මඩකලපුවේ දෙමළ මාධ්‍යවේදියකුට උසාවි වරෙන්තුවක්

හිටපු ජනාධිපතිවරයකු නැගෙනහිර සංචාරයක යෙදී සිටියදී අධිකරණ නියෝග කඩ කරමින් විරෝධතා දැක්වු බවට චෝදනා නගා පොලීසිය විසින් නඩු ගොනු කළ කිරි ගොවීන් ඇතුළු තිහක පිරිසෙන් විසි හත් දෙනකු ඇප මත මුදා හැරීමට අධිකරණය නියෝග කර තිබේ.

එරාවූර් සංචාරක මහේස්ත්‍රාත් අධිකරණයේ ජනවාරි 22 වැනිදා නඩුව කැදවු අවස්ථාවේ පසුගිය නඩු වාරයේද අධිකරණයට නොපැමිණිම හේතුවෙන් වරෙන්තු නිකුත් කර තිබු රටින් බැහැරව සිටින දෙමළ මාධ්‍යවේදී පී. ශෂිකරන්ට එරෙහිව විවෘත වරෙන්තුවක් නිකුත් කිිරීමට මහේස්ත්‍රාත් මදුජලා කේතීස්වරන් කටයුතු කළ බවයි පළාත් බද වාර්තාකරුවන් පවසන්නේ.

එදින පාර්ලිමේන්තු දිනයක් බැවින් අධිකරණයට පැමිණිමට නොහැකි බවට නීතිඥයන් මාර්ගයෙන් හේතු දක්වා තිබු පාර්ලිමේන්තු මන්ත්‍රී ජී. ශ්‍රී නේෂන් ඇතුළු තවත් අයෙකුට මීලග නඩු දිනයේදී අධිකරණය හමුවේ පෙනී සිටින ලෙස නියෝග නිකුත් කළ මහේස්ත්‍රාත්වරිය එක් අයෙකුට රුපියල් ලක්ෂය බැගින් වන ශරීර ඇප මත සෙසු සැකකරුවන් 27 දෙනා මුදා හැරීමට නියෝග කර තිබේ.

නඩුව යළි කැදවීමට නියමිතව ඇත්තේ 2025 අප්‍රේල් 21 වැනි දිනයි.

මඩකලපුව චෙන්කලඩි මධ්‍ය මහා විද්‍යාලයේ 149 වන සංවත්සර උත්සවයට 2023 වසරේ ඔක්තෝබර් 8 වැනි දින ජනාධිපති රනිල් වික්‍රමසිංහ සහභාගී වන අවස්ථාවේ දී ඔහු ගමන් ගන්නා මාර්ගය අවහිර වන පරිදි මයිලත්තමඩු මාදවනෙයි කිරි ගොවීන්, අතුරුදහන් කරනු ලැබූ පවුල්වල සාමාජිකයන්, දේශපාලනඥයන් හා එක්ව විරෝධතා දියත් කර තිබුණි.

ජනාධිපතිවරයා නැගෙනහිර සංචාරය කරන කාල සීමාව තුලදී උද්ඝෝෂණ කිරීමට තහනමක් නොමැති මුත් මාර්ග අවහිර කරමින්, මහජන සාමය කඩවන ආකාරයෙන් විරෝධතා පැවැත්වීම තහනම් කරමින් මඩකලපුව මහේස්ත්‍රාත් අධිකරණය නියෝග නිකුත් තිබුනි.

අධිකරණ නියෝගය ඉක්මවා යමින් විරෝධතා දැක්වීමේ චෝදනා නගා ඔවුන්ට එරෙහිව පොලීසිය නඩු පැවරීමට කටයුතු කළ බව පළාත් බද වාර්තාකරුවෝ පවසති.

එම විරෝධතාවයට එක්ව සිටි බලහත්කාරයෙන් අතුරුදහන් කළ පවුල් වල මව්වරුන්ට පොලිස් නිලධාරීන් පහර දෙන ආකාරයත් පලාත් බද මාධ්‍යවේදීන් විසින් විඩියෝ ගත කර ද තිබුනි.

අධිකරණ නියෝගය අභිබවා යමින් විරෝධතා පැවැත්වීම සම්බන්ධයෙන් පාර්ලිමේන්තු මන්ත්‍රී රාසමානික්‍යම් ශානක්‍යන්, හිටපු පාර්ලිමේන්තු මන්ත්‍රීවරුන් වන පී. අරියනේන්ද්‍රන්, ජී. ශ්‍රී නේෂන්, එස්. යෝගේෂ්වරන්, දෙමළ ජාතික ජනතා පෙරමුණේ ප්‍රකාශක කනගරත්නම් සුගාෂ්, එම පක්ෂයේ සංවිධායක ටී. සුරේෂ්, මාධ්‍යවේදීන් වන පුණ්‍යමුර්ති ශෂීකරන්, V. ක්‍රිෂ්ණකුමාර් හා මයිලත්තමඩු මාදවනෙයි කිරි ගොවීන් ඇතුළු 34 දෙනෙකුගෙන් එරාවුර් පොලීසිය 2023 වසරේ ප්‍රකාශ සටහන් කරගන්නා ලදි.