ජනාධිපති හා ආරක්ෂක අමාත්‍යාංශය කියන දෙපත් කතා ප්‍රශ්න කෙරේ

මිනිස් ජීවිත 250 ට වැඩි ගණනක් අහිමි කරමින් සිව් වසරකට ඉහත දී සිදු වු පාස්කු සංහාරය සම්බන්ධයෙන් හද කම්පා කරවන තොරතුරු හෙළිදරව් කළ අලුත්ම චැනල් 4 වාර්තා චිත්‍රපටයෙන් පසු ජනාධිපතිවරයාත් ඔහුගේ අමාත්‍යාංශයත් පවසන පරස්පර කතා අභියෝගයට ලක් වී තිබේ.

කොළඹ දී පැවැති මාධ්‍ය හමුවක දී අදහස් දක්වමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් ප්‍රශ්න කරන්නේ එවැනි ප්‍රකාශ හරහා රැවටීමට ලක් කරන්නේ කවුරුන්ද යන්නයි.

” දැන් මේ හෙළි දරව්ව කරපු ගමන් ඉස්සරහට පැනලා ආරක්ෂක අමාත්‍යාංශය නිවේදනයක් නිකුත් කලා මේ බොරු වාර්තාවක් කියලා කිසිදු පරීක්ෂණයක් තොරව. එතකොට දැන් ජනාධිපතිවරයා කියනවා කමිටු පත් කරනවා කියලා. දැන් මේ ජනාධිපතිවරයා ආරක්ෂක ඇමැති. ආරක්ෂක අමාත්‍යාංශය එක පැත්තකින් නිවේදනයක් දානවා මේක බොරු කියලා. ජනාධිපතිවරයා කියනවා කමිටුවක් පත් කරනවා කියලා. කාවද මේ රවට්ටන්නේ. මොකක්ද මේ විහිලුව.”

මීට වසර 13 ට ඉහත දී රට තුළ බෝම්බ පිපිරවීමට හමුදා නිලධාරීන් ක්‍රියා කළ බවට යුද සමයේ හමුදාපති ධුරය දැරු සරත් ෆොන්සේකා පාර්ලිමේන්තුවේදී කළ ප්‍රකාශය සම්බන්ධයෙන් ගත් පියවර කුමක්දැයි ගුරු සංගම් නායකයා එහිදී වැඩි දුරටත් ප්‍රශ්න කළේය.

“අපි දැක්කා පැහැදිලිවම සරත් ෆොන්සේකා පාර්ලිමේන්තුවේ දී හමුදා නිලධාරීන්ගේ නම් සදහන් කරලා පැහැදිලිවම කිව්වා මේ රටේ 2010 බෝම්බ පිපිරෙව්වා කියලා. මොකක්ද ගත්ත පියවර. කිසිදු පියවරක් නෑ.”

කිසිදු ජන වරමක් නොමැති ආණ්ඩුව ප්‍රජාතන්ත්‍ර විරෝධි ගමනක නිරතවී සිටින බවට චෝදනා කරන ගුරු සංගම් නායකයා එම මාධ්‍ය හමුවේදී වැඩි දුරටත් අවධාරණය කළේ පාස්කු වින්දිතයන්ට යුක්තිය ලබා දිය යුතු බවයි.

“මේ රටේ ජනතාවට, පාස්කු වින්දිතයන්ට යුක්තියක් ඕනේ. දැන් හැම පැත්තෙන්ම දැන් ආණ්ඩුවට පෙන්නලා දීලා තියනවා මේ ආණ්ඩුවේ ප්‍රජාතන්ත්‍ර විරෝධි භාවය. මේවා පෙන්නලා තියෙද්දි තමයි ආණ්ඩුව මේ ආකාරයෙන් කටයුතු කරමින් යන්නේ. අපි පැහැදිලිවම ආණ්ඩුවට කියනවා වහාම මේ ප්‍රජාතන්ත්‍ර විරෝධි ගමන නතර කරන්න ඕන. ඔවුන්ට කිසිදු ජනවරමක් නෑ.”

