ශ්‍රී ලංකාවේ යුද්ධයේ අවසාන කාල පරිච්ඡේදය තුල මියගිය ලෙස සැලකෙන ජන සමූහය පිළිබඳව රජයේ ගණන් බැලීම් ඇතුළු විවිධ සංඛ්‍යාලේඛන සම්බන්ධ ජාත්‍යන්තර සමාලෝචනයක් එලි දක්වා තිබේ.
යුද අපරාධ සහ මානව වර්ගයාට එරෙහි අපරාධ චෝදනා සම්බන්ධයෙන් ශ්‍රී ලංකාවේ වගඋත්තරකාරිත්වය පිළිබඳ යෝජනාවක් එක්සත් ජාතීන්ගේ මානව හිමිකම් මණ්ඩලයේ සාමාජික රටවල් අතර සාකච්ඡා කෙරෙමින් පවතින අතරවාරයේ මෙම සමාලෝචනය එළිදක්වා ඇත්තේ යැස්මින් සූකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විසිනි.
දෙමළ යුද පීඩිතයන් ජගත් කොමිසමින් ඉල්ලා සිටින්නේ ශ්‍රී ලංකාවේ යුද්ධයේ මානව විනාශය පිලිබඳ සත්‍යය හෙළි කරගැනීමට ආණ්ඩුව මේතාක් අසමත් වී ඇති හෙයින් ඒ වෙනුවෙන් ජාත්‍යන්තර පරීක්ෂණයක් පවත්වන ලෙසයි.
එක්සත් ජාතීන්ගේ මැදිහත්වීම ප්‍රතික්ෂේප කරන ආණ්ඩුව විසින් පසුගිය දොළොස් අවුරුද්දකට වැඩි කාලයක් තිස්සේ ප්‍රසිද්ධියේ ප්‍රකාශ කරමින් සිටින්නේ යුද්ධය යනු කිසිදු නිරායුද වැසියකුට හානි නොකළ මානුෂික මෙහෙයුමක් බවයි.
“ශ්‍රී ලංකාවේ 2009 යුද්ධයෙන් හානිපත් වුවන්ගේ සංඛ්‍යා” යනුවෙන් සිංහල, දෙමළ හා ඉංග්‍රීසි තෙබසින් වගුගත කොට ඇති එහි ආණ්ඩුව විසින් මහත් උනන්දුවෙන් උපුටා දක්වන එවක බ්‍රිතාන්‍ය මහකොමසාරිස් කාර්යාලයේ ආරක්ෂක උපදේශක විසින් යවන ලද ටෙලෙක්ස් පණිවිඩයක දැක්වෙන පරිදි ඒ වර්ෂයේ ජනවාරි සහ අප්‍රේල් අතර මියගිය ගණන හත්දහස ඉක්මවයි.
ITJP සමාලෝචනයේ දැක්වෙන පරිදි එක්සත් ජාතීන්ගේ සංවිධානය ඇතුළු දේශීය හා ජාත්‍යන්තර සංවිධාන විසින් ගණන් බලා ඇති පරිදි යුද්ධයේ අවසානය වනවිට මරුමුවට පත් වී ඇති සාමාන්‍ය වැසියන් සංඛ්‍යාව 40,000ත් ලක්ෂයත් අතර වෙයි.
Facebook Comments
