ගල්කිස්සේ රඳවා සිටි රෝහින්ග්‍යා මුස්ලිම් සරණගතයන්ට එරෙහි ප්‍රහාරය සම්බන්ධව මසකට අධික කාලයක් පොලිසිය මඟ හරිමින් සැඟව සිට අත්අඩංගුවට ගත් හිමිනමක් සතුව හැඳුනුම් පත් දෙකක් තිබී සොයා ගත් බව පොලිසිය පවසයි.
මෙම සිද්ධියේ ප්‍රධාන සැකකරුවෙකු වන අරඹේපොල රතනසාර හිමි පොලිස්පතිවරයාට ලද ඔත්තුවක් මත 20 සිකුරාදා අත්අඩංගුවට ගත් බව පොලිස් මාධ්‍ය ප්‍රකාශක රුවන් ගුණසේකර කියා සිටියේය.
අත්අඩංගුවට පත්වු හිමි නම සන්තකයේ තිබී ගිහි පැවිදි හැඳුනුම්පත් දෙකක් සොයා ගැනීමට පොලිසිය සමත් වී තිබේ.
අත්අඩංගුවට ගත් රතනසාර හිමියන්ගෙන් ප්‍රශ්න කිරීමේ දී උන්වහන්සේ විසින් හැඳුනුම්පත් දෙකක් භාවිත කළ බව පිළිගත් බව පවසන පොලිස් මාධ්‍ය ප්‍රකාශක එම ව්‍යාජ හැඳුනුම්පත භාවිත කර රතනසාර හිමියන් විසින් කරන ලදැයි සැක කරන යම් යම් සිද්ධීන් කිහිපයක් ගැන ද රහස් පොලිසිය පරික්ෂණ ආරම්භ කල බව කියා සිටියේය.
අත්අඩංගුවට ගත් සැකකාර භික්ෂුව ගල්කිස්ස මහේස්ත්‍රාත් අධිකරණය වෙත ඉදිරිපත් කිරීමෙන් අනතුරුව ලබන 30 වන දින දක්වා රක්ෂිත බන්ධනාගාර ගත කිරීමට නියෝග කර තිබේ.
රෝහින්ග්‍ය ප්‍රහාරය සම්බන්ධයෙන් අත්අඩංගුවට ගත් සැකකරුවන්ගෙන් 8 දෙනාගෙන් සැකකරුවන් දෙදෙනෙකු තවමත් බන්ධනාගාර ගත කර ඇති බව පොලිසිය පවසයි.
Facebook Comments
