තම පාලන කාලය තුළ කිසිදු මාධ්‍ය වාරණයක් හෝ මාධ්‍යවේදීන්ට, මාධ්‍ය ආයතනවලට බලපෑමක් සිදුවීමට ඉඩ නොතබන බව ජනාධිපතිවරයා සහතික වී තිබේ.
ඕනෑම සාධාරණ විවේචනයකට ඉඩ තබන බව පෙන්වා දෙන ජනාධිපති ගෝඨාභය රාජපක්ෂ එම නිදහස භාවිතා කරමින් රටේ කීර්තිනාමයට හානි නොවන ලෙස මාධ්‍යවේදීන් කටයුතු කරනු ඇතැයි බලාපොරොත්තු වන බව 12 බ්‍රහස්පතින්දා මාධ්‍ය ආයතන ප්‍රධානීන් අතර පැවති සාකච්ඡාවකදී ප්‍රකාශ කර ඇත.
රටට ආයෝජන ගෙන්වා ගැනීම සඳහා රටේ ප්‍රතිරූපය අතිශය වැදගත් වන බැවින් එම ප්‍රතිරූපය ගොඩනැංවීම සඳහා මාධ්‍යවේදීන්ට කළහැකි කාර්යභාරය අතිවිශාල බව ද ජනාධිපතිවරයා පෙන්වා දී ඇත.
පසුගිය ජනාධිපතිවරණයේ දී රටේ ජනාධිපතිවරයා ලෙස ජනතාව තමා තෝරා පත් කර ගත්තේ අපේක්ෂා රැසක් පෙරදැරිව බවත් දේශපාලනඥයන්ගේ සහ රාජ්‍ය නිලධාරීන්ගේ කාර්යක්ෂමතාව ඉහළ නැංවීම, දූෂණය පිටුදැකීම සහ ආර්ථික සංවර්ධනය ඒ අතර ප්‍රමුඛ වන බව පවසයි.
එකී අපේක්ෂා ජය ගැනීම සඳහා මාධ්‍යවේදීන් අවශ්‍ය සහයෝගය ලබාදෙනු ඇති බවට ජනාධිපති ගෝඨාභය රාජපක්ෂ වැඩි දුරටත් විශ්වාසය පළ කර තිබේ.
Facebook Comments
