‘යහපාලනය එළිපිටම හොරු රකින’ බවට සගයන්ගෙන්ම චෝදනා

නීතිය හා සාමය භාර අමාත්‍යවරයා දුරකතන ඇමතීමකින් පොලිස්පතිවරයාට බලපෑම් කිරීම ජනමාධ්‍ය මගින් ප්‍රසිද්ධියට පත්වීමත් සමග ‘යහපාලන රජය එළිපිටම හොරු රකින බව’ හෙළිවී ඇතැයි මේ රජය බලයට පත් කිරීමට වෙහෙසුනු දූෂණ විරෝධී සංවිධානයක් පවසයි.

ප්‍රසිද්ධ රැස්වීමක් පැවැත්වෙන අවස්ථාවක පොලිස්පති පූජිත් ජයසුන්දර හට දුරකතනයෙන් කතාකොට සාගල රත්නායක ඇමති වරයා විමසා ඇත්තේ මහා පරිමාණ දුෂණ චෝදනා ගණනාවක් සම්බන්ධයෙන් විමර්ශන සිදු කෙරෙන දෙවිනුවර බස්‌නායක නිලමේ දිශාන් වික්‍රමරත්න ගුණසේකර සම්බන්ධයෙන් බවයි දුෂණ විරෝධී පෙරමුණ පවසන්නේ.

රුපියල් ලක්ෂ 55 ක වාහන කුලියට ගැනීමක්, සේවකයන් 39 ක් වෙනත් රාජකාරි කටයුතු සදහා යෙදවීම, ඉදි නොකළ කම්හලක් වෙනුවෙන් භාණ්ඩ මිලදී ගැනීම ඇතුළු චෝදනා ගණනාවකට විමර්ශන සිදුවන අවස්ථාවක පොලිස්පති පූජිත ජයසුන්දර ට බලපෑම් එල්ලවීම තුලින්  එම තත්වය හෙළිවී ඇති බවයි   එම සංවිධානයේ  උපදේශක රජිත් කීර්ති තෙන්නකෝන් ඒ බව පැවසුයේ 05 සදුදා දින  රාජගිරියේ පැවති පුවත්පත් සාකච්ඡාවක දී ය.

පසුගියදා රත්නපුර සීවලී ක්‍රීඩාංගනයේ දී රුපවාහිනී කැමරා ඉදිරියේ පොලිස්පති පුජිත ජයසුන්දර දුරකතන ඇමතුමකට පිළිතුරු දෙමින් සහතික වී සිටියේ ‘නිලමේ’ නමැත්තා පොලිස් මුල්‍ය අපරාධ කොට්ටාසය විසින් අත් අඩංගුවට නොගන්නා බවයි.

කීර්ති තෙන්නකෝන් පවසන පරිදි ‘නිලමේ’ හෙවත් දිශාන් ගුණසේකර 2010 සිට 2015 ජනවාරි 8 දක්වා ලංකා මිනරල් සෑන්ඩ් හි සභාපති හා ක්‍රියාකාරී අධ්‍යක්ෂ වරයායි.

ඔහුට එරෙහිව මේ වන විට  විමර්ශන ගණනාවක් සිදු වන අතර ඔහු   ලංකා බැංකුව මගින් රු. මිලියන 500 ක ණයක් ලබා ගෙන මිනරල් සෑන්ඩ් සමාගම සදහා කර්මාන්ත ශාලාවක් ඉදිකරන බව පවසා භාණ්ඩ ආනයනය කර තිබේ.

නමුත් කිසි දිනෙක  අලුත් කර්මාන්ත ශාලාවක් සකසා නොමැති අතර මේ වන විට එම  භාණ්ඩ දිරායන බව රජිත්  කීර්ති තෙන්නකෝන්ගේ චෝදනාවකි.‍

නමුත්  2015 ජනවාරි 6 දින මැතිවරණය දින දෙකකට පෙර මෙම ණය මුදල පියවා සභාපතිවරයා ගෙදර ගොස් ඇති බවයි දුෂණ විරෝධී පෙරමුණෙ  එහිදී පවසා සිටියේ.

