අරගල කඩාකප්පල් කිරීම සඳහා වරදාන දීමට ගුරු සංගමයෙන් අභියෝගයක්

වෘත්තීය සමිති ක්‍රියාමාර්ග මර්දනය කිරීමේ අරමුණින්, වැඩ වර්ජනයකට සහාය පළ නොකළ සීමිත රාජ්‍ය සේවකයන් පිරිසකට වැටුප් වර්ධකයක් ලබා දීමට අතීතයේ උගත් පාඩම් අමතක කර ජනපති ගත් තිරණය අභියෝගයට ලක් කිරීමට දිවයිනේ ප්‍රමුඛතම ගුරු සංගමයක් තීරණය කර තිබේ.

රාජ්‍ය සේවයේ සමිති ගණනාවක් ජූලි 8, 9 දෙදින දියත් කළ වෘත්තීය අරගලයට සම්බන්ධ නොවී සේවයට වාර්තා කළ විධායක සේවා ගණයට අයත් නොවන සියලු රාජ්‍ය නිලධාරීන්ට විශේෂ වැටුප් වර්ධකයක් ලබා දීමටත්, ඔවුන් සියලුම දෙනා වෙත ඉදිරි උසස්වීම් සඳහා යොදාගත හැකි වන පරිදි විශේෂ ප්‍රශංසා සහතිකයක් නිකුත් කිරීමටත් ජනාධිපති රනිල් වික්‍රමසිංහ ඉදිරිපත් කළ යෝජනාවට අමාත්‍ය මණ්ඩල අනුමැතිය දී ඇත.

2024 වසරේ ජුලි 8 සහ 9 යන දෙදින තුළ වෘත්තිය සමිති 200 ට වැඩි ප්‍රමාණයක එකඟතාවයෙන් සමස්ත රාජ්‍ය සේවයේ දැවැන්ත වැඩ වර්ජනයක් පැවති අතර, සියලුම ගුරුවරු, විදුහල්පතිවරු, ගුරු උපදේශකවරු සහ පිරිවෙන් ගුරුවරු ඊට සමාන්තරව ජුලි 09 දින අසනීප නිවාඩු වාර්තා කිරීමට කටයුතු කළේය.

එහෙත් ආණ්ඩුවේ වරදින් ප්‍රමාද වූ සාමාන්‍ය පෙළ විභාගයේ සෞන්දර්ය ප්‍රායෝගික පරීක්ෂණ පමණක් සිසු දරුවන් වෙනුවෙන් පැවැත්වීමට ගුරු වෘත්තීය සමිති තීරණය කළ අතර, අනෙකුත් සමස්ත ගුරුවරු අසනීප නිවාඩු වාර්තා කිරීමට කටයුතු කර තිබුනි.

ලංකා ගුරු සංගමය චෝදනා කරන්නේ සමස්ත රාජ්‍ය සේවයේ මෙම දැවැන්ත වෘත්තීය ක්‍රියාමාර්ගය ඉදිරියේ වැඩකරන පන්තියේ වැටුප් ඉල්ලීම් ලබාදීම වෙනුවට ආණ්ඩුව එදින සේවයට පැමිණි අතලොස්සට වැටුප් වර්ධක දීමනාවක් ලබාදීමට අමාත්‍ය මණ්ඩල අනුමැතියක් ලබා දී ඇති බවයි.

ජෝසප් ස්ටාලින් ගුරු සංගම් නායකයා පවසන පරිදි කැබිනට් මාධ්‍ය ප්‍රකාශක බන්දුල ගුණවර්ධන අමාත්‍යවරයා ජුලි 9 වැනි දින සේවයට පැමිණි ගුරුවරුන්ට පමණක් 3-1 ශ්‍රේණියේ ගුරුවරයෙකුට රු.525/- ක්, 2-1 ශ්‍රේණියේ ගුරුවරයෙකුට රු.1335/- ක් හා 1 ශ්‍රේණියේ ගුරුවරයෙකුට රු.1630/-ක වැටුප් වර්ධකයක් විශ්‍රාම වැටුපට බලනොපාන ලෙස ලබාදෙන බව ප්‍රකාශ කර තිබේ.

