පලාත් පාලන මැතිවරණය සම්බන්ධ පෙත්සම් ත්‍රිත්වයක් ශ්‍රේෂ්ඨාධිකරණයේ දී විභාගයට ගනු ලැබුවා.
ඉන් පෙත්සම් දෙකකට අදාළව තීන්දු ලබා දුන් අධිකරණය අනෙක් පෙත්සමේ විභාගය තවදුරටත් කල් දමන ලදී.
මාර්තු 9 වැනි දා පැවැත්වීමට නියමිත පළාත් පාලන මැතිවරණයේ සියලු කටයුතු බලරහිත කරන ලෙස ඉල්ලා විශ්‍රාමික කර්නල් ඩබ්ලිව්. එම්. කේ. විජයසුන්දර ගොනුකර තිබූ රීට් පෙත්සම යළි සලකා බැලීම පෙබරවාරි 23 දක්වා කල් දැමීමට ශ්‍රේෂ්ඨාධිකරණය තීරණය කළේය.
රටේ බරපතල ආර්ථික අර්බුදයක් පවතින අවස්ථාවක සහ ජාත්‍යන්තර මූල්‍ය අරමුදල බරපතල කොන්දේසි පනවා ඇති මෙම අවස්ථාවේ මැතිවරණයක් පැවැත්වීම සුදුසු නොවන බවට සමාජය තුළ මතයක් නිර්මාණය වී ඇති බව පෙන්වා දෙමින්, ඡන්ද විමසීමේ කටයුතු අත්හිටුවීමේ රිට් ආඥාවක් මැතිවරණ කොමිසම වෙත නිකුත් කරන ලෙසයි එම පෙත්සමෙන් ඉල්ලා ඇත්තේ.
මේ අතර ඉහත කී පෙත්සම විභාගයට නොගෙන නිෂ්ප්‍රභ කරන ලෙස ඉල්ලා සමගි ජන බලවේගයේ ප්‍රධාන ලේකම් පාර්ලිමේන්තු මන්ත්‍රී රංජිත් මද්දුමබණ්ඩාර සහ පාර්ලිමේන්තු මන්ත්‍රී මහාචාර්ය ජී.එල් පීරිස් විසින් පෙත්සම් ගොනු කරනු ලැබූ පෙත්සම ද අද (10) විභාගයට ගැනුණා.
එහි දී අදාල පෙත්සම සලකා බලමින්, ශ්‍රේෂ්ඨාධිකරණ විනිසුරු එස්.තුරෙයිරාජා, ඒ.එච්.එම්.ඩී.නවාස් සහ ශිරාන් ගුණරත්න යන විනිසුරුවරු මඩුල්ල විසින් ප්‍රකාශ කළේ, ජනතාවගේ අයිතියක් වන, සර්ව ජන ඡන්ද බලය ආරක්ෂා කිරීමේ වගකීම ඇත්තේ, මැතිවරණ කොමිෂන් සභාවට වන බැවින් සහ මැතිවරණ කොමිෂන් සභාව නිසි ආකාරව පවත්වන බවට මැතිවරණ කොමිෂන් සභාව තම අධිකරණය හමුවේ ප්‍රතිඥාවක් දී ඇති බැවින් ඒ සම්බන්ධයෙන් අධිකරණයට නියෝග නිකුත් කිරීමේ අවශ්‍යතාවක් නොමැති බව යි.
එම ප්‍රතිඥාව සම්බන්ධයෙන් සෑහීමකට පත්වන බව පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සහ ජනාධිපති නීතිඥ සංජීව ජයවර්ධන අධිකරණය හමුවේ සඳහන් කර ඇත.
ඒ අනුව එළඹෙන මාර්තු මස 9 වැනි දින පැවැත්වීමට සැළසුම් කර තිබූ පළාත් පාලන මැතිවරණය නියමිත පරිදි පැවැත්වීමට ශ්‍රී ලංකා මැතිවරණ කොමිසමට ශ්‍රේෂ්ඨාධිකරණය විසින් උපදෙස් දුන් අතර පළාත් පාලන මැතිවරණය නීත්‍යනුකූලව පැවැත්වීමට ජාතික මැතිවරණ කොමිසම දැනටමත් භාරගෙන ඇති නිසා ඒ සම්බන්ධයෙන් නියෝග අවශ්‍ය නොවන බැවින් පෙත්සම් විභාගය අවසන් කිරීමට ශ්‍රේෂ්ඨාධිකරණය විනිසුරු මඩුල්ල තීන්දු කළේය.
Facebook Comments
