ගෝඨාභය රාජපක්ෂ රටේ පාලකයා බවට පත්වුවහොත් නිර්මාණය කරන්නේ යැයි පවසන විනය ගැන දේශපාලන විද්‍යාව පිළිබඳ මහාචාර්යවරයකු අනතුරු අඟවා තිබේ.
විශ්ව විද්‍යාල වෘත්තිකයන්ගේ සංසදය විසින් සජිත් ප්‍රේමදාසගේ ප්‍රධානත්වයෙන් පැවති විද්වත් සමුළුවක් මහාචාර්ය ටෙරන්ස් පුරසිංහ පෙන්වා දුන්නේ පොහොට්ටු අපේක්ෂකයා ගොඩනැංවීමට යන්නේ “අපුරු විනයානුකූල රටක්” බවයි.
“හිරුණිකා ප්‍රේමචන්ද්‍ර මන්ත්‍රීතුමිය පොහොට්ටුවේ ආධාරකරුවන් ඉන්න තැනකට ඇවිල්ලා එතනින් ගමන් කරද්දි එතුමිය කාන්තාවක් කියන සැලකිල්ලක් නැතුව, අම්ම කෙනෙක් කියන සැලකිල්ල නැතුව, කරපු අඩන්තේට්ටම්, හූ කීමට කුනුහරපෙන් බැනීම පහර නොදීම විතරයි නොකෙරුවේ. නොවැ. 17 වෙනිදා ජනාධිපති වුනොත් ගෝඨාභය රාජපක්ෂ අපුරු විනයානුකූල රටක් හදයි.”
ගෝඨාභය රාජපක්ෂගේ පුරවැසි භාවය අධිකරණය හමුවේ ප්‍රශ්න කරන ලද සිවිල් සමාජ ක්‍රියාධරයන් ජිවිත ආරක්ෂා කර ගැනිමේ අභියෝගයට මුහුණ දී ඇති බව ද මහාචාර්යවරයා කියා සිටියේය.
“තේනුවර මැතිතුමාට මේ මොහොතෙත් මරණ තර්ජන. මොකද මේ ද්විත්ව පුරවැසි භාවය පිළිබඳ නඩුවක් දැමීම නිසා. ඒක පුරවැසි අයිතියක්. එතුමා දැන් මේ ඉන්නෙ 16 වෙනිදා මේ ආණ්ඩුව පෙරලුනොත් එතුමාගේ ජිවිතය ආරක්ෂා කරගන්නෙ කොහොමද කියන කුතුහලෙන්.”
සජිත්ගේ වේදිකාවේ ආණ්ඩුවට දොස්
ගෝඨාභය රාජපක්ෂ ජනාධිපති ධුරයට තරග වැදීම සඳහා ඉදිරිපත් වී සිටීමට මග පෑදු බවට වර්තමාන ආණ්ඩුවට දොස් නැගු මහාචාර්ය ටෙරන්ස් පුරසිංහ “හිරගෙවල් වල සිටිය යුතු අය ජනාධිපති අපේක්ෂකයන් කළේ මේ ආණ්ඩුවයි,” යනුවෙන් පැවසීය.
මහා පරිමාන අපරාධ සම්බන්ධයෙන් චෝදනා ලබන වරදකරුවන්ට එරෙහිව නීති මගින් ක්‍රියා නොකළ පසුගිය පස් වසරක මන්දගාමී ක්‍රියා කලාපය එවැන්නන් පෙරට ඒමට හේතුවූ බව මහාචාර්යවරයා අවධාරණය කරයි.
ආණ්ඩු පක්ෂයේ වේදිකාවක වුව බියෙන් තොරව රජය පවා විවේචනය කිරීමට අද තිබෙන අයිතිය එවැනි යුගයක් බිහිවීමෙන් අහිමිවී යනු ඇති බවට ඔහු අනතුරු ඇඟවීය.
ජාතික ආරක්ෂාව සහතික කිරීම සම්බන්ධයෙන් සෑම දේශපාලන පක්ෂයක්ම “කයිවාරු ගහන” බව ප්‍රකාශකළ මහාචාර්ය පුරසිංහ ජාතික සමගියෙන් තොර ජාතික ආරක්ෂාවක් නැතැයි වැඩි දුරටත් අවධාරණය කළේය.
Facebook Comments
