තිස් හතර වසරක් තිස්සේ යුද හමුදාව විසින් පොදු ගමනාගමනයට තහංචි පනවා තිබුණු උතුරේ ප්‍රධාන මාර්ගයක් විවෘත කළ බවට ප්‍රචාරය කරමින් එම පාරේ වැඩි කොටසක් දිගටම වසා තැබීම ප්‍රදේශවාසී ජනයාගේ කලකිරීමට හේතුවී තිබේ.
ජනාධිපති මාධ්‍ය ඒකකය නොවැම්බර් 1 වැනි සිකුරාදා නිවේදනය කර ඇත්තේ ජනාධිපති අනුර කුමාර දිසානායක ගේ උපදෙස් පරිදි පලාලි – අච්චුවේලි ප්‍රධාන මාර්ගය දශක තුනකට පසු විවෘත කිරීමට කටයුතු කළ බවයි.
අලුත් රාජ්‍ය නායකයාගේ නිවේදනය පල කෙරුනේ උතුරේ බිම්කඩක් නාවික හමුදාවට අත්පත් කරගැනීමට දැරූ උත්සාහයක් ප්‍රදේශයේ ජනතා නියෝජිතයන් හා එක්ව ප්‍රදේශවාසීන් විසින් පසුබස්වා තුන් දිනකිනි.
1990 වසරේ යුද හමුදාව විසින් අධි ආරක්ෂිත කලපයක් ලෙස නම් කරමින් වසා දමන ලද පලාලි – අච්චුවේලි මාර්ගයේ, වසාවිලාන් මධ්‍ය විදුහල අසල සිට වසාවිලාන් හන්දිය දක්වා වු කිලෝ මීටර් එකයි කාලක පමණ ප්‍රදේශයක් සහ වසාවිලාන් හන්දියේ සිට අච්චුවේලි යන මාර්ගයේ වල්ලෙයි අරාලි පාරේ මිටර් 613 ක් පමණක් අද දිනයේ විවෘත කර ඇති බවයි පළාත් බද වාර්තාකරුවන් පවසන්නේ.
වලිගාමම් උතුර ප්‍රාදේශීය සභාවේ හිටපු සභාපති සෝමසුන්දරම් සුගීර්දන් පවසන පරිදි ප්‍රදේශවාසි ජනයාට සිය අවශ්‍යතා වෙනුවෙන් රාජ්‍ය ආයතන වෙත ප්‍රවේශවීමට අද විවෘත වු මාර්ගයෙන් පහසුකම් සැලසෙන්නේ නැත.
“වල්ලෙයි සිට අරාලි මාර්ගයේ වාසාවිලන් හන්දියේ සිට කට්ටුවාන් හන්දිය දක්වා කිලෝමීටර් දෙක හමාරක් වහලා තියනවා. පලාලි මාර්ගයේ වසාවිලන් හන්දියේ සිට පලාලි හන්දිය දක්වා කිලෝමීටර් තුන හමාරක් වහලා තියනවා.”
මාර්ගය විවෘත කිරීමෙන් ප්‍රදේශයේ ජනයාට සෙතක් සිදු විමට නම් වාසවිලාන් හන්දියේ සිට කට්ටුවාන් හන්දිය දක්වා වන කිලෝමීටර් දෙක හමාරක් විවෘත කළ යුතු බව පෙන්වා දෙන ප්‍රාදේශිය නායකයා බලධාරීන්ගෙන් ඉල්ලා සිටින්නේ මාර්ගයේ ඉතිරි කොටසද කඩිනමින් විවෘත කරන ලෙසයි.
“වසාවිලාන් හන්දියේ සිට කට්ටුවාන් හන්දිය දක්වා වන කිලෝමීටර් දෙක හමාරක් විවෘත කළොත් විතරයි පොදු ජනතාවට ප්‍රයෝජනවත් වෙන්නේ. එතකොට තමයි නැවත පදිංචි වූ ජනතාවට තෙල්ලිප්පලෙයි ඉස්පිරිතාලෙට, ප්‍රාදේශිය ලේකම් කාර්යාලයට, ප්‍රාදේශීය සභාව ඇතුළු තැන් වලට යන්න පුළුවන් වෙන්නේ.”
ජනාධිපති මාධ්‍ය ඒකකය පවසන්නේ යුද්ධය අවසන් වී වසර 15කට වැඩි කාලයක් ගතවී ඇතත් මෙතෙක් මහ ජනතාවට විවෘත නොවු මාර්ගය විවෘත කිරීම සම්බන්ධයෙන්, ජනාධිපති අනුර කුමාර දිසානායක සහ ආණ්ඩුකාරවරුන් අතර පසුගිය ඔක්තෝබර් 22වෙනිදා පැවති සාකච්ඡාවේදී, උතුරු පළාත් ආණ්ඩුකාර නාගලිංගම් වේදනායගම් ද ජනාධිපතිවරයාගෙන් ඉල්ලීමක් සිදු කළ බවයි.
“ඒ අනුව මෙම මාර්ගය විවෘත කිරීම සම්බන්ධයෙන් පවතින ආරක්ෂක තත්ත්වය පිළිබඳ සොයා බලා අදාළ කටයුතු සිදු කරන ලෙස ජනාධිපති අනුර කුමාර දිසානායක මහතා ආරක්ෂක අංශවලට දැනුම් දුන් අතර ආරක්ෂක අමාත්‍යාංශයේ හා ආරක්ෂක ලේකම්වරයාගේ මැදිහත්වීමෙන් මෙම මාර්ගය විවෘත කිරිමට පියවර ගැනිණි,” යි ජනාධිපතිගේ මාධ්‍ය අංශය වැඩි දුරටත් නිවේදනය කර තිබේ.
රජයේ ආරක්ෂක සේනා විසින් අවහිර කොට තිබෙන ගොඩබිම් සහ මුහුදු ප්‍රවේශ මාර්ග නිදහස් කරදෙන ලෙස උතුරු නැගෙනහිර ජනතාව දශක එකහමාරකට වැඩි කලක් අරගල කරමින් සිටිති.
Facebook Comments
