ත්‍රස්ත මර්දන පොලිස් නිලධාරීන් උතුරේ පාසලකට කඩා වදී

අහෝසි කරන බවට ඡන්ද පොරොන්දු දී, බලයට පත් වු පසු ඉතාම පරිස්සමින් භාවිත කළ යුතු බවට ආණ්ඩුව පවසන මර්දනකාරී පනතක් හිතුමතේ භාවිත කරන බවට ත්‍රස්ත මර්දන පොලීසියට චෝදනා එල්ල වී තිබේ.

යුද පීඩිත කිලිනොච්චියේ දෙමළ පාසලක ගුරුතුමෙකු චෝදනා කරන්නේ ත්‍රස්ත මර්දන හා විමර්ශන කොට්ඨාශ (CTID) යේ නිලධාරීන් තමන්ගෙන් ප්‍රශ්න කිරීම සදහා තමන් උගන්වමින් සිටි පංති කාමරය අසලට ජනවාරි 20 වැනිදා කිසිදු අවසරයකින් තොරව කඩා වැදුන බවයි.

“ත්‍රස්තවාදය වැළැක්වීමේ පනත අහෝසි කරනවා කියපු අනුර ආණ්ඩුව මොකද කරන්නේ? පසුගිය ආණ්ඩු කරපු වැඩේම තමයි කරන්නේ. මම රජයේ සේවකයෙක්. මගෙන් ප්‍රශ්න කරන්න ක්‍රමයක් තියනවා. කිසිම අවසරයකින් තොරව බුද්ධි අංශ නිලධාරීන් පාසලට ඇතුළු වන්නේ කොහොමද? පැමිණිල්ලක් නැහැ, නඩුවක් නැහැ. අපව අපරාධකරුවන් ලෙස සැලකීම පිළිගන්න බැහැ. මොන ආණ්ඩුව ආවත් අපේ මිනිස්සුන්ට තියෙන අර්බුධ දිගටම පවතිනවා.”

කිලිනොච්චිය, කෝනාවිල් දෙමළ මහා විද්‍යාලයේ ඉන්නාසිමුත්තු සත්‍යසීලන් ගුරු පියා චෝදනා කරන්නේ ත්‍රස්ත මර්දන හා විමර්ශන කොට්ඨාශ (CTID) යේ පරන්තන් ඒකකයේ නිලධාරීන් දෙදෙනෙකු ජනවාරි 20 වැනිදා සිය පන්ති කාමරය අසලට කඩා වැදුනේ අඩුම තරමින් පාසලේ විදුහල්පතිවරයාට හෝ දැනුම් දීමකින් තොරව බවයි.

2024 මාර්තු 14 වැනිදා කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ද්වාරය ලෙස ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණයක් භාවිතයට ගෙන තිබුනි.

ඒ සම්බන්ධයෙන් ප්‍රශ්න කිරීම සදහා ත්‍රස්ත පොලිසිය විසින් විදුහල්පතිවරයා, ගුරුවරුන් මෙන්ම සිසුන් ද පසුගිය සමයේ අවස්ථා කිහිපයකදී පොලීසියට කැඳවා දිගින් දිගටම ප්‍රශ්න කර තිබු බවයි පළාත් බද වාර්තා කරුවන් පවසන්නේ.

ඉන්නාසිමුත්තු සත්‍යසීලන් ගුරු පියා අවධාරණය කරන්නේ 2024 වසරේ පැවැති ජනාධිපතිවරණයෙන් පසු හා මහ මැතිවරණයට පෙර කොළඹ පිහිටි ත්‍රස්ත මර්දන හා විමර්ශන කොට්ඨාශ (CTID)යේ මුලස්ථානය වෙත තමන් කැදවු නිලධාරීන් එදින පැය 10 ට ආසන්න කාලයක් තමාගෙන් ප්‍රශ්න කළ බවයි.

ත්‍රස්ත මර්දන හා විමර්ශන කොට්ඨාශ එදින දිගින් දිගටම ගුරුතුමාගෙන් ප්‍රශ්න කර ඇත්තේ ඔහු එල්.ටී.ටී.ඊ සංවිධානය යළි ගොඩ නැගීම වෙනුවෙන් කටයුතු කරනවාද යන්න සහ නිවාසාන්තර මලල ක්‍රීඩා උත්සවයේ ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණය අයත් නිවාසයේ දරුවන්ගේ සහ ඔවුන්ගේ නම් සහ විස්තර ලබා දෙන ලෙසයි.

එම නිවාසයට අයත් පාසල් සිසුන්ගේ සහ ඔවුන්ගේ දෙමාපියන්ගේ නම් ත්‍රස්ත මර්දන හා විමර්ශන කොට්ඨාශ (CTID)ය වෙත ලබා දීම ඔහු එහිදී දැඩි ලෙස ප්‍රතික්ෂේප කර තිබේ.

ඉන්නාසිමුත්තු සත්‍යසීලන් ගුරු පියා අවධාරණය කරන්නේ තමාට විරුද්ධව පැමිනිල්ලක් හෝ නඩු ගොනු කිරීමක් පවා සිදු කර නොමැති තත්වයක් තුළ කලාපයේ අධ්‍යාපන බලධාරින් හා පාසලේ විදුහල්පතිවරයා හෝ දැනුවත් නොකර ජනවාරි 20 වැනිදා පොලිස් නිලධාරීන් දෙදනා සෘජුවම තම පන්ති කාමරය වෙත පැමිණිමේ වරද තමන් එම නිලධාරීන් දෙදෙනාට තේරුම් කර දුන් බවයි.

එවිට එම ස්ථානයෙන් පිටත්ව විදුහල්පතිවරයා හමුවීමට ගිය ත්‍රස්ත මර්දන හා විමර්ශන කොට්ඨාශයේ නිලදාරීන් දෙදනා පැය බාගයකට ආසන්න කාලයක් විදුහල්පතිවරයා සමග සාකච්ඡා කර යලි සිය පන්ති කාමරය අසලට පැමිණි තමන්ට තර්ජනය කර පිටව ගිය බව ඔහු මාධ්‍යවේදීන් සමග පවසා තිබේ.

“ඔබ නැවත කොළඹට ගෙන්නන්න වෙනවා. අප ඉල්ලා සිටින තොරතුරු ඔබ අපට ලබා දිය යුතුය. සහයෝගයෙන් කටයුතු කළ යුතුයි. නැතිනම් අත්අඩංගුවට ගන්න වෙනවා කියලා එයාලා කිව්වා. මම කිව්වා මම කිසිම අපරාධයක් කළේ නැහැ. ඔබ යම් ක්‍රියාමාර්ගයක් ගත්තොත් මගේ මූලික අයිතිවාසිකම් කඩවන බවට පැමිණිලි කරන්න වෙනවා කියලා. මම ඔහුට කිව්වා මගේ ආරක්ෂාව සඳහා මට නීතිමය පියවර ගන්න වෙනවා කියලා.”

පාර්ලිමේන්තුවේ සභානායක, අමාත්‍ය බිමල් රත්නායක 2025 ජනවාරි 21 දා පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.

“ඒ වගේම ත්‍රස්ත විරෝධි පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං.” ඔහු පවසා තිබුනි.