මහවැසි මායිම් නොකර උතුරු නැගෙනහිර දෙමළ මහවිරු සමරු මෙවරත් පැවැත්වේ

උතුරු නැගෙනහිර දෙපළාතේ දහස් සංඛ්‍යාත ජනතාවගේ දෛනික ජීවිතයට මහත් බාධා ගෙන දෙමින් ඇද හැලුනු ධාරානිපාත වර්ෂාව නොසලකා හරිමින් එම දෙපළාතේ දෙමළ ජනයා ස්ථාන රැසකම මලින්, ගඳින්, පහනින් සහ කදුලින් යුද්ධයේදී ඝාතනයට ලක් වු සිය සමීපතමයන් අනුස්මරණය කිරීමට කටයුතු කර තිබේ.

යුද වැදී දිවිදුන් දෙමළ සටන්කාමීන් වෙනුවෙන් නොවැම්බර් 27 දා මාවීරර් නාල් (மாவீரர் நாள்) ලෙසින් දෙමළ ඊළාම් විමුක්ති කොටි සංවිධානය විසින් නම්කරන ලද්දේ 1989 දීය. ඒ එයින් සත් වසරකට ඉහතදී ශ්‍රී ලංකා යුද හමුදාවට එරෙහි සටනේදී මියගිය පළමු LTTE සාමාජිකයා වන ලුතිනන් ශංකර් නමින් ප්‍රකට සුරේෂ් සත්‍යනාදන් වෙනුවෙනි.

ශ්‍රී ලංකා යුද හමුදාව සමග සටන් වැදී දිවි තොරවූ නෑසියන් අනුස්මරණය කිරීමේ ආරම්භය සනිටුහන් කරමින් නොවැම්බර් 27 වැනිදා පස්වරු හයයි හතට උතුරු, නැගෙනහිර දෙපළාතේ මහවිරු සුසාන භූමි තුළ මහවිරු සමරු ප්‍රදීපයන් දල්වා තිබුනේ යුද බිමේදී සිය ලේ නැසියන් අහිමි වු මේ වන විට වයෝවෘධ සමයේ පසුවන මෑණිවරුන් හා පියවරුන් විසිනි.

පුද්ගලිකව සිදු කරන සැමරුම්වලට බාධා කිරීමට අයිතියක් නොමැති බවට නව රජයේ ස්ථාවරය වී තිබුනත් පළාත් බද වාර්තාකරුවන් පවසන්නේ උතුරු නැගෙනහිර පුරා මෙවරත් පෙරලෙසම පැවැතියේ සාමුහික මහවිරු අනුස්මරණ බවයි.

උතුරු නැගෙනහිර දෙපළාතේ මහවිරු සැමරුම් පැවැත්වීම සම්බන්ධයෙන් නව රජයේ ස්ථාවරය පැහැදිලි කරමින් කැබිනට් මාධ්‍ය ප්‍රකාශක අමාත්‍ය වෛද්‍ය නලින්ද ජයතිස්ස නොවැම්බර් 26 වැනි අගහරුවාදා සදහන් කර තිබුනේ පුද්ගලිකව සිදු කරන සැමරුම්වලට බාධා කිරීමට රජයට අයිතියක් නොමැති බවයි.

”යම් තැනක තමන්ගේ මිය ගිය ඥාතීන් සමරනවනම්, පුද්ගලිකව ඒකට බාධා කරන්න රජයට අයිතියක් නැහැ. ඥාතීන් සැමරීම කියලා කියන්නේ එකක්. එල්.ටී.ටී.ඊ හෝ වෙනත් ත්‍රස්තවාදී සංවිධානයක් ප්‍රවර්ධනය කිරීම කියලා කියන්නේ තව එකක්. ඒ නිසා කිසි සේත්ම ඔය දෙක පටලවා ගත යුතු නැහැ. අපි බෝහෝම පැහැදිලිව කියලා තියනවා ඥාතීන් සමරන්න ඒ ගොල්ලන්ට තියන අයිතියට ගරු කරන අතරේ වෙනත් ආකාරයට නීති විරෝධි සහ රජය විසින් තහනම් කරන ලද කිසිවකට අවස්ථාවක් ලැබෙන්නේ නැහැ.”

පළාත් බද වාර්තාකරුවන් පවසන පරිදි උතුරු නැගෙනහිර දෙපළාතේ පිහිටි මහවිරු සුසාන භුමි රැසකදීම යුද්ධයේදී ඝාතනයට ලක් වු තම සමීපතමයන් වන දෙමළ ඊලාම් විමුක්ති කොටි සාමාජිකයන් සාමුහික ලෙස සිහිපත් කිරීමට දෙමළ ජනයා කටයුතු කර තිබේ.

යාපනය කෝපායි, කොඩිකාමම්, සාට්ටි (තීවගම්) , උඩුතුරෙයි යන මහවිරු සුසාන භුමි තුලදී මෙන්ම යාපනය විශ්වවිද්‍යාලයේ හා උපවාසයේ යෙදී සිටියදී මිය ගිය එල්.ටී.ටී.ඊ සංවිධානයේ රාසයියා පාර්තිපන් හෙවත් ත්‍යාගී තිලීපන් සැමරීම සඳහා නල්ලුර් කන්දසාමි කෝවිල අසල ඉදිකර තිබු 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය සමීපයේ ද අනුස්මරණ 27 වැනිදා රාත්‍රියේදී සිදු කර ඇත.

