රටට ගැලපෙන නව ව්‍යවස්ථාවක් සකස් කිරීම සදහා ඉදිරි මැතිවරණයේදී ශ්‍රී ලංකා පොදු ජන පෙරමුණට “පැහැදිලි බලයක්” ලබා දෙන ලෙස එම පෙරමුණේ නිර්මාතෘවරයා ජනවතාවගෙන් ඉල්ලා සිටී.
පොහොට්ටු පක්ෂය ලෙස ජනතාව අතර ප්‍රචලිත ශ්‍රී ලංකා පොදු ජන පෙරමුණට එම මැතිවරණයේදී පැහැදිලි බලයක් දිනා ගැනීමට නොහැකි වුවහොත් නව ව්‍යවස්ථාවක් නිර්මාණය කිරීමේදී “ප්‍රාණ ඇපකරුවන්” වීමට සිදු වන බවයි ජනපති, අගමැති සොයුරු බැසිල් රාජපක්ෂ පවසන්නේ.
“හොඳ ව්‍යවස්ථාවක් හදන්න පැහැදිලි බලයක් දෙන්න නැත්නම් එක එක්කෙනාගේ අතකොළු බවට අපි ප්‍රාණ ඇප කාරයෝ වෙනවා ව්‍යවස්ථාව හදන්න ගිහිල්ලා.”
කොරෝනා වෛරසය ශ්‍රී ලංකාවෙන් තුරන් කිරීමේ දී ජන ජීවිතය යථා තත්ත්වයෙන් පවත්වාගෙන යාම සඳහා අවශ්‍ය වන්නා වූ සේවාවන් අඛණ්ඩව සැපයීම, මෙහෙයවීම සම්බන්ධීකරණය සහ පසුවිපරම පිණිස වූ ජනාධිපති කාර්ය සාධක බලකායේ ප්‍රධානී මෙන්ම ශ්‍රී ලංකාවේ හා ඇමරිකාවේ ද පුරවැසි භාවය හිමි බැසිල් රාජපක්ෂ එම ඉල්ලීම සිදු කළේ ජුනි 8 බදාදා නෙලුම් මාවත කාර්යාලයේ පැවැති විශේෂ මාධ්‍ය හමුවකට එක්වෙමිනි.
පසුගිය රජය විසින් විධායක ජනාධිපති ධුරයේ බලතල අඩු කරමින් ගෙන ආ 19 වන ව්‍යවස්ථා සංශෝධනයේදීත් සිදු වු ඉරණම සිහිපත් කරන හිටපු අමාත්‍යවරයකුද වන බැසිල් රාජපක්ෂ අවධාරණය කළේ එසේ නොවන හොඳ ව්‍යවස්ථාවක් සකස් කර ගැනීම රටට අවශ්‍ය බවයි.
මෛත්‍රීපාල සිරිසේන , රනිල් වික්‍රමසිංහ ජනපති, අගමැති සුසංයෝගයෙන් යුත් යහපාලන රජය ද රට පුරා ජනතා අදහස් විමසමින් නව ව්‍යවස්ථාවක් නිර්මාණ කිරීම සදහා යෝජනා ලබා ගත්තේය.
එම අදහස් වලින් සකස් කරන ලද අවසන් යෝජනාවලියක් පාර්ලිමේන්තුවට ඉදිරිපත් කරනු ලැබුවද නව ව්‍යවස්ථාවක් සකස් කිරීමට යහපාලන රජය අපොහොසත් විය.
Facebook Comments
