කොරෝනා වෛරස් අභියෝගයට මුහුණ දීම සඳහා ශ්‍රී ලංකාවේ සෞඛ්‍ය අංශ වලට ඇති හැකියාව ගැන විපක්ෂයේ ප්‍රබල මන්ත්‍රීවරයකු සැක පළ කර තිබේ.
වත්මන් රජය ආණ්ඩු කල පසුගිය මාස කිහිපයක තුල මෙරට සෞඛ්‍ය අංශ බරපතල ලෙස කඩා වැටුන බවයි මංගල සමරවීර මන්ත්‍රීවරයා පෙන්වා දෙන්නේ.
“විශේෂයෙන්ම මේ කොරෝනා වෛරසය මේ අභියෝගය ලංකාවටත් මුහුණ දෙන්නට වෙන්නේ අපේ සෞඛ්‍යය සේවය පසුගිය මාස කිහිපය ඇතුළතදී කවදාවත් නොදුටු විදියට මහා කඩා වැටීමකට ලක්වෙලා තියෙනවා. අද රෝහල් වල බෙහෙත් නැහැ. එදා අපි ජනතාවට ලබා දුන් බෙහෙත් යලි වතාවක් ඒ සහන නැතිව අධික මිලට ලබා දෙනවා. එදා අපි ජනතාවට ලබා දුන් විවිධ කාච ඇතුළු හැම දෙයක්ම නොමිලේ ලබා දුන් හැමදෙයක්ම නැති කරලා ඇත්ත වශයෙන්ම පසුගිය මාස තුන ඇතුළත වසර 5කට ආසන්න කාලයක් තුළදී අපි ක්‍රමානුකූලව ගොඩ නැගූ සෞඛ්‍යය සේවය යලි වතාවක් මහා කඩාවැටීමකට ලක්වෙලා තියෙනවා. අන්න ඒ වගේ මොහොතකයි අපි කොරෝනා වෛරසයේ අභියෝගයට මුහුණ දෙන්න යන්නේ.”
විදේස් රට වල සිටින ශ්‍රී ලාංකිකයන් හට කොරෝනා වෛරසය ආසාදනය නොවේවැයි පතන මන්ත්‍රීවරයා වැඩි කල් නොගොස් ලංකාවටත් එම වෛරස ඇතුල්වීමේ භායනක තත්ත්වය තේරුම් ගත යුතු බවටයි අනතුරු අඟවන්නේ.
“අන්න ඒ නිසා වර්තමාන රජය මේ සම්බන්ධයෙන් සාකච්ඡා කරලා තියෙනවාද? ඒ වගේම මේ වසංගතය ලංකාව තුළ ඇති වුනහොත් ඒ සම්බන්ධයෙන් ගන්නා වූ ක්‍රියා මාර්ග මොනවාද ? ඒ වගේම ඒ වසංගතය සඳහා අපගේ රොහල් ආදිය සුදානම්ද කියන දේ සම්බන්ධයෙන් රටේ ජනතාවට විශාල ප්‍රශ්නයක් තියෙනවා.” යි මන්ත්‍රීවරයා පවසයි.
එබැවින් රජය මේ සම්බන්ධයෙන් ගන්නා ක්‍රියාමාර්ග වහාම රටට හෙළි කළ යුතු බවයි මංගල සමරවීර මන්ත්‍රීවරයා වැඩි දුරටත් ඉල්ලා සිටින්නේ.
Facebook Comments