යුද්ධයෙන් වැඩිම හානියට පත් මුලතිව් දිස්ත්‍රික්කයේ මුල්ලියාවලෙයි, මුල්ලිවයික්කාල්, දේවිපුරම්, ඉරනෙයිපාලෙයි, රෙට්ටෙයිවායික්කාල්, තේරාවිල්, වන්නිවිලාන්කුලම්, අලම්පිල් ඇතුළු මහවිරු සුසාන භුමි තුලදී මෙන්ම මුලතිව් මුහුදු තීරයේදී ද අනුස්මරණ පවත්වා තිබේ.

කිලිනොච්චි කනගපුරම්, ධර්මපුරම්, මුලංගාවිල් යන මහවිරු සුසාන භුමි තුළ මෙන්ම මන්නාරම ආට්කාට්ටිවේලි හා මන්නාරම පන්ඩිවිරිච්චාන් මහවිරු සුසාන භුමි තුලදී මලින්, පහනින් සහ කදුලින් යුද්ධයේදී ඝාතනයට ලක් වු සිය සමීපතමයන් අනුස්මරණය කිරීමට දෙමළ ජනයා කටයුතු කර ඇත.

යුද්ධයේදී ඝාතනයට ලක් වු සිය සමීපතමයන් වව්නියාව දිස්ත්‍රික්කයේ දෙමළ ජනයා අනුස්මරණය කර ඇත්තේ ඊච්චන්කුලම් සුසාන භුමියේදීය.

මඩකලපුව, මාවඩි මුන්මාරි හා තරවෙයි, පුලියන් කන්ඩලඩි මහවිරු සුසාන භුමි තුලදී මෙන්ම අම්පාර කන්ජිකුඩිච්චිආරු හා ත්‍රිකුණාමලය, මුතුර්හි ආලන්කුලම මහවිරු සුසාන භුමි තුලත්, එමෙන්ම නැගෙනහිර විශ්වවිද්‍යාලය තුලත් මහවිරු අනුස්මරණ පැවැති බව පලාත් බද වාර්තාකරුවෝ වැඩි දුරටත් පවසති.

ප්‍රජාතන්ත්‍රවාදී දෙමළ ජාතික සන්ධානයේ ( DTNA) වන්නි දිස්ත්‍රික් පාර්ලිමේන්තු මන්ත්‍රී ටෙලෝ නායක සෙල්වම් අඩෛක්කලනාදන් මන්නාරම පන්ඩිවිරිච්චාන් සුසාන භුමියේද, දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් අම්පාර කන්ජිකුඩිච්චිආරු සුසාන භුමියේද , දෙමළ ජාතික ජනතා පෙරමුණේ හිටපු පාර්ලිමේන්තු මන්ත්‍ර්‍රී සෙල්වරාජා ගජේන්ද්‍රන් මඩකලපුව තරවෙයි සුසාන භුමියේද, ඉලංගෙයි තමිල් අරසු කච්චි (ITAK) වන්නි දිස්ත්‍රික් පාර්ලිමේන්තු මන්ත්‍රී තුරෙයිරාසා රවිහරන් මුලතිව් අලම්පිල් සුසාන භුමියේද, එම පක්ෂයේ මඩකලපු දිස්ත්‍රික් පාර්ලිමේන්තු මන්ත්‍රී ශානක්කියන් රාසමානික්කම් පුලියන් කන්ඩලඩි සුසාන භුමියේද මහවිරුවන් අනුස්මරණය කරනු දැක ගත හැකි වු බව පළාත් බද වාර්තාකරුවෝ පවසති.

මහවිරුවන් ලෙස දෙමළ ජනයාගේ ගෞරවයට පාත්‍ර වන දසදහස් ගණනක් මිහිදන් කොට ඇති ‘තුයිලම් ඉල්ලම්’යනුවෙන් හැඳින්වෙන සුසාන භූමි ගණනාවක්ම රජයේ හමුදා විසින් විනාශ කොට කඳවුරු ඉදිකොට ඇති හෙයින් ජනතාවට අනුස්මරණ පවත්වන්නට සිදුවී තිබුනේ යාබද ඉඩම්වලය.

එල්.ටී.ටී.ඊ. පාලනය යටතේ පැවති දෙමළ ජනතාවගේ භූමි ප්‍රදේශ හමුදාව විසින් අත්පත් කර ගැනීමත් සමඟ, උතුරු සහ නැඟෙනහිර ප්‍රදේශවල මියගිය දෙමළ සටන්කාමීන්ගේ සොහොන් 20,400 ක් පමණ තිබූ සුසාන භූමි 25 කට ආසන්න ප්‍රමාණයක් ශ්‍රී ලංකා යුද හමුදාව විසින් ඩෝසර් කර සමරු පලක කඩා බිඳ දමා තිබේ.

හින්දු සංස්කෘතියේ කොටසක් වන මළවුන්ට ගෞරව දැක්වීම එක්සත් ජාතීන්ගේ සංවිධානය විසින් මූලික අයිතිවාසිකමක් ලෙස ද ප්‍රකාශයට පත් කර ඇත.