සන්ඩේ ලීඩර් පුවත් පතේ ආරම්භක කතෘ ලසන්ත වික්‍රමතුංගගේ සිරුර නැවත ගොඩගෙන දෙවැනි වරට සිදුකළ පශ්චාත් මරණ පරීක්ෂණය අවසන් කර එහි වාර්තාව අපරාධ පරීක්ෂණ දෙපාර්තමේන්තුව වෙත භාර දී තිබේ.
ඒ අනුව අපරාධ පරීක්ෂණ දෙපාර්තමේන්තුව ලසන්ත වික්‍රමතුංග ඝාතනය හා සම්බන්ධ තොරතුරු රැසක් මේ වනවිට අනාවරණය කරගෙන ඇති බව ආරංච් මාර්ග පවසයි.
ලසන්ත වික්‍රමතුංගගේ මරණය සම්බන්ධව නැවත පශ්චාත් මරණ පරීක්ෂණයක් සිදුකළ යුතු බව ගල්කිස්ස අධිකරණයට කරුණු දක්වා තිබූ අපරාධ පරීක්ෂණ දෙපාර්තමේන්තුව, මහේස්ත්‍රාත් අවසරය මත මීට සති කිහිපයකට පෙර ලසන්ත වික්‍රමතුංගගේ මෘත දේහය යළි ගොඩගනු ලැබිණි.
නැවත වරක් පශ්චාත් මරණ පරීක්ෂණයක් සිදු කිරීම තුළින් අපරාධ පරීක්ෂණ දෙපාර්තමේන්තුවට හෙළි කර ගැනීමට අවශ්‍ය වූ කරුණු ගණනාවක් තිබු අතර ලසන්ත වික්‍රමතුංග ඝාතනයට යොදාගෙන තිබුණේ කුමන ආයුධයක්ද යන්න හෙළිකර ගැනීම විශේෂ කරුණක් විය.
මෙම මෘත දේහය ගොඩගෙන පරීක්ෂණ සිදු කිරීමෙන් අනතුරුව එම මෘත දේහය මිහිදන් කිරීම සඳහා ඥාතීන් වෙත භාර දී ඇති බවද වාර්තා වෙයි.
ලසන්ත වික්‍රමතුංගගේ දේහය පිළිබඳ නැවත පශ්චාත් මරණ පරීක්ෂණයක් සිදුවන අතරතුර මෙම ඝාතනය තමා සිදු කෙළේ යැයි ලිපියක් ලියා තබා හමුදා බුද්ධි අංශයේ හිටපු සාජන් මේජර්වරයකු දිවි හ‍ානි කර ගත්තේය.
හිටපු කතෘ ලසන්ත වික්‍රමතුංග ඝාතනයට ලක්වූයේ 2009 වසර්දීය. එතැන් සිට ඔහුගේ ඝාතනයට අදාළව කිසිදු සැකකරුවකු අත්අඩංගුවට ගෙන නොතිබුණි. වසර හයකට පසු යුද්ධ හමුදා බුද්ධි අංශයේ සාමාජිකයන් අත්අඩංගුවට ගත්තේය.
Facebook Comments
