වධහිංසා කිරීම ගැන ශ්‍රී ලංකා සහ බ්‍රිතාන්‍ය ආණ්ඩුවලට නඩු (VIDEO)

0
Ivory Agency Sri Lanka
wedding people

මෛත්‍රී රනිල් පාලනය යටතේ මේ වසරේත් දෙමළ පුද්ගලයකු හිතුමතේ අත් අඩංගුවට ගෙන වධ හිංසා පැමිණවීම සම්බන්ධයෙන් ශ්‍රී ලංකාවේ රජයට එරෙහිව බ්‍රිතාන්‍ය අධිකරණයක නඩු පැවරීමට ජාත්‍යන්තර මානව හිමිකම් සංවිධානයක් පියවර ගනිමින් සිටී.

බ්‍රිතාන්‍යයේ දේශපාලන රැකවරණ ලද රේණුකාරූබන් වේලායුදපිල්ලෙයි විවාහ වීම පිණිස ශ්‍රී ලංකාවට ගිය මේ වසරේ ජූනි මුල පොලිසිය විසින් නිවෙසට කඩා වැදී රැගෙන ගොස් රඳවාගෙන වද දුන් බවට චෝදනා කරමින් නඩු පැවරීමට රිඩ්රෙස් (REDRESS) සංවිධානය කටයුතු කරමින් සිටින බව මානව හිමිකම් නීතිඥ කුලසේකරම් ගීතරත්නම් ගගන ට හෙළි කළේය.

පුද්ගලයකු පැහැරගෙන ගොස් වධ හිංසා පැමිණවීම මේ අවුරුද්දේත් සිදුවූ බවට අලුතින් තවත් සාක්ෂි මෙසේ එළිවී ඇත්තේ ලබන සතියේ සිට මාසයක් ජිනීවා නුවර මුළුදෙන වධහිංසාවට එරෙහි එක්සත් ජාතීන්ගේ කමිටුව ශ්‍රී ලංකාව පිළිබඳවද විශේෂ පුනරීක්ෂණයක යෙදීමට නියමිතව තිබියදීය.

බ්‍රිතාන්‍යයටත් නඩු

එක්සත් රාජධානියේ පුරවැසියකු වන වධයට පත් රේණුකාරූබන් ශ්‍රී ලංකාවේ අඩන්තේට්ටමට ලක්වී සිටියදී ඔහුගේ ආරක්ෂාව වෙනුවෙන් මැදිහත් නොවීමේ චෝදනාවට බ්‍රිතාන්‍ය විදේශ අමාත්‍යංශයට එරෙහිවද නඩු පැවරෙනු ඇති බවයි නීතිඥ ගීතරත්නම් කියා සිටියේ.

නීතිවේදීන්ගෙත්, මානව හිමිකම් ක්‍රියාධාරීන්ගේත්  මැදිහත්වීමෙන් අනතුරුව නිදහස් වී පෙරලා ලන්ඩනය බලා පැමිණි රේණුකාරූබන් පරීක්ෂා කළ බ්‍රිතාන්‍ය රජයේ වෛද්‍ය විශේෂඥයන් නිගමනය කොට ඇත්තේ ඔහුගේ මොළයට හානි සිදුවී ඇති බවයි.

අත් අඩංගුවේදී වධ දීම නිසා තම සොහොයුරාගේ හිසට, මුහුණට, උඩුකයට හා දකුණු කකුලට තුවාල වී ඇති බව කී නැගණිය ලලිතරූබී වේලායුදපිල්ලේ ඔහුට එරෙහිව සිදු කෙරුනු හිංසනය ගගන සමග විශේෂ සාකච්ඡාවකට එක්වෙමින් විස්තර කළාය.

renukaruban

ජූලි මස මුලදී බ්‍රිතාන්‍යය බලා පැමිණි වහාම ප්‍රතිකාර ලබා ගැනීමට ගිය ඊලින් රජයේ රෝහලින් රේණුකාරූබන් සම්බන්ධයෙන් ලබාදුන් වෛද්‍ය වාර්තාවේ සඳහන් වන්නේ “අත් අඩංගුවේ පහර කෑමෙන් සිදුවූ කැපුම් තුවාල ගණනාවක් සහ ලේ පිරි තැලුම්,” ඇති බවයි.

උන්හිටි තැන අහිමි වී

උතුරේ යුද්ධයෙන් තම මුල් ගම වන පලාලිය අතහැර එන්නට සිදුවූ වේලායුදපිල්ලෙයි පවුල 1990 සිට පදිංචිවී සිටින්නේ වරණි ප්‍රදේශයේයි.

එල්ටීටීඊ සාමාජිකයකු ලෙස සැක කෙරුනු රේනුකාරූබන් රජයේ ආරක්ෂක අංශ වල අඩන්තේට්ටමට පත්වෙතැයි බියෙන් රට හැර පලාවිත් ඇත්තේ 2000 දීය.

දේශපාලන රැකවරණ ලැබීමෙන් අනතුරුව ඔහුට 2013 දී බ්‍රිතාන්‍ය පුරවැසි භාවය ලැබී තිබේ.

ඔහුගේ නැගණිය ලලිතරූබී ද යුද්ධයෙන් වසරකට පසු බ්‍රිතාන්‍යයට පලා ඇවිත් තිබෙන්නේ ආරක්ෂක අංශ විසින් දෙවාරයක්ම අත් අඩංගුවට ගැනීමෙන් අනතුරුවය.

