ශ්‍රී ලංකාවේ ඉදිරි ජනාධිපතිවරයා වීමේ අපේක්ෂාවෙන් තරග වැදී සිටින සිංහල අපේක්ෂයන්ට සහාය දීම සඳහා දෙමළ ඉල්ලීම් මාලාවක් දේශපාලන පක්ෂ හා උතුරේ සිවිල් සංවිධාන විසින් ඉදිරිපත් කර තිබේ.
දෙමළ පක්ෂ පහක නායකයන්ගේ අත්සනින් එළිදක්වන ලද ලියවිල්ලක දැක්වෙන පරිදි මෙම යෝජනා පිළිගනිමින් බලයට පත්වන ජනාධිපති හෝ ජනාධිපතිනිය තුන් මාසයක් ඇතුලත එම ඉල්ලීම් ඉෂ්ට කළ යුතුය.
ඒකීය රාජ්‍ය ක්‍රමය අහෝසිකොට එක්සත් උතුරු නැගෙනහිරක ෆෙඩරල් පන්නයේ බලය බෙදීමක් සහිත ව්‍යවස්ථාවක් සම්මත කරගැනීම මෙන්ම යුද අපරාධ, මානව වර්ගයාට එරෙහි අපරාධ සහ වර්ග සංහාරය සම්බන්ධ ජාත්‍යන්තර විනිශ්චයක් ලබා ගැනීම ඒකාබද්ධ යෝජනා අතර ප්‍රධාන වෙයි.
ත්‍රස්තවාදය වැළක්වීමේ පනත අහෝසි කොට දේශපාලන සිරකරුවන් නිදහස් කිරීමත්, අතුරුදහන් වුවන් දෙමළ ජනතාවගේ ඉරණම හෙළි කරගැනීමට ජාත්‍යන්තර යාන්ත්‍රණයක් ස්ථාපිත කිරීමත් ඒකාබද්ධ යෝජනා මාලාවට ඇතුලත්ය.
යාපනය සහ මඩකලපුව විශ්ව විද්‍යාල ශිෂ්‍යයන්ගේ කැඳවීමෙන් පවත්වන ලද සාකච්ඡා වට හයකින් අනතුරුව සම්මත කර ගන්නා ලද යෝජනාවලියට ආර් සම්බන්ධන්ගේ නායකත්වයෙන් යුත් දෙමළ ජාතික සන්ධානය (TNA), සීවී විග්නේෂ්වරන් නායකත්වය දරන දෙමළ ජනතා සන්ධානය (TMK), සෙල්වම් අඩෙයික්කලනාදන්ගේ නායකත්වය සහිත දෙමළ ඊළම් විමුක්ති සංවිධානය (TELO), සුරේෂ් ප්‍රේමචන්ද්‍රන් නායකයා වන ඊළම් මහජන විප්ලවකාරී විමුක්ති පෙරමුණ (EPRLF) සහ ධර්මලිංගම් සිද්ධාර්ථන්ගේ නායකත්වය සහිත දෙමළ ඊළම් ජනතා විමුක්ති සංවිධානය (PLOTE) අත්සන් කර ඇත.war
Facebook Comments
