කොටි බුද්ධි අංශ ප්‍රධානියා යැයි දිවයින පුවත්පත විසින් හඳුන්වා දී ඇති පුද්ගලයකු සම්බන්ධ තොරතුරු දැන ගැනීමට ත්‍රස්ත විමර්ශන ඒකකයට කැඳවීම මාධ්‍ය නිදහස දැයි එම පුවත් පතේ වාර්තාකරුවකු ප්‍රශ්න කරයි.
දිවයින පුවත්පතේ “කොටි බුද්ධි ලොක්කා මේ දිනවල ලංකාවේ” ලෙස අප්‍රියෙල් 16 වන දින සමන් ගමගේ විසින් ලියන ලද පුවතක් සම්බන්ධව ප්‍රකාශයක් ලබා ගැනීමට තමන් ත්‍රස්ත විමර්ශන ඒකකයට කැඳවා ඇතැයි සිය මුහුණු පොතේ සටහනක් තබමින් සමන් ගමගේ කියා සිටී.
ත්‍රස්ත විමර්නශන කොට්ඨාශය විසින් ගමගේ වෙත යවන ලද ලිපිය පල කරමින් “ඔවුන් හොයන්න ඕනේ ජෙයන්දන්වද? නැතිනම් මාවද? කවුරුහරි දන්න කෙනෙක් ඉන්නවානම් මට කියල දෙනවද මාධ්‍ය නිදහස කියන්නේ ාමකටද කියල” යැයි ඔහු ප්‍රශ්න කර ඇත.
බුද්ධි අංශ ලොක්කා ලෙස එම වාර්තාවේ සඳහන් ජෙයන්තන් නැමැත්ත සම්බන්ධව නෛතික ක්‍රීයාමාර්ග ගැනීමට ත්‍රස්ත විමර්ශන අංශයේ ස්ථානාධිපති ටී.ඩී.ඩී. ජයසුන්ද පරීක්ෂණ පවත්වාගෙන යන බැවින් එම පරීක්ෂණයට සම්බන්ධ අවස්ථාමය කරුණු අනාවරණය කර ගැනීමට සමන් ගමගේ කැඳවා ඇති බවයි එම ලිපියේ සඳහන් වන්නේ.
මැයි 22 වන දින ත්‍රස්ත විමර්ශන ඒකකයට පැමිණ ලෙස සහ එම නියෝගයට අනුව ක්‍රීයා නොකලහොත් එය ලංකා දණ්ඩ නීති සංග්‍රහයේ 17 වගන්තිය යටතේ දඩුවම් ලැබිය හැකි වරදක් බවයි ත්‍රස්ත විමර්ශන කොට්ඨාශයයේ ස්ථානාධිපතිවරයා එවන ලද ලිපියේ සඳහන් වන්නේ.
මීට ඉහත දී ‘ඉරිදා දිවයින’ පුවත් පතට සමන් ගමගේ විසින් ලියන ලද ලිපියක සඳහන් කරුණු අනුව සන්ඩේ ලීඩර් පුවත්පතේ ආරම්භක කතෘ ලසන්ත වික්‍රමතුංග ඝාතනය පිළිබඳව ඔහුට මනා අවබෝධයක් ඇති බව අනාවරණය වන්නේ යැයි අපරාධ පරීක්ෂණ දෙපාර්තමේන්තුව ගම්පහ මහේස්ත්‍රාත් අධිකරණයට දැන්වීමෙන් පසු අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට පසුගිය වසරේ නියෝග කර තිබුණි.
Facebook Comments
