පෙඩරල් ඉල්ලීම වෙනුවෙන් සුමන්දිරන් පෙරට එයි

ශ්‍රී ලංකාව වෙනුවෙන් නව ආණ්ඩුක්‍රම ව්‍යවස්ථාවක් සකස් කිරීමේදී ෆෙඩරල් පාලනයක් ක්‍රියාත්මක කළ යුතු බවට උතුරේ ක්‍රියාත්මක පැරණි දේශපාලන පක්ෂයක් යළිත් වරක් ආණ්ඩුවට බල කර තිබේ.

1949 දෙසැම්බර් මස18 වැනිදා ආරම්භ කළ ඉලංගෙයි තමිල් අරසු කච්චි (ITAK) පක්ෂයට වසර 75 පිරිම නිමිත්තෙන් එහි ආරම්භක සභාපති තන්දෛ චෙල්වා (චෙල්වා පියාණන්) නමින් හදුන්වන සැමුවෙල් ජේම්ස් වේලුපිල්ලෙයි චෙල්වනායගම්ගේ යාපනයේ පිහිටි ස්මාරකය අභියසදී එම පක්ෂයේ ඉහළ පෙලේ නියෝජිතයන් අද දිනයේ උපහාර දක්වා තිබුනි.

එම අවස්ථාවට එක්ව සිටි, 13 වැනි ආණ්ඩුක්‍රම ව්‍යවස්ථා සංශෝධනය පූර්ණ වශයෙන් ක්‍රියාත්මක කර ගැනීම වෙනුවෙන් දිගටම පෙනී සිටි හිටපු පාර්ලිමේන්තු මන්ත්‍රී ජනාධිපති නීතිඥ එම්. ඒ සුමන්තිරන් මාධ්‍යවේදීන්ට කියා සිටියේ දෙමළ ජනතාවගේ අඛණ්ඩ ඉල්ලීම වුයේ ෆෙඩරල් පාලනයක් බවයි.

“1956 සිට අද දක්වා දෙමළ ජනතාවගේ අඛණ්ඩ තීන්දුව වන්නේ ෆෙඩරල් පාලන ක්‍රමයක් ස්ථාපිත කළ යුතු බවයි. එය ජනතාවගේ ප්‍රජාතන්ත්‍රවාදී තීන්දුවක්. එය දෙමළ ජනතාවගේ ප්‍රජාතන්ත්‍රවාදී තීරණයක්. ඒක අපිව ජාත්‍යන්තර වශයෙන් ජාතියක් ලෙස හදුනාගන්නා ජනතාවගේ ප්‍රජාතන්ත්‍රවාදී තීරණයක්.”

රටට නව ආණ්ඩුක්‍රම ව්‍යවස්ථාවක් නිර්මාණය කිරීමේදී, ෆෙඩරල් පාලන ක්‍රමයට රටේ පාලන ක්‍රමය වෙනස් කරන ලෙස උතුරු නැගෙනහිර දෙමළ ජනතාව දිගින් දිගටම සිදු කරන ඉල්ලීමට ගරු කරමින් කටයුතු කරන ලෙසත් හිටපු මන්ත්‍රීවරයා ජනාධිපතිවරයාගෙන් ඉල්ලා තිබුනි.

“ඉතින් අවුරුදු 75ක් පිරුණු මේ පක්ෂයේ ආරම්භක දිනය සමරන අද දවසේ අපි අලුත් ආණ්ඩුවටත් පණිවිඩයක් දෙනවා. ජාත්‍යන්තර නීතියේ එක ජන කොට්ඨාසයක් ලෙස හදුනන ජාතියක් අපි. අපේ ප්‍රජාතන්ත්‍රවාදී තීන්දුවට ගරු කළ යුතුයි. ඔබ බලයට පත් වූ වෙලාවේ නව ආණ්ඩුක්‍රම ව්‍යවස්ථාවක් නිර්මාණය කරන බවට පොරොන්දු උණා. අපගේ ඉල්ලීම වන්නේ එම පොරොන්දුව වහා ඉටු කළ යුතු බවයි. ඒක කරන කොට දීර්ඝ කාලීනව කිසිම පෙළඹවීමකින් තොරව ෆෙඩරල් පාලන ක්‍රමයට අපේ පාලන ක්‍රමය වෙනස් කළ යුතුයි කියන උතුරු නැගෙනහිර දෙමළ ජනතාවගේ මේ ප්‍රජාතන්ත්‍රවාදී තීන්දුවට ගරු කරලා ඒ පාලන ක්‍රමයේ වෙනස අලුත් ආණ්ඩුක්‍රම ව්‍යවස්ථාවෙන් ඇති කරන්න ඕන කියලා පාලකයන්ට මතක් කරන්න කැමතියි.”

