දෙමළ ජනයාගේ ගැටලු වලට විසදුම් ලබා නොදුන් බවට නිදහසින් පසු මෙරට බිහිවු රජයන් සියල්ල ජනාධිපතිවරයාගේ දෝෂ දර්ශනයට ලක්ව තිබේ.
සිංහල පාලකයන් විසින් දෙමළ දේශපාලකයන් පාවිච්චි කරමින් බලය ලබා ගත් නමුත් දෙමළ ජනයා වෙත කිසිවක් නොකළ බවටයි ජනපති චෝදනා කරන්නේ.
1947 සිට බලයට පත් වූ සෑම ආණ්ඩුවක්ම තමන්ගේ ආණ්ඩු බලය ආරක්ෂා කර ගැනීමට උතුරු නැගෙනහිර මහජන නියෝජිතයන් භාවිතා කළා මිස එහි ජනතාවගේ ආර්ථික සහ සංවර්ධන ගැටලු විසඳීමට හැකි නිසි දේශපාලන නියෝජනයක් සඳහා පසුබිම නිර්මාණය කර නොදුන් බවට ජනාධිපති මෛත්‍රීපාල සිරිසේන 20 බ්‍රහස්පතින්දා ති‍්‍රකුණාමල දිස්ති‍්‍රක්කයේ පුළුල් සංවර්ධනයක් ඇතිකිරීම වෙනුවෙන් ආරම්භ කළ “සිරිසර පිවිසුම” සංවර්ධන වැඩසටහනට එක් වෙමින් කියා සිටියේය.
රට තුල ජනවාර්ගික ගැටලු ඇතිවීම බලපෑ ප්‍රධානතම කරුණක් වනුයේ උතුරු නැගෙනහිර ජනතාවගේ සංවර්ධන අවශ්‍යතා පිළිබඳ එම සෑම රජයක් යටතේම යොමු කෙරුණේ අඩු අවධානය සහ නිසි දේශපාලන නායකත්වයක් එම පළාත් තුළින් නියෝජනය නොවීම බවයි ජනාධිපතිවරයා පෙන්වා දෙන්නේ.
රට නොබෙදා බලය බෙදා ගැනීමේ සංකල්පය යථාර්ථයක් වීමට සෑම දිස්ත්‍රික්කයක් තුළින්ම එක් කැබිනට් අමාත්‍ය ධූරයක්වත් නියෝජනය විය යුතු බවටයි ජනාධිපතිවරයා යෝජනා කරන්නේ.
නොබෙදුණු රටක සියලු ජනතාව සංවර්ධනයේ වරප‍්‍රසාද ලබමින් සාමයෙන් සහ සහයෝගයෙන් ජීවත්වන රටක් නිර්මාණය කළ හැකි රාජ්‍ය නායකත්වයක් අද ශ‍්‍රී ලංකාවට හිිමිව තිබෙන බව මෙම අවස්ථාවට එක් වු විපක්ෂ නායක ආර්. සම්බන්ධන් අවධාරණය කර සිටියේය.
රට එක්කළ හැකි එම නායකත්වය තුළ ශ‍්‍රී ලංකා ජාතිය දියුණු ජාතියක් ලෙස ඉදිරියට යනු ඇති බවට ද විපක්ෂ නායකවරයා වැඩි දුරටත් විශ්වසය පල කළේය.
Facebook Comments
