පොලිස් වෙඩි පහරින් මරා දමන ලද යාපනය සරසවි සිසුන් දෙදෙනාගේ මරණයට ශෝකය පළ කරමින්,එයට වගකිවයුත්තන්ට වහාම නීතිය ක්‍රියාත්මක කොට සාධාරණයක් සිදුකරන ලෙස ඉල්ලා අද (25දා) උතුරු පළාත පුරා හර්තාලයක් ක්‍රියාත්මක කර ඇත.
යාපනය, කිලිනොච්චිය, මුලතිව්, මන්නාරම හා වවුනියාව දිස්ත්‍රික්කවල පිහිටි සියලු වෙළෙඳසැල් වසා දමා තිබූ අතර, උතුරු පළාතේ බස් ධාවනයද නවතා දමා මෙම හර්තාලය ක්‍රීයාත්මක බව සිලෝන් ජර්නල්ස් වාර්තාකරුවන් පවසයි.
උතුරේ පිහිටි සෑම නගරයකම නගර මධ්‍යයේ පිහිටි පාසල් සියල්ලක්ම වසා දමා තිබුණු අතර, පාසල් පැමිණි ඇතැම් පාසල් සිසුන් හා ආචාර්යවරුන් පාසල් වසා දැමීම නිසා යළි නිවෙස් කරා ගමන් කරන අයුරු දැකගන්නටද ලැබිණි.
එමෙන්ම යාපනය සරසවියේ සහ වවුනියාව මණ්ඩපයේ කළුකොඩි ඔසවා විරෝධතාවය පළ කරන බව අප වාර්තාකරුවන් සඳහන් කරයි.
දෙමළ ජාතික සන්ධානයට අයත් පක්ෂ පහ සහ දෙමළ එක්සත් විමුක්ති පෙරමුණේ සාමාජිකයන් සමග සිවිල් සංවිධාන කිහිපයක් එක්ව යාපනයේදී පවත්වන ලද සාකච්ඡාවකින් අනතුරුව මෙසේ උතුරු පළාතේ හර්තාලයක් දියත් කිරීමට තීරණ කර තිබිණි
Facebook Comments