ගුරු-විදුහල්පති හා සමස්ත වැඩ කරන පන්තියේ ඉල්ලීම් නොසලකා හැර මෙසේ වරදාන වෙනුවෙන් වැටුප් වර්ධක දීමනාවක් ලබාදීමට ලංකා ගුරු සංගමය දැඩි විරෝධය පළකර සිටි.

ලංකා ගුරු සංගමයේ ප්‍රධාන ලේකම් ජෝසප් ස්ටාලින්ගේ අත්සනින් යුතුව ජුලි 11 වැනිදා නිකුත් කළ මාධ්‍ය නිවේදනයක් මගින් මතක් කර දී ඇත්තේ 1986 වසරේ මාර්තු 18 සිට අප්‍රේල් 6 දින දක්වා පැවති හෙද වැඩ වර්ජනයේ දී එම වැඩවර්ජනයට සහභාගි නොවී අඛණ්ඩව සේවයට පැමිණි හෙදියන්ට වැටුප් වර්ධක දෙකක් සහ කඩින් කඩ සේවයට පැමිණි හෙදියන්ට වැටුප් වර්ධක එකක් ලබාදීමට එවකට පැවති රජයේ කැබිනට් මණ්ඩලය තීරණය කළ බවයි.

එම කැබිනට් තිරණය අධිකරණය හමුවේ බලරහිත වු ආකාරයද ජ්‍යෙෂ්ඨ ගුරු සංගම් නායනයා සිය මාධ්‍ය නිවේදනය මගින් වැඩි දුරටත් පෙන්වා දී තිබේ.

“ඊට එරෙහිව රාජ්‍ය සේවා එක්සත් හෙද සංගමය කේ 4/87 අංකයෙන් ශ්‍රේෂ්ඨාධිකරණයට ගොනු කරන ලද පෙත්සම විභාග කළ විනිසුරු වනසුන්දර, විනිසුරු එල්.එච්. ද අල්විස්, විනිසුරු සෙනෙවිරත්න යන විනිසුරුවරු විසින් එම කැබිනට් තීරණය ශූන්‍ය හා බලරහිත බව ප්‍රකාශ කර ඇත. ආණ්ඩුක්‍රම ව්‍යවස්ථාවේ 12 වන වගන්තියේ අඩංගු සමානාත්මතාව පිළිබඳ විධිවිධාන උල්ලංඝණය වන බව ප්‍රකාශ කරමින් මෙම තීරණය ලබා දී ඇත.”

ශ්‍රී ලංකාවේ වෘත්තිය සමිති ක්ෂෙත්‍රයේ වැඩ වර්ජන මෙහෙයවා හසල දැනුමක් ඇති ගුරු නායක ජෝසප් ස්ටාලින් සිය නිවේදනය මගින් තව දුරටත් පෙන්වා දෙන්නේ එම අධිකරණ තීරණයේ වැඩිදුරටත් සඳහන්ව ඇත්තේ ආණ්ඩුක්‍රම ව්‍යවස්ථාවේ 55(5) ව්‍යවස්ථාව මගින් ලබාදී ඇති බලය අනුව මූලික මිනිස් අයිතිවාසිකමක් උල්ලංඝණය වන අවස්ථාවකදී කැබිනට් තීරණයක් සම්බන්ධයෙන් එවැනි තීරණයක් ලබාදීමට ව්‍යවස්ථාමය අධිකරණ බලයක් ශ්‍රේෂ්ඨාධිකරණය පවරා ඇති බවයි.

“ජනබලයක් නොමැති රනිල් වික්‍රමසිංහ ආණ්ඩුව විසින් ජුලි 8-9 වර්ජනය නොකළ රාජ්‍ය සේවකයන්ට වරදානයක් ලෙස ලබාදෙන බවට තීරණය කර ඇති වැටුප් වර්ධකය ලබාදුනහොත් මෙම පෙර අධිකරණ තීරණය අනුව” ලංකා ගුරු සංගමය ශ්‍රේෂ්ඨාධිකරණයට පෙත්සමක් ගොනු කිරීමට කටයුතු කරන බව ජෝසප් ස්ටාලින් ගුරු සංගම් නායකයා ජනාධිපතිවරයාට වැඩි දුරටත් අනතුරු අඟවා තිබේ.