පොලිසිය ඉල්ලන සිසුන්ගේ නම් ලබාදීම දෙමළ ගුරුපියා ප්‍රතික්ෂේප කරයි

පරිස්සමින් පරිහරණය කරන බවට ආණ්ඩුව විසින් සහතික කරන ලද ත්‍රස්තවාදය වැළක්වීමේ පනත (PTA) යොදාගෙන යුද පීඩිත කිලිනොච්චියේ පාසල් ගුරුතුමකුගෙන් ත්‍රස්ත මර්දන සහ විමර්ශන කොට්ඨාසය යළිත් වරක් දීර්ඝ ලෙස ප්‍රශ්න කර තිබේ.

කිලිනොච්චිය, කෝනාවිල් දෙමළ මහා විද්‍යාලයේ ඉන්නාසිමුත්තු සත්‍යසීලන් ගුරු පියාගෙන් ත්‍රස්ත මර්දන සහ විමර්ශන කොට්ඨාසයේ පරන්තන් ඒකකය 2025 මාර්තු මස 3 වැනිදා පැය 8 ට ආසන්න කාලයක් ප්‍රශ්න කර ඇත්තේ පසුගිය වසරේ කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ද්වාරය ලෙස ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණයක් සම්බන්ධයෙනි.

ඉන්නාසිමුත්තු සත්‍යසීලන් ගුරු පියාට 2025 පෙබරවාරි 17 වැනිදා උදෑසන 9.30 ට කොළඹ 01 පිහිටි ත්‍රස්ත මර්දන සහ විමර්ශන කොට්ඨාසයට පැමිණෙන ලෙස දැනුම් දී තිබුනේ ඔහුගෙන් 2024 දෙසම්බර් මස 11 වැනිදා ලබා ගත් කට උත්තරයක් සම්බන්ධයෙන් වැඩි දුරටත් විමසීම සදහාය.

ප්‍රකාශ සටහන් කර ගැනීම සදහා තමන් කොළඹට කැදවීමෙන් සිදු වන හිරිහැරය සම්බන්ධයෙන් ඉන්නාසිමුත්තු සත්‍යසීලන් ගුරු පියා ශ්‍රී ලංකා මානව හිමිකම් කොමිෂන් සභාවේ යාපනය සම්බන්ධීකාරක ටී. කනගරාජ්ට දැනුම් දී තිබු අතර ඔහුගේ මැදිහත්වීම මත ත්‍රස්ත මර්දන සහ විමර්ශන කොට්ඨාසයේ නිලධාරීන් ගුරුතුමාට පරන්තන් ඒකකය හමුවේ ප්‍රකාශ ලබා දිමේ අවස්ථාව සලසා දී තිබුනි.

ඒ අනුව මාර්තු මස 3 වැනිදා උදෑසන 10.30 සිට පස්වරු 18.30 දක්වා ත්‍රස්ත මර්දන සහ විමර්ශන කොට්ඨාසයේ පරන්තන් ඒකකයේ නිලධාරින් තමාගෙන් ප්‍රකාශ සටහන් කරගත් බව ඉන්නාසිමුත්තු සත්‍යසීලන් ගුරුතුමා සදහන් කරයි.

2024 මාර්තු 14 වැනිදා කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ද්වාරය ලෙස ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණයක් භාවිතයට ගෙන තිබුනි.

ත්‍රස්ත පොලීසිය සත්‍යසීලන් ගුරුතුමාගෙන් 2025 මාර්තු 3 වැනිදා යළිත් වරක් ප්‍රශ්න කර ඇත්තේ නිවාසාන්තර මලල ක්‍රීඩා උත්සවයේදී නිවාසයක ඊලාම් සිතියමක ආකෘතිය සහ සහ කනගපුරම් සුසාන භුමියේ ද්වාරයේ ආකෘතිය සකස් කිරීමට උදව් කළ සිසුන්ගේ නම් හෙළි කරන ලෙසයි. ඔහු පෙර පරිදිම එම ඉල්ලිම ප්‍රතික්ෂේප කර තිබේ.

සිය බාහිර ක්‍රියාකාරකම් මෙන්ම දේශපාලන ක්‍රියාකාරීත්වය සම්බන්ධයෙන්ද ත්‍රස්ත පොලීසිය එහිදී තමාගෙන් ප්‍රශ්න කළ බව ගුරුවරයා පළාත් බද මාධ්‍යවේදීන් සමග කියා තිබේ.

