ජනාධිපති මෛත්‍රීපාල සිරිසේනගේ ක්‍රියා කලාපය සම්බන්ධව නවක පාර්ලිමේන්තු මන්ත්‍රීවරියක පාර්ලිමේන්තුවේදී දැඩි වාග් ප්‍රහාරයක් දියත් කර තිබේ.
ජනාධිපතිවරයා නයෙක් බව තමන් ඇතුළු පිරිස ඔක්තෝම්බර් 26 දේශපාලන කුමන්ත්‍රණයෙන් දැනගත් බවත් මෙවර අය වැය හරහා නයා නායම බව විපක්ෂ නායක මහින්ද රාජපක්ෂද අවබෝධ කර ගත් බව මන්ත්‍රීනි හිරුණිකා ප්‍රේමචන්ද්‍ර පැවසුවාය.
“මහින්ද මහත්තයා දැන ගත්තා නයා නයාමයි කියලා. විපක්ෂයේ උදවියට අපි කියනවා නැගිටලා යන්න කියලා. ජනපති පුද්ගලයෙක් ලෙස විශ්වාස කරන්න බෑ. අපි වැටුණ වලේ නැවතත් වැටෙන්න එපා. ජනපති තමන්ගේ දේ කර ගන්න අනිත් අය භාවිත කළා.” යැයි ඇය 13 බදාදා ජනාධිපතිවරයාගේ වැය ශිර්ෂ විවාදයට එක්වෙමින් කියා සිටියාය.
මෛත්‍රීපාල සිරිසේන ජනාධිපතිවරයෙකු ආකාරයට හෝ සාමාන්‍ය මනුෂයෙකු හැටියට කිසිදා විශ්වාසය තැබිය නොහැකි බව ද මන්ත්‍රීවරිය පාර්ලිමේන්තුවේදී පෙන්වා දුනි.
“ජිවිතේට යාළුවෙක් හරියට ආශ්‍රය කරලා නැහැ, ජිවිතේට තමන් යටතේ ඉන්න මනුස්සයෙකුට හොඳින් කතා කරලා නැහැ, මහෙල්ක්ම් විදියට ඉන්න කාලේ කෙලින් ඉදගෙන ප්‍රශ්නයක් විසඳලා නැහැ ශ්‍රී ලංකා නිදහස් පක්ෂයේ.”
වලේ වැටෙන්න එපා
එක්සත් ජාතික ප්‍රමුඛ පිරිස් මෛත්‍රීපාල සිරිසේන ජනාධිපති ධුරයට පත් කරමින් වැටුන වලේ නොවැටී වෙනත් ජනාධිපති අපේක්ෂයෙකු ඉදිරිපත් කරන ලෙස ද හිරුණිකා මන්ත්‍රීවරිය විපක්ෂයෙන් ඉල්ලා සිටියේය.
තමුන්ගේ වැරදි වලදි පවා ජනාධිපතිවරයා අනුන්ට බෝලය පාස් කරන බවට ද මන්ත්‍රීවරිය චෝදනා කරන ලදී.
“ඔබ සියලු දෙනාටම ඔප්පු වුනා විපක්ෂයට ඉන්නේ 71 යි කියලා. මෛත්‍රී ජනාධිපතිතුමා 71 තියාගෙන තමයි හිටපු ජනාධිපති මහින්ද රාජපක්ෂට ලණුවක් දුන්නේ ඔයා කාටත් හොරෙන් එන්න මම අගමැතිකම දෙන්නම් කියලා. එදා මහින්ද රාජපක්ෂට බෝලේ පාස් කරල කිව්වේ මන්ත්‍රීවරුන්ගේ ගාණ වැඩි වුන නිසා ආණ්ඩුව පිහිටුවන්න බාරි වුනා කියලා.”
පසුගිය කාලයේ පුරාවට ජනාධිපතිවරයා නොබෙල් සාම ත්‍යාගයට පාවා සුදුසු බවට පවා ප්‍රචාරණයක් ගෙන ගියද ඉදිරි ජනාධිපතිවරණ අපේක්ෂකත්වය හෝ මෛත්‍රීපාල සිරිසේන ජනාධිපතිවරයා හට ලැබේවි දැයි සැක සහිත බව හිරුණිකා ප්‍රේමචන්ද්‍ර මන්ත්‍රීවරිය වැඩි දුරටත් කියා සිටියාය.
Facebook Comments
