අයිතීන් දිනා ගැනීම සදහා වැඩ කරන ජනතාව සතුව ඇති ප්‍රධානතම සංවිධාන ව්‍යුහය විසුරුවා හැරීමට නව ආණ්ඩුවේ ඇති සුදානම ප්‍රකාශයට පත්ව තිබේ.
අනුර කුමාර දිසානායක ජනාධිපතිවරයාගේ නායකත්වය යටතේ පවතින ජාතික ජන බලවේගයේ පාර්ලිමේන්තු මන්ත්‍රීධුර අපේක්ෂකයකු ජන හමුවකදී ප්‍රසිද්ධියේ හෙලි කොට ඇත්තේ තම පක්ෂය යටතේ ඇති වෘත්තිය සමිති අකුලා දමන බවයි.
ජාතික ජන බලවේගයේ කොළඹ දිස්ත්‍රික් පාර්ලිමේන්තු මන්ත්‍රීධුර අපේක්ෂක ලක්ෂ්මන් නිපුණ ආරච්චි පවසන පරිදි එහි අරමුණ ‘වැඩ වර්ජන වලින් තොර රටක්’ නිර්මාණය කිරීමයි.
“අද මං කිව්වා කියලා හිතේ තියාගන්න. ඒ ස්ට්‍රයික් ඉතිහාසය නැති වෙනවා ඉස්සරහට. කාට විරුද්ධවද ස්ට්‍රයික් කරන්නේ. තව කාලයක් යනකොට අපි ඉස්සෙල්ලාම අපි මේ පක්ෂේ පැත්තෙන් තියන වෘත්තිය සමිති විසුරුවා හරිනවා. ඉවරයිනේ මොකටද මේ වෘත්තිය සමිති ඕන් නැ.”
කුමක් හෝ ප්‍රශ්නයක් පවතීනම් ආණ්ඩුව සමග කතා කර බේරා ගත හැකි බව පවසන හිටපු පාර්ලිමේන්තු මන්ත්‍රීවරයා කැස්බෑව, බෝකුන්දර ප්‍රදේශයේ ඔක්තෝබර් 31 වැනිදා පැවැති ජන හමුවක් අමතමින් වැඩි දුරටත් පවසා තිබුනේ ඉදිරියේදී රටේ දරුවන්ට වැඩ වර්ජන සහ ඇදිරිනීතිය යනු කුමක්දැයි කියා දීමට සිදු වන බවයි.
“දැන් අද උපදින දරුවන්ට කවදාහරි ඒ ළමයින්ට කියලා දෙන්න වෙනවා පුතේ ස්ට්‍රයික් එකක් කියන්නේ මේකයි. ඇදිරිනීතිය කියලා දෙන්න වෙනවා. පුතේ ඇදිරිනීතිය කියන්නේ මෙහෙම එකක් කියලා.”
ඇඳිරි නීතිය පැනවීම සම්බන්ධ නීති රෙගුලාසිද හකුලාගන්නේදැයි හිටපු මන්ත්‍රී නිපුනආරච්චි ප්‍රකාශ කළේ නැතැයි ප්‍රදේශයේ වාර්තාකරුවෝ පවසති.
Facebook Comments
