අවුරුදු හයක් ගතවීත් ප්‍රසිද්ධියට පත්කර නැති 2018 දිගන මුස්ලිම් විරෝධී ප්‍රචණ්ඩ ක්‍රියා පිළිබඳ ශ්‍රී ලංකා මානව හිමිකම් කොමිසමේ විමර්ශන වාර්තාව එළිදැක්වීමට පියවර ගන්නා මෙන් කතානායකවරයාට ඉල්ලීමක් ඉදිරිපත් වී තිබේ.
ස්වාධීන කොමිසන් සභා පත් කරන ව්‍යවස්ථාදායක සභාවේ සභාපති වන කතානායකවරයාගෙන් සමගි ජන බලවේගයේ පාර්ලිමේන්තු මන්ත්‍රී මුජිබුර් රහුමාන් අද එම ඉල්ලීම කළේ විමර්ශන වාර්තාව නිකුත් කර නැති බව ‘කන්ද උඩරට මුස්ලිම් විරෝධී කැරැල්ලට අවුරුදු 6 යි: යුක්තිය කෝ?’ වාර්තා චිත්‍රපටයෙන් හෙළිදරව් කිරීමෙන් අනතුරුවයි.
“මානව හිමිකම් කොමිසන් සභාව 2018 දී ඇතිවෙච්ච දිගන සිද්ධිය සම්බන්ධව පරීක්ෂණයක් කළා. දැන් අවුරුදු හයක් වෙනවා. ඒකෙ වාර්තාව තාම ඉදිරිපත් කරලා නෑ. ඒ හින්දා මම ඔබතුමාගේ අවධානය යොමුකරනවා ඒ ගැන සොයාබලා ඒ වාර්තාව ඉදිරිපත් කරන්න කියලා,” යි රහුමාන් මන්ත්‍රීවරයා කියා සිටියේය.
වාර්තාව මෙතෙක් එළිදක්වා නැතිබව විමර්ශනය මෙහෙයවූ කොමිසමේ හිටපු සභාපතිනි ආචාර්ය දීපිකා උඩගම මෙන්ම කොමිසමේ වර්තමාන කොමසාරිස් ආචාර්ය ගෙහාන් ගුණතිලකද පිළිගෙන තිබේ.
මේ වසර තුලදී වාර්තාව නිකුත් කිරීමට අපේක්ෂා කරන බව ආචාර්ය ගුණතිලක වාර්තා චිත්‍රපටය තිරගත කිරීමෙන් අනතුරුව බීබීසී ය කළ විමසීමකදී කියා සිටියේය.
Facebook Comments
