ගාලු මුවදොර සාමකාමී විරෝධතාකරුවන්ට ආරක්ෂක අංශ විසින් අද අලුයම එල්ල කල ප්‍රහාරය තරයේ හෙළා දකින බව ශ්‍රී ලංකා මානව හිමිකම් කොමිෂන් සභාව එම ප්‍රහාරය ගැන විමර්ශනයක් ආරම්භ කර තිබේ.
මෙම ප්‍රහාරය ජනතාවගේ මූලික අයිතිවාසිකම් කඩ කිරීමක් බව පවසන මානව හිමිකම් කොමිසම සිද්ධියට සම්බන්ධ සියල්ලන් වහා නීතිය හමුවට ගෙන ආ යුතු බව මෙන්ම ඔවුන්ට එරෙහිව ක්‍රියාමාර්ග ගත යුතු බව ද අවධාරණය කරයි.
ජනාධිපති කාර්යාලය ඉදිරිපිට ගෝඨා ගෝ ගම විරෝධතා භූමියට 22 අලුයම ඇතුලු වු සන්නද්ධ හමුදා භට පිරිස් එහි සිටි විරෝධතාකරුවන්ට පහර දී පළවා හැරි බවටයි අරගලකරුවන් චෝදනා කරන්නේ.
මේ අතර ජනාධිපති ලේකම් කාර්යාලයේ දොරටුව අත්පත් කරගෙන සිටි අරගලකරුවන් අද අලුයම සිදු කළ මෙහෙයුමකින් අනතුරුව ඉවත් කිරීමට කටයුතු කළ බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ නිහාල් තල්දූව නිවේදනය කළේය.
එහිදී පුද්ගලයන් නව දෙනකු අත්අඩංගුවට ගෙන ඇති අතර තවත් නවදෙනකු තුවාල ලබා රෝහල් ගතකර ඇතැයි මාධ්‍ය ප්‍රකාශකවරයා පවසා තිබේ.
මෙම මෙහෙයුමේදී බීබීසී වීඩියෝ මාධ්‍යවේදියෙකුට හමුදාව විසින් පහර දී ඇති අතර එක් සොල්දාදුවෙක් ඔහුගේ දුරකථනය උදුරා ගෙන ඔහු වීඩියෝගත කළ දර්ශන මකා දමා ඇත.
එම අවස්ථාවේ සජීව දර්ශන ලබාදෙමින් සිටි බීබීසී දෙමළ සේවයේ ජෙරින් සැමුවෙල් ; ඔවුන් BBC මාධ්‍යවේදීන් බව පුන පුනා ප්‍රකාශ කරමින් තිබියදී හමුදා නිලධාරින්ගේ පහර කෑමට ලක්වන ආකාරය සජීව දර්ශන වල සටහන්ව තිබේ.
හමුදා භටයන් විසින් පැහැරගත් ගත් මාධ්‍යවේදීන් වන කසුන් කුමාර හා චතුරංග ප්‍රදීප් දෙදෙනා පහරදී මහමග දමා ගොස් සිටියදී හමු වී ඇත.
කොල්ලුපිටිය සිනමන් හෝටලය ආසන්නයේදී සන්නද්ධ භටයන් විසින් අත්අඩංගුවට ගෙන ඇති නමුත් ඔවුන් කිසිදු පොලිස් ස්ථානයකට භාරදී නැති බව වාර්තා විය. පසුව කළ සොයාබැලීමකදී ඔවුන් අමානුෂික ලෙස පහර එල්ල කර මහමග දමා ගොස් ඇති බව වාර්තා විය.
Facebook Comments
