ගංවතුර මරණ සංඛ්‍යාව තවත් ඉහලට

දිවයිනට බලපා ඇති අධික වැසි සහිත කාලගුණ තත්වය හමුවේ රට පුරා පීඩාවට පත් ජනතාව අතුරින් අඩකටත් වැඩි සංඛ්‍යාවක් නැගෙනහිර පළාතෙන් වාර්තා වෙද්දී, මරණ සංඛ්‍යාව 12 දක්වා ඉහළ ගොස් තිබේ.

ආපදා කළමනාකරණ මධ්‍යස්ථානය නොවැම්බර් 28 වැනි බ්‍රහස්පතින්දා පස්වරු හතරට නිකුත් කළ දෛනික තත්ව වාර්තාවට අනුව රටේ දිස්ත්‍රික්ක 24 ක් තුළ පවුල් 113052 ට අයත් පුද්ගලයන් 377511 ක් බලපෑමට ලක්ව සිටි.

ඔවුන් අතුරින් ආරක්ෂිත ස්ථාන 311 ක් තුළ පවුල් 10431 ට අයත් පුද්ගලයන් 32695 ක් රදවා තිබේ.

අධික වර්ෂාවෙන් වැඩිම බලපෑමට ලක්වු නැගෙනහිර පළාතේ පවුල් 62473 ට අයත් පුද්ගලයන් 207366 ක් පීඩාවට පත්ව සිටින අතර අම්පාර දිස්ත්‍රික්කයේ පමණක් පවුල් 43631 ට අයත් පුද්ගලයන් 149491 ක් පීඩාවට පත්ව සිටිති.

මඩකලපුව දිස්ත්‍රික්කයේ පවුල් 15900 ට අයත් පුද්ගලයන් 49123 පීඩාවට පත්ව සිටින අතර නැගෙනහිර පළාතේ පමණක් ආරක්ෂිත ස්ථාන 103 ක් තුළ පවුල් 4501 ට අයත් පුද්ගලයන් 12962 ක් රදවා සිටින බවයි ආපදා කළමනාකරණ මධ්‍යස්ථානය පවසන්නේ.

ත්‍රිකුණාමලය දිස්ත්‍රික්කයේ ද පවුල් 2942 ට අයත් පුද්ගලයන් 8752 ක් පීඩාවට ලක්ව සිටි.

මහ වැසි හේතුවෙන් දිවයිනේ දෙවැනියට වැඩිම බලපැමක් එල්ල වී ඇත්තේ උතුරු පළාතේ මන්නාරම දිස්ත්‍රික්කයටයි.

එම දිස්ත්‍රික්කයේ පවුල් 18642 ට අයත් පුද්ගලයන් 61297 ක් පීඩාවට පත්ව සිටින ආරක්ෂිත ස්ථාන 73 ක 2690 පවුල් ට අයත් පුද්ගලයන් 8702 ක් රදවා සිටි.

උතුරු පළාතේ යාපනය දිස්ත්‍රික්කයේ ද පවුල් 12970 ට අයත් පුද්ගලයන් 43682 ක් පීඩාවට පත්ව සිටින ඔවුන් අතුරින් ආරක්ෂිත ස්ථාන 66 ක 1634 පවුල් ට අයත් පුද්ගලයන් 5793 ක් රදවා සිටි.

ආපදා කළමනාකරණ මධ්‍යස්ථානය පවසන්නේ මහ වැසි හේතුවෙන් උතුරු පළාතේ බලපෑමට පත්ව ඇත්තේ පවුල් 37385 ට අයත් පුද්ගලයන් 123640 ක පිරිසක් බවයි.

ඊට කිලිනොච්චිය දිස්ත්‍රික්කයේ පුද්ගලයන් 8006ක්, මුලතිව් දිස්ත්‍රික්කයේ පුද්ගලයන් 7108 ක් හා වව්නියාව දිස්ත්‍රික්කයේ පුද්ගලයන් 3547 ක් ද ඇතුලත්ය.

ආපදා කළමනාකරණ මධ්‍යස්ථානය වැඩි දුරටත් පවසන්නේ කොළඹ දිස්ත්‍රික්කයේ පුද්ගලයන් 6521 ක්, ගම්පහ දිස්ත්‍රික්කයේ පුද්ගලයන් 5277, බදුල්ල දිස්ත්‍රික්කයේ පුද්ගලයන් 2952 ක් සහ කුරුණැගල දිස්ත්‍රික්කයේ ද පුද්ගලයන් 2640 ක් පීඩාවට ලක්ව සිටින බවයි.