ආණ්ඩු බලය ගැනීමෙන් පසු සිය මුල්ම නිල විදේශ සංචාරය ඉන්දියාවේ සිදුකළ ජනාධිපති අනුර කුමාර දිසානායක ජනපති සමග ඉන්දීය නායකයන් කළ සාකච්ඡා කිසිවකදී ශ්‍රී ලංකාවේ පාලන ව්‍යුහයේ වෙනසක් සම්බන්ධයෙන් සඳහන් කළ බවක් වාර්තාවී නොමැත.

“දෙමළ ජනතා අභිලාෂ සපුරා ලමින් ශ්‍රී ලංකා ව්‍යවස්ථාවේ ප්‍රකාර පළාත් සභා ඡන්ද පැවැත්වීමට ශ්‍රී ලංකාවේ ආණ්ඩුව පියවර ගනු ඇතැයි අපි අපේක්ෂා කරමු,” යි අගමැති නරේන්ද්‍ර මෝඩි දෙරටේ රාජ්‍ය නායකයන් විසින් අමතන ලද ඒකාබද්ධ මාධ්‍ය හමුවේදී ප්‍රකාශ කර සිටියේය.

ජනාධිපති අනුර කුමාර දිසානායක සහ ඉලංගෙයි තමිල් අරසු කච්චි පාර්ලිමේන්තු මන්ත්‍රීවරුන් අතර දෙසැම්බර් 4 වැනිදා ජනාධිපති කාර්යාලයේදී පැවැති සාකච්ඡාවේ දී දෙමළ ජනයා බලාපොරොත්තු වන දේශපාලන විසඳුම මෙන්ම දීර්ඝ කාලයක සිට උතුරු නැගෙනහිර ජනතාව මුහුණ දෙමින් සිටින ගැටලු පිළිබඳවත් ජනාධිපතිවරයා දැනුවත් කළ බව ෂානක්කියන් රාසමාණික්කම් මන්ත්‍රීවරයා අගනගරයේ මාධ්‍යවේදීන්ට පවසා තිබුනි.

”අපි බලාපොරොත්තු වෙන්නේ ඒකාබද්ධ උතුරු-නැගෙනහිරක ෆෙඩරල් පාලනයක් පදනම් කරගත් දේශපාලන විසඳුමක්. අපේ පක්‍ෂයේ ස්ථාවරය විදියට අපි මේක කිව්වා.”

ඉදිරියේදී නව ආණ්ඩුක්‍රම ව්‍යවස්ථාව සකස් කරන විට දේශපාලන විසඳුම සම්බන්ධයෙන් දෙමළ ජනතා නියෝජිතයන් ඉදිරිපත් කළ ස්ථාවරය පිළිබදව තව දුරත් විමසා බැලිය හැකි බව ජනාධිපතිවරයා සඳහන් කළේයැයි ෂානක්කියන් රාසමාණික්කම් මන්ත්‍රීවරයා අගනගරයේ මාධ්‍යවේදීන්ට දැනුම් දී තිබුනි.

ශ්‍රී ලංකාව වෙනුවෙන් නව ආණ්ඩුක්‍රම ව්‍යවස්ථාවක් සකස් කිරීමේදී ඒකීය රාජ්‍ය ප්‍රතික්ෂේප කර ෆෙඩරල් ව්‍යුහයක් සහිත පාලනයක් සදහා නව රජයට බල කිරීම වෙනුවෙන් දෙමළ ජාතික ජනතා පෙරමුණේ (TNPF) මැදිහත්වීමෙන් මේ වන විටත් උතුරේ දෙමළ දේශපාලන පක්ෂ අතර සාකච්ඡා ආරම්භ වී තිබේ.

මෛත්‍රී-රනිල් පාලන සමයේ කෙටුම්පත් කළ ඒකීය රාජ්‍යයත් බුද්ධාගමට ප්‍රමුඛස්ථානයත් සුරකින ව්‍යවස්ථාව ශ්‍රී ලංකාවේ අලුත් ආණ්ඩු ක්‍රම ව්‍යවස්ථාව ලෙස සම්මත කරගැනීමේ අභිලාෂය අනුර කුමාර දිසානායක ජනාධිපතිවරයාගේ රජය වෙතින් මේ වනවිට පලවී ඇත.