ඇය පවසන පරිදි ජූනි දෙවැනිදා සවස් යාමයේ ගෙදරට කඩා වැදී සිය සොහොයුරා රැගෙන ගොස් ඇත්තේ කොඩිකාමම් පොලිසියෙනි.

ජාත්‍යන්තර බලපෑම්

ඔහු පැහැරගෙන යාම පිළිබඳව ජනාධිපති උපදේශක හා නැගෙනහිර ආණ්ඩුකාර ඔස්ටින් ප්‍රනාන්දු සහ යාපනය ආඥාපති මේජර් ජෙනරාල් මහේෂ් සේනානායක ඇතුළු රජයේ බලධාරීන්ගෙන් ජාත්‍යන්තර මානව හිමිකම් සංවිධාන විසින් විමසා තිබේ.

බ්‍රිතාන්‍ය විදේශ අමාත්‍යාංශයටත්, ඇම්නස්ටි ජාත්‍යන්තරයටත් පැහැර ගැනීම පිළිබඳව දැනුම් දී ඇති අතර රේනුකාරූබන් අත් අඩංගුවේ ඉන්නා බව පිලිගැනීමට ඔස්ටින් ප්‍රනාන්දුට සිදුවූ බව ලලිතරූබී ගේ නීතිඥ මෙලනි දිසානායක පවසයි.

යාපනය බන්ධනාගාරයේ  වධ හිංසනයෙන් බරපතල තුවාල ලද රේණුකාරූබන් වේලායුදපිල්ලෙයි ජූනි හත් වැනිදා යාපනය රෝහලට ඇතුල් කර තිබේ.

එල්ටීටීඊ සබඳතා

දිසානායක නීතිඥවරිය විසින් කර ඇති ප්‍රකාශනයක දැක්වෙන පරිදි හිරගෙදරදී රේණුකාරූබන්ට වධහිංසා පමුණුවා ඇත්තේ එල්ටීටීඊ සබඳතා සහ අත් අඩංගුවට ගැනීම පිළිබඳව ජාත්‍යන්තර සංවිධාන දැනුවත් කිරීම ගැන විමසමිනි.

ඔප්පු කළ නොහැකිවූ චෝදනා නගා ජූනි 17 දක්වා රක්ෂිත බන්ධනාගාර ගත කෙරුනු රේණුකාරුබන් වේලායුදපිල්ලෙයි වෙනුවෙන් නීතිඥ ඇන්ටනි පුනිදනායගම් පෙනී සිටීමෙන් අනතුරුව නිදහස්වී ආපසු බ්‍රිතාන්‍යය බලා පැමිණ ඇත්තේ ජූලි හතර වැනිදායි.

රජයේ ආරක්ෂක අංශ සහ පොලිසිය මේ රජය යටතේත් වධහිංසා පමුණුවන බව ජාත්‍යන්තර මානව හිමිකම් සංවිධාන මෙන්ම ශ්‍රී ලංකාවේ මානව හිමිකම් කොමිසම ද එක්සත් ජාතීන් ට සවිස්තර වාර්තා ලබාදී  තිබේ.

ජිනීවා සමුළුව

ශ්‍රී ලංකාව සම්බන්ධ එම වාර්තා ජිනීවාහිදී සාකච්ඡාවට ගැනෙන වධහිංසාවට එරෙහි එක්සත් ජාතීන්ගේ කමිටුවේ 59 වැනි සමුළුවට රජය  නියෝජනය කරමින් නීතිපති ජයන්ත ජයසුරියගේ ප්‍රධානත්වයෙන්, නිව්යෝර්ක් නුවර ශ්‍රී ලංකාවේ එක්සත් ජාතීන්ගේ නිත්‍ය නියෝජිත ආචාර්ය රොහාන් පෙරේරා, ජිනීවා නුවර ශ්‍රී ලංකාවේ එක්සත් ජාතීන්ගේ නිත්‍ය නියෝජිත රවිනාථ ආර්යසිංහ, අතිරේක සොලිසිටර් ජනරාල් සරත් ජයමාන්න, නියෝජ්‍ය සොලිසිටර් ජනරාල් නෙරීන් පුල්ලේ, ජිනීවා නුවර ශ්‍රී ලංකා නියෝජ්‍ය නිත්‍ය නියෝජිත සමන්තා ජයසූරිය, පොලිස් නීති අංශයේ නියෝජ්‍ය පොලිස්පති අජිත් රෝහණ, ජාතික ආරක්ෂක මධ්‍යස්ථානයේ අධ්‍යක්ෂ සිසිර මෙන්ඩිස්, ජිනීවා නුවර ශ්‍රී ලංකා නියෝජිත කාර්යාලයේ ශෂිකා සෝමරත්න, ජිනීවා නුවර ශ්‍රී ලංකා නියෝජිත කාර්යාලයේ දිලිනි ගුණසේකර සහ ජිනීවා නුවර ශ්‍රී ලංකා නියෝජිත කාර්යාලයේ එම් එල් එෆ් මෆුසා සහභාගී වන බව රජය විසින් දැනුම් දී තිබේ.

(සේයා: ෆීලික්ස් ක්ලේ)

(Radio gagana)

Facebook Comments