු කොටුවේ සාමාන්‍යය ජන ජීවිතයට කරදරයක් නොවන විදිහට” යි ඇමැතිවරයා පවසයි.
රජයක් ලෙස හරි දේ කරන බව මෙන්ම ගාලු කොටුට අත්ව තිබූ අවධානම ඉවත් වීම රජයක් ලෙස ලැබූ විශාල ජයග්‍රහණයක් බැව් පෙන්වාදෙන අමාත්‍යවරයා ලෝක උරුම ලැයිස්තුවෙන් ගාල්ල හැලී ගියා නම් එය රටට අවමානයක් බවයි වැඩි දුරටත් කියා සිටියේ.
Facebook Comments
