හිටපු මුදල් ඇමැතිට හා මහ බැංකු අධිපතිට කුමන්ත්‍රණ චෝදනා

මහ බැංකු බැඳුම්කර වෙන්දේසියට අදාළව කුමන්ත්‍රණය කිරීම ඇතුළු චෝදනා කිහිපයක් හිටපු මුදල් ඇමැතිවරයා, හිටපු මහ බැංකු අධිපතිවරයා ඇතුළු පිරිසකට එල්ල වී තිබේ.

ඒ අනුව බැඳුම්කර වෙන්දේසියට අදාළව කුමන්ත්‍රණය කිරීම, සාපරාධී අයථා පරිහරණය, ​​වංචා සහ අයථා ලෙස වෙළඳපල හැසිරවීම යන චෝදනා මත හිටපු මුදල් අමාත්‍ය රවී කරුණානායක හිටපු මහබැංකු අධිපති අර්ජුන මහේන්ද්‍රන් ඇතුලු 11 දෙනෙකු අත්අඩංගුවට ගන්නැයි නීතිපති දප්පුල ද ලිවේරා වැඩබලන පොලිස්පති සී.ඩී. වික්‍රමසිංහ හට නියෝග කර ඇත.

2016.03.29 වැනිදා සහ 2016.03.31 වැනිදා පැවැත්වුණු බැඳුම්කර වෙන්දේසි වල සිදු කරන ලද අපරාධමය වැරදි වලට අදාළ චෝදනා සම්බන්ධයෙන් සැකකරුවන්ට එරෙහිව ප්‍රමාණවත් කරුණු ඉදිරිපත් වී ඇති බවයි නීතිපතිවරයා පවසන්නේ.

හිටපු මුදල් ඇමැතිවරයා හා මහ බැංකු අධිපතිවරයාට අමතරව පර්පචුඅල් ට්‍රෙෂරීස් හිමිකරු අර්ජුන් ඇලෝෂියස්, එහි ප්‍රධාන විධායක නිලධාරී කසුන් පලිසේන සහ රාජ්‍ය ණය දෙපාර්තමේන්තුවේ හිටපු අධෂ්‍යක්ෂ සරත්චන්ද්‍ර හට වරෙන්තු ලබා ගෙන අත් අඩංගුවට ගන්නා ලෙසයි නීතිපතිවරයා වැඩබලන පොලිස්පතිවරයාට වැඩි දුරටත් දැනුම් දී ඇත්තේ.