මිනරල් සෑන්ඩ් සමාගම සතු රුපියල් මිලියන 40 හම්බන්තොට බීච් පාක් එකක් සෑදීමට ලබා දුන් අතර එයින්  මුලින් මිලියන 30 ක් සහ  පසුව තවත් මිලියන10 ක්  නාගරික සංවර්ධන අධිකාරියට ලබා දී ඇත.

නාමල් රාජපක්ෂ

මුදල් ඉල්ලා සිටියේ පාර්ලිමේන්තු මන්ත්‍රී  නාමල් රාජපක්ෂ විසින් බව සදහන් කළ කීර්ති තෙන්නකෝන් චෝදනා කර සිටියේ  එම මුදල්වලට සිදුවූ  දේ සම්බන්ධයෙන්  මේ වන විට  පොලිස් පරීක්ෂණ පවතින බවයි.

ලංකා මිනරල් සෑන්ඩ් සමාගමේ දුෂණ එතැනින් අවසන්  නොවු බව සදහන් කරන දුෂණ විරෝධී පෙරමුණ සදහන් කරන්නේ ජනාධිපති කාර්යාලයේ පරිහරණයට අවශ්‍ය බව පවසමින් පුද්ගලික වාහන දෙකක් කුළී පදනම මත ව්‍යාජ ලේඛන ඉදිරිපත් කොට ලබා ගෙන ඇති බවයි.

“ජනාධිපති කාර්යාලයේ ‘අමිල’ නම් පුද්ගලයකු මාසිකව රු. 140,000 ක චෙක්පත අරගෙන ගිහින් තියෙන්නේ. මේ ව්‍යාජ සේවා ගිවිසුමෙන් රජයට සිදු කොට ඇති පාඩුව රු. පනස් ලක්ෂ අනු හතර දහස් හයසීයයි. (මිලියන 5.5 යි). ලේඛණ වල දැක්වෙන්නේ පීඩී 2199 (2012 මාර්තු 29 සිට 2014 දෙසැම්බර් දක්වා), කේබී 5303 (2011.04.26 සිට 2014 ජූලි දක්වා) ලබාගත් බවට ව්‍යාජ ලේඛන ඉදිරිපත් කළා.මොහුට වත්කම් බැරකම් ප්‍රකාශ ලබා දී නෑ කියලා චෝදනාවක් තිබුණා”. කීර්ති තෙන්නකෝන් එහිදී  වැඩි දුරටත් පැවසීය.

මහින්ද රාජපක්ෂට වැඩ

මිනරල් සේවකයන් 39 ක් ප්‍රධාන කාර්යාලයෙන් පිටත දේවාලයක කටයුතු සදහා යොදවා ඇති බවට සඳහන් වුවත් සැබවින්ම ඔවුන් කර ඇත්තේ 2015ජනාධිපතිවරණයේ මහින්ද රාජපක්ෂ ගේ මැතිවරණ ප්‍රචාරක කටයුතු බවයි දුෂණ විරෝධි පෙරමුණ පවසන්න්නේ.

නීතිඥ එස්.කේ. ලියනගේ ඒක  පුද්ගල විනිශ්චය සභාව ඒ සම්බන්ධයෙන්  පොලිස් මුල්‍ය අපරාධ කොට්ඨාශයට පැමිණිළි කිරීමට උපදෙස් දුන් අතර  දැන් ඒ විමර්ශන සිදු වන විට මෙවැනි බලපෑම්  එල්ල වන බවයි ඔහු පෙන්වා දෙන්නේ.

ආණ්ඩුව පැහැදිලිවම මහා පරිමාණ හොරු රකින තැනකට ගොස් ඇති බව  මේ සිදුවීමෙන් පෙනෙන්න බව සදහන් කරන දුෂන විරෝධි පෙරමුණේ උපදේශකවරයා සදහන් කර සිටියේ “දැන් හොරු රකින්නේ කවුද කියා හොදටම පැහැදිලි” බවයි.

මාධ්‍ය හමුව සදහා  පුජ්‍ය උලපනේ සුමංගල හිමි, පළාත් සභා මන්ත්‍රී නිශාන්ත වර්ණසිංහ හා චමීර පෙරේරා යන අය ද එක්ව තිබේ.