යුද පීඩිත කිලිනොච්චියේ නිදහස් මාධ්‍යවේදියකු පැහැර ගැනීමට උත්සාහ කළ බවට සැක කෙරෙන දෙදෙනකු පැය විසි හතරක් ගත වන තුරුත් අත්අඩංගුවට ගැනීමට පොලීසිය අසමත්ව තිබේ.
ජාතික ජල සම්පාදන හා ජලාපවහන මණ්ඩලයේ කිලිනොච්චි කාර්යාලයේ සේවයේ නියුතු මුරුගයියා තමිල්සෙල්වන් දෙසැම්බර් 26 වැනිදා හවස් යාමයේ සිය රාජකාරිය නිමවා යමින් සිටියදී ඔහු පැහැර ගැනීමට උත්සාහ කළ කලු පැහැති වාහනයකින් පැමිණි දෙදෙනෙක් එම උත්සාහය අසාර්ථක වීමෙන් පසු ඔහුට පහර දී පලා ගොස් තිබුනි.
ඒ අතරින් හඳුනා ගත් එක් අයකුගේ විස්තර පොලිසිය සතුව ඇති බව පළාත්බද මාධ්‍යවේදීහු පවසති.
පහර කෑමට ලක්වු කිලිනොච්චි මාධ්‍ය සමාජයේ ලේකම් ද වන මුරුගයියා තමිල්සෙල්වන් කිලිනොච්චි රෝහලේ හදිසි ප්‍රතිකාර ඒකකයේ ප්‍රතිකාර ලබමින් සිටියදී 26 වැනිදා හවස් යාමයේ එහි පැමිණි පොලිස් නිලධාරීන්ට තමා පැහැර ගැනීමට පැමිණි වාහනය පදවාගෙන ආ තැනැත්තා කිලිනොච්චි භාරතපුරම් වැසියකු බවට පැමිණිලි කර තිබේ.
ජාතික ජල සම්පාදන හා ජලාපවහන මණ්ඩලයේ කිලිනොච්චි කාර්යාලයේ දී එදින පෙරවරුවේ එම පුද්ගලයා තමන්ට හා ආයතනයේ ඉහළ නිලධාරියකුට බැණ වැදුන බවත් මුරුගයියා තමිල්සෙල්වන් සහෝදර මාධ්‍යවේදීන් හා පවසා ඇත.
පළාත් බද වාර්තාකරුවන් පවසන්නේ එලෙස එම පුද්ගලයාගේ පෞද්ගලික තොරතුරු ලබා දී තිබියදීත් සිය සහෝදර මාධ්‍යවේදියා පැහැර ගැනීමට උත්සාහ කළ දෙදෙනා දෙසැම්බර් 27 වැනිදා හවස් යාමය වන විටත් අත්අඩංගුවට ගැනීමට පොලීසිය අසමත්ව ඇති බවයි.
වීරකේසරී, තිනකුරල්, උදයන්, ටැමිල් වින් ඇතුළු දෙමළ මාධ්‍ය ආයතන ගණනාවකම නිදහස් මාධ්‍යවේදියෙකු ලෙස කටයුතු කරන මුරුගයියා තමිල්සෙල්වන් ප්‍රදේශයේ සිදු වන නීති විරෝධී මත්ද්‍රව්‍ය, පස් හා වැලි ඇතුළු ජාවාරම් සම්බන්ධයෙන් පසුගිය සමයේ වාර්තාකරණයේ යෙදුනු අයෙකි.
ඔහු මේ වන විටත් කිලිනොච්චි රෝහලේ ප්‍රතිකාර ලබමින් සිටි.
Facebook Comments
