දහතුන් වසරකට ඉහතදී සිය සමීපතමයන්ට අත් කර දුන් ඉරණම හෙළිකර දීමට මේතාක් අසමත් වු අතුරුදහන් වූ තැනැත්තන් පිළිබඳ කාර්යාලය සිය ප්‍රදේශයෙන් ඉවත්කරගන්නා ලෙස ඉල්ලමින් මන්නාරමේදී විරෝධතාවයක් දියත් කර තිබේ.
මන්නාරමේ පිහිටුවා තිබෙන අතුරුදහන්වු තැනැත්තන් පිළිබද ප්‍රාදේශිය කාර්යාලය ඉදිරිපිටදී ඔක්තෝබර් 31 වැනි සදුදා විරෝධතා දියත් කළ බලහත්කාරයෙන් අතුරුදහන් කළ මන්නාරම දිස්ත්‍රික්කයේ පවුල් වල ඥාතීන් දැඩිව අවධාරණය කළේ සිය සමීපතමයන් වෙනුවෙන් ජාත්‍යන්තර යුක්තිය අපේක්ෂා කරන බවයි.
යුක්තියක් නොමැති රටක අතුරුදහන් වූ තැනැත්තන් පිළිබඳ කාර්යාලය (OMP) කුමකටදැයි ප්‍රශ්න කළ ඔවුන් වැඩි දුරටත් ඉල්ලා සිටියේ මන්නාරමේ ස්ථාපිත කර තිබෙන ප්‍රාදේශිය කාර්යාලය වහාම ඉවත්කරගන්නා ලෙසයි.
අතුරුදහන් කළ අයකු වෙනුවෙන් රුපියල් ලක්ෂ දෙකක වන්දි මුදලක් ගෙවීමට පසුගියදා කැබිනට් මණ්ඩලය ගත් තීන්දුවට දැඩි විරෝධතාවය පළ කරන යුද පීඩිත මන්නාරමේ දෙමළ මව්වරුන් එහිදී ආණ්ඩුවට අවධාරණය කලේ තම සමීපතමයන් පිළිබදව විස්තර ලබා දෙන්නේනම් තමන් සතුව පවතින ඉඩකඩම් හෝ විකුණා ආණ්ඩුවට ලක්ෂ හතරක මුදලක් ලබා දීමට සුදානම් බවයි.
පුද්ගලයකු අතුරුදන් වූ බව තහවුරු වුවහොත්, අතුරුදහන් වූ බවට සහතිකයක් ලබාගැනීමේ අවශ්‍යතාවය ඉවත් කරමින්, කලින් ගෙවීමට තීන්දු කළ ලක්ෂයක මුදල රුපියල් ලක්ෂ දෙකක් දක්වා වැඩි කිරීමට කැබිනට් මණ්ඩලය අනුමැතිය ලබාදී ඇති බව අමාත්‍ය බන්දුල ගුණවර්ධන පසුගියදා ප්‍රකාශ කර තිබුනි.
අතුරුදහන් බවට පැමිණිලි කරන ලද අය අතරින් 50 දෙනකු පමණ විදේශ ගතවී සිටින බවට අනාවරණය වී ඇතැයි OMP සභාපති මහේෂ් කටුලන්ද රොයිටර්ස් මාධ්‍ය ආයතනයට සිදු කළ ප්‍රකාශය ද ප්‍රශ්න කරන දෙමළ මව්වරුන් විරෝධතාවය අතරතුරදී OMP සභාපතිට අභියෝග කලේ ඔවුන් සිටින ස්ථාන පිළිබදව වහාම හෙළි කරන ලෙසයි.
බහලත්කාරයෙන් අතුරුදහන් කරනු ලැබු එකදු අයෙක් හෝ සොයා දීමට අපොහොසත්ව ඇති අතුරුදහන් වූ තැනැත්තන් පිළිබඳ කාර්යාලය (OMP) මන්නාරමට පමණක් නොව මුළු රටටම අනවශ්‍ය බව විරෝධතාකරුවන් තව දුරටත් අවධාරණය කළ බව පළාත් බද වාර්තාකරුවෝ පවසති.
ආණ්ඩුව මේ වසරේ මාර්තු මසදී නිවේදනය කර ඇති පරිදි මාතර, මන්නාරම, යාපනය, මඩකලපුව සහ කිලිනොච්චි යන ප්‍රදේශවල ස්ථාපිත කර තිබෙන OMP ප්‍රදේශිය කාර්යාල වෙත අතුරුදහන් වීම් සම්බන්ධයෙන් ලැබී ඇති පැමිණිලි ගණන 14988 කි.
Facebook Comments