“ඔබ මගෙන් බලාපොරොත්තු වන්නේ මොකක්ද? ඔබලා අවුරුද්දක් තිස්සේ මා ගැන විමර්ශනය කරනවා. ඇයි අපිට කරදර කරන්නේ? දෙමළ නිසාද? ” යනාදී වශයෙන් ගුරුතුමා ත්‍රස්ත මර්දන සහ විමර්ශන කොට්ඨාසයේ නිලධාරීන්ගෙන් විමසද්දී ඔවුන් පවසා ඇත්තේ ඉහළ නිලධාරීන්ගෙන් ලැබුන නියෝග අනුව මෙම විමර්ශනය සිදු කරන බවයි.

ගුරුවරයා වැඩි දුරටත් පොලිස් නිලධාරීන්ගෙන් විමසා ඇත්තේ “මුලතිව්, කිලිනොච්චිය පෙන්වීම අපරාධයක්, ත්‍රස්තවාදයක් කියලා ඔබේ නීති පොතේ තියෙනවද?” යනුවෙනි.

ත්‍රස්ත මර්දන සහ විමර්ශන කොට්ඨාසයේ නිලධාරීන්ගෙන් එහිදි සදහන් කර ඇත්තේ මෙය එල්.ටී.ටී.ඊ.ය විසින් සලකුණු කළ භූමියක් බවයි.

“එයාලා ඒක කරලා ඇති. නමුත් මේ අපේ භුමිය. අපි ජීවත් වන ප්‍රදේශය සිසුන් විසින් නිර්මාණය කිරීමක් කළ බවත් ඒක වරදක් නොවන බවත් මම පෙන්වා දුන්නා,” යනුවෙන් ඉන්නාසිමුත්තු සත්‍යසීලන් පළාත් බද මාධ්‍යවේදීන් සමග පවසා තිබේ.

2024 මාර්තු 14 වැනිදා කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ආකෘති සම්බන්ධයෙන් ප්‍රශ්න කිරීම සදහා ත්‍රස්ත පොලිසිය විසින් විදුහල්පතිවරයා, ගුරුවරුන් මෙන්ම සිසුන් ද පසුගිය සමයේ අවස්ථා කිහිපයකදී පොලීසියට කැඳවා දිගින් දිගටම ප්‍රශ්න කර තිබුනි.

ඉන්නාසිමුත්තු සත්‍යසීලන් ගුරු පියා අවධාරණය කරන්නේ 2024 දෙසැම්බර් 11 වැනිදා කොළඹ පිහිටි ත්‍රස්ත මර්දන හා විමර්ශන කොට්ඨාස (CTID)යේ මුලස්ථානය වෙත තමන් කැදවු නිලධාරීන් එදින පැය 10 ට ආසන්න කාලයක් තමාගෙන් ප්‍රශ්න කළ බවයි.

ත්‍රස්ත මර්දන හා විමර්ශන කොට්ඨාසය එදින දිගින් දිගටම ගුරුතුමාගෙන් ප්‍රශ්න කර තිබුනේ ඔහු එල්.ටී.ටී.ඊ සංවිධානය යළි ගොඩ නැගීම වෙනුවෙන් කටයුතු කරනවාද යන්න සහ නිවාසාන්තර මලල ක්‍රීඩා උත්සවයේ ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණය අයත් නිවාසයේ දරුවන්ගේ සහ ඔවුන්ගේ නම් සහ විස්තර ලබා දෙන ලෙසයි.

එම නිවාසයට අයත් පාසල් සිසුන්ගේ සහ ඔවුන්ගේ දෙමාපියන්ගේ නම් ත්‍රස්ත මර්දන හා විමර්ශන කොට්ඨාසය (CTID)ය වෙත ලබා දීම ඔහු එදින දැඩි ලෙස ප්‍රතික්ෂේප කර තිබුනි.

පාර්ලිමේන්තුවේ සභානායක, බිමල් රත්නායක 2025 ජනවාරි 21 දා පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.

“ඒ වගේම ත්‍රස්ත විරෝධි පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං.” ඔහු පවසා තිබුනි.

පළාත් බද වාර්තාකරුවන් පවසන්නේ නව රජය බලයට පත් වීමෙන් පසුත් උතුරු නැගෙනහිර දෙමළ ක්‍රියාධරයන් ත්‍රස්ත මර්දන සහ විමර්ශන කොට්ඨාසයට කැදවීම් රැසක්ම වාර්තා වු බවයි.