රජයේ නීතිපති දෙපාර්තමේන්තුව විසින් අතීතයේ ඇතැම් නඩුගොනු සඟවා තැබූ ආකාරය ජනාධිපතිවරයා විසින් රටට හෙළි කර තිබේ.
හෝමාගම පිටිපන ප්‍රදේශයේ දී මැතිවරණ ජය සමරන ජන හමුවක් අමතමින් ජනවාරි 25 වැනිදා ජනාධිපති අනුර කුමාර දිසානායක සදහන් කළේ මෙවැනි ආණ්ඩුවක් එනතෙක් එම ලිපිගොනු සගවාගෙන සිටි බව නීති නිලධාරිණියක් තමන්ට පැවසු බවයි.
“එක නීති නිලධාරිනියක්, මට එතුමිය කිව්වා සමහර ෆයිල් හංගගෙන හිටියා කිව්වා. ඒගොල්ලෝ කිව්වා ඒ ෆයිල් එකට ඒ වෙලාවේ එක්කො නඩුව දාන්න ගියා නං එක්කෝ එයා ගෙදර කිව්වා. එක්කෝ නඩුව එළියට කිව්වා. ඒ නිසා මේ වගේ ආණ්ඩුවක් එනකන් ෆයිල් එක තියාගෙන හිටියා කිව්වා. එහෙම මිනිස්සු ඉන්නවා. එහෙමයි වැඩ කරන්නේ. අපි ස්තුතිවන්ත වෙන්න ඕනේ.”
එවැනි නිලධාරීන්ට නිදහසේ සිය රාජකාරිය කරගෙන යෑම සදහා ඉඩ ප්‍රස්තාව තම රජය යටතේ ලබා දී ඇති බවත් එහිදී පැවසු ජනාධිපතිවරයා සඟවන ලද නඩු ගොනු කීයක්ද, කවර අපරාධද, ඒ කා සම්බන්ධයෙන්දැයි හෙළි කළේ නැත.
“අපි හිතුවොත් මේ අපේ විතරයි හරි. අනිත් ඔක්කොම නෑ. එහෙම නෑ. උනන්දුවක් තියෙන මිනිස්සු ඉන්නවා මේ රටේ. ඉතිං අපි ඒගොල්ලන්ට නිදහස දීලා තියෙනවා. අපි නඩු තෝරන්නෙත් නෑ. නම් තෝරන්නෙත් නෑ. පුද්ගලයන් තෝරන්නෙත් නෑ. අපි කියලා තියෙන්නේ ආයතනවලට නිසි පරිදි පරීක්ෂණ කරන්න අපිට විශ්වාසයක් තියෙනවා. අපි නැවත නැවත කරන්නේ ඒ ආයතන ශක්තිමත් කරන එක”
නීතිපති දෙපාර්තමේන්තුව උපුටා දක්වමින් ජනාධිපති අනුර කුමාර දිසානායක තව දුරටත් අවධාරණය කර තිබුනේ මේ මාසයේ ප්‍රධාන නඩු 3ක් පැවරීමට නීතිපති දෙපාර්තමේන්තුව සැලසුම් කර ඇති බවයි. රජය ප්‍රකාශ කළ පමණින් නඩු පැවරිය නොහැකි බවට ඔහු අවධාරණය කළේය.
“නීතිපති දෙපාර්තමේන්තුව මං දැක්කා පහුගියදා ප්‍රකාශයට පත් කරලා තිබුණා ප්‍රධාන කේසස් එකොළහක්, ප්‍රධාන තොරතුරු 11ක් හොයාගෙන. තුනකට මේ ජනවාරි මාසේ නඩු දාන්න පුළුවන් කියලා. අපි බලමු. මොකද අපි නෙමෙයිනේ අධිකරණයට ගිහිල්ලා ඒවට තර්ක විතර්ක කරන්න ඕන. ඒ තර්ක විතර්ක කරන්නේ රජයේ නීතිඥයා. එතකොට රජයේ නීතිඥයා සෑහීමකට පත්වෙන්න ඕනේ පරීක්ෂණයේ ප්‍රතිඵල අනුව මේකට නඩු දැමිය හැකියි කියලා. අපි කිව්වට නඩු දාන්නේ නෑ. අපි කිව්වට නඩු දාලා වැඩකුත් නෑ. මොකද ඒ නඩුව බාර රජයේ නීතිඥවරයා අධිකරණයට ගිහිල්ලා එයා තහවුරු කරන්න ඕනකම තිබෙනවා, මේ නඩුව මෙහෙම අපරාධයක් සිද්ධ වෙලා තියෙනවා. දඬුවම් ලබා දිය යුතුයි කියලා. ඉතින් එයා ඒකට අවශ්‍ය වන සාධක එකතු කරන්න ඕනේ. ඒවා කරනවා.”
වංචා සහ දූෂණ සම්බන්ධයෙන් පුද්ගලයන් අත්අඩංගුවට ගැනීමේ දී සහ නීතිය ක්‍රියාත්මක කිරීමේ දී පොලීසිය ඇතුළු නීතිය ක්‍රියාත්මක කරන ආයතනවලට තමන් කිසිදු ආකාරයකින් මැදිහත් නොවන බවත් ජනාධිපතිවරයා එහිදී තව දුරටත් සඳහන් කර තිබුනි.
නඩු ලිපිගොනු සඟවා තැබීමට හේතුවූ බලපෑම් කළ නිලධාරීන් හෝ දේශපාලකයන් සම්බන්ධයෙන් විමර්ශනයක් කෙරෙන බවක් ජනාධිපති අනුර කුමාර දිසානායක ප්‍රකාශයට පත් කළේ නැත.
Facebook Comments