ආරක්ෂක අමාත්‍යාංශයේ ප්‍රතිචාර

චැනල් 4 නාලිකාව විසින් නිෂ්පාදනය කරන ලද නවතම වාර්තාවට ප්‍රතිචාර දැක්වීමට ආරක්‍ෂක අමාත්‍යාංශය කැප වි සිටින බව පවසන එම අමාතාංශය පසුගියදා නිවේදනය කර තිබුනේ පාස්කු ඉරිදා ප්‍රහාරයේ වගකීම හමුදා බුද්ධි අංශයට සහ ශ්‍රී ලංකා රාජ්‍ය බුද්ධි සේවයේ වත්මන් අධ්‍යක්‍ෂ ජෙනරාල් මේජර් ජෙනරල් සුරේෂ් සලේ වෙත මෙම වාර්තා චිත්‍රපටය මගින් පවරා ඇති බවයි.

එම චෝදනාව ආරක්ෂක අමාත්‍යාංශය විසින් තරයේ හෙළා දැක තිබුනි.

” මෙම ප්‍රහාරය මෙහෙයවීම සහ බෝම්බකරුවන්ට සහය වීම යන චෝදනාව වසර 36ක් පුරා රට වෙනුවෙන් සේවයට කැපවූ ජ්‍යෙෂ්ඨ හමුදා නිලධාරියෙකුට එරෙහිව සිදු කිරීම ආරක්‍ෂක අමාත්‍යාංශය තරයේ හෙළා දකියි.”

වසර ගණනාවක් දේශීය හා ජාත්‍යන්තර වශයෙන් කරන ලද පරික්‍ෂණ තුලින් නිරන්තරයෙන් පෙන්වා දී ඇත්තේ මෙම භයංකර ඛේදවාචකයේ නිර්මාපකයන් සහරාන් හෂීම්ගේ නායකත්වයෙන් යුත් අයිඑස්අයිඑස් හා සම්බන්ධ කණ්ඩායම්වල සාමාජිකයින් බවයැයි ආරක්ෂක අමාතාංශය නිකුත් කළ එම නිවේදනයේ වැඩි දුරටත් සදහන්ය.

ඊට පසුදින නිවේදනය නිකුත් කරන ජනාධිපතිවරයා කියා තිබුනේ “2019 වසරේ පාස්කු ඉරුදින සිදු වූ මරාගෙන මැරෙන බෝම්බ ප්‍රහාර සම්බන්ධයෙන් සත්‍යය සෙවීම සහ යුක්තිය ඉටුකිරීම සඳහා සාධනීය පියවරක් තබමින්” චැනල් 4 චෝදනා විමර්ශනය කිරීමට විශ්‍රාමික ශ්‍රේෂ්ඨාධිකරණ විනිසුරුවරුවරයෙකුගේ ප්‍රධානත්වයෙන් කමිටුවක් පත් කරන්නට යන බවයි.

පාස්කු බෝම්බ ප්‍රහාරය මෙහෙයවූ මහ මොළකරුවකු ඉන්නා බවට හිටපු නීතිපති දප්පුල ද ලිවේරා කළ ප්‍රකාශයක් විමර්ශනය සඳහා පාර්ලිමේන්තු තේරීම් කාරක සභාවක් පත් කරන බවද ජනාධිපති මාධ්‍ය ඒකකය නිවේදනය කර අත.

පාස්කු ප්‍රහාරයට දේශපාලන බලවතුන්ගේත්, රාජ්‍ය ඔත්තු සේවයේ ඉහලම නිලධාරියාගේත් සම්බන්ධයක් ඇති බවට චෝදනා නගන චැනල් 4 වාර්තාව ජනාධිපතිවරයාගේ කාර්යාලය විසින් හඳුන්වා ඇත්තේ “ඇවිලෙන ගින්නට පිදුරු දැමීම වැනි තත්ත්වයක්” ලෙසයි.