ශ්‍රී ලංකාවට පැමිණ සිටින බවට වාර්තාවන යුද අපරාධ චූදිත ඊශ්‍රායෙල් සොල්දාදුවකු අත්අඩංගුවට ගෙන ජාත්‍යන්තර අපරාධ අධිකරණයට භාර දෙන ලෙස ආණ්ඩුවට ඉල්ලීමක් ඉදිරිපත් වී තිබේ.
මේ සම්බන්ධ තොරතුරු තමන් වෙත නොමැති බව මාධ්‍යවේදියකු කළ විමසීමකට පිළිතුරු දෙමින් අද පැවසු රජයේ ප්‍රකාශක නලින්ද ජයතිස්ස අමාත්‍යවරයා ඒ සම්බන්ධ විස්තර ලබන කැබිනට් මණ්ඩල ප්‍රවෘත්ති සාකච්ඡාවේදී ඉදිරිපත් කිරීමට සහතික විය.
නිරායුද පලස්තීන වැසියකු ඝාතනය කොට දේහය කෙලෙසූ බවට චෝදනා ලබන ගල් ෆෙර්න්බ්රුක් (Gal Ferenbook) නම් එම යුද සෙබලා කොළඹදී දැකගන්නට ලැබුණු බව පවසන බෙල්ජියමේ බ්‍රසල්ස් නුවර මුලස්ථාන කොටගත් මානව හිමිකම් සංවිධානයක් කියා සිටී.
ඔහු අත් අඩංගුවට ගෙන ජාත්‍යන්තර අපරාධ අධිකරණයට (ICC) භාර දෙන ලෙස ශ්‍රී ලංකා රජයේ බලධාරීන්ගෙන් ලිඛිතව ඉල්ලා සිටි බව හින්ද් රජාබ් සංවිධානය සඳුදා නිකුත් කළ මාධ්‍ය නිවේදනයක දැක්වේ.
ඔහු කළ අපරාධය දැක්වෙන වීඩියෝ පටයක්ද රජයට ලබාදී ඇති බව එම සංවිධානය පවසයි.
“ඔහු මරුමුවට පත් පලස්තීන සිවිල් වැසියකුගේ අභිමානය කෙලසුවා පමණක් නොව මේ නීතිවිරෝධී ඝාතනය සම්බන්ධ වගකීම ද භාරගනී. ඔහු ශ්‍රී ලංකාවේ සිටීම වගවීම සඳහා තීරණාත්මක ඉඩප්‍රස්තාවක් උදාකරයි,” යනුවෙන් චුදිතයාගේ ඡායාරුපයක්ද පළකරමින් හින්ද් රජාබ් ප්‍රකාශ කරයි.
ජාත්‍යන්තර අපරාධ අධිකරණයේ සාමාජිකත්වය ලබාගැනීම ප්‍රතික්ෂේප කර සිටින ශ්‍රී ලංකාවේ රජය ස්වකීය ආරක්ෂක සේනාවලට එල්ලවී ඇති යුද අපරාධ ඇතුළු මානව හිමිකම් උල්ලංඝන චෝදනා තවමත් විභාග කර නැති හෙයින් පීඩිත දෙමළ ජනතාව දිගින් දිගටම ඉල්ලා සිටින්නේ ජාත්‍යන්තර යුක්ති විනිශ්චයකි.
ඊශ්‍රායෙල අගමැති බෙන්ජමින් නෙතන්යාහු, හිටපු ආරක්ෂක ඇමැති යොආව් ගැලන්ට් සහ හමාස් හමුදාපති මොහොමඩ් දෙයිෆ් යුද අපරාධ සහ මානව විරෝධී අපරාධ සම්බන්ධයෙන් අත් අඩංගුවට ගැනීමට ICC අධිකරණය විසින් නොවැම්බර් 21 දා වරෙන්තු නිකුත් කර තිබේ.
Facebook Comments
