සෞඛ්‍ය සම්පන්න ආහාර නිෂ්පාදනය සම්බන්ධයෙන් දැවැන්ත වැඩපිළිවෙලක් මේ වනවිට ක්‍රියාත්මක කරමින් තිබෙන බවත් තරුණ ප්‍රජව දියුණු තාක්ෂණය සමඟ කෘෂිකර්මාන්තයට දායක කර ගැනීම ආරම්භ කර තිබෙන බව ජනාධිපති කාර්යසාධක බලකායේ ආහාර නිෂ්පාදන ජාතික වැඩසටහන පවසයි.
අද (04) පැවැති මාධ්‍ය හමුවකට සහභාගී වෙමින් ජනාධිපති කාර්යසාධක බලකායේ ආහාර නිෂ්පාදන ජාතික වැඩසටහනේ ව්‍යාපෘති අධ්‍යක්ෂ විජේරත්න සකලසූරිය මේ බව ප්‍රකාශ කළේය.
ආහාර සුරක්ෂිතතාවය පිළිබඳව ජනාධිපතිතුමාගේ අවධානය යොමු වී ඇති බව පවසන ජනාධිපති කාර්යසාධක බලකායේ ආහාර නිෂ්පාදන ජාතික වැඩසටහන මීට පෙර ආහාර සුරක්ෂිතතාවය පිළිබඳව කිසිම සැළැස්මක් නොතිබු බවත් කාර්යසාධක බලකාය පසුගිය වසර දෙක තුළ සියලු ආයතන එක් කර පුද්ගලික අංශයද සමග කෘෂිකර්මය පිළිබඳව නිවැරැදි දිශානතියකට පැමිණ තිබෙන බව පෙන්වා දුන්නේය.
නිෂ්පාදනය ඉලක්ක කරගනිමින් පාරිබෝගික ජනතාව වුවමනා දේ සැපයීමයි තම අරමුණ බව පෙන්වා දෙන ජනාධිපති කාර්යසාධක බලකාය සෞඛ්‍ය සම්පන්න ආහාර නිෂ්පාදනය සම්බන්ධයෙන් දැවැන්ත වැඩපිළිවෙලක් මේ වනවිට ක්‍රියාත්මක කරමින් ඇති බව සහ ඒ සඳහා විශාල ඉල්ලුමක් තිබෙන බව අවධාරණය කළේය.
සෞඛ්‍ය සම්පන්න ආහාර පිළිබඳව විශාල ගැටළුව ඇති අතර වස විෂ නැති ආහර පිළිබඳව රටේ ආකල්පය වෙනස් වෙමින් පවතින බැවින් රටේ ජනතාවට සෞඛ්‍ය සම්පන්න ආහාර වේලක් ලබාදීමට අවශ්‍ය පදනම සැකසීම ජනාධිපති කාර්යසාධක බලකායේ ආහාර නිෂ්පාදන ජාතික වැඩසටහනේ අරමුණ බව එම වැඩසටහන පවසයි.
රටේ පවුල් ලක්ෂ 32ක් සෘජු හා වක්‍ර ලෙස කෘෂිකර්මාන්තයට සම්බන්ධ වී සිටින අතර තරුණ ප්‍රජව දියුණු තාක්ෂණය සමඟ කෘෂිකර්මාන්තයට දායක කර ගනිමින් ඔවුන් ව්‍යාපාරික කෘෂි කර්මාන්තයට උනන්දු කරලීමට කටයුතු කරනවා යැයි ද මාධ්‍ය හමුව අමතමින් විජේරත්න සකලසූරිය වැඩි දුරටත් කියා සිටියේය.
Facebook Comments
