මානව අයිතීන් සුරක්ෂිත කිරීම පිණිස ගෙන එන ලද ජාත්‍යන්තර නීතියක් උපයෝගී කර ගනිමින් රජය මාධ්‍ය දඩයමක නිරතව සිටින බවට රජය දැඩි චෝදනාවට ලක්ව සිටී.
වර්ගවාදීන් හා අනත්වාදීන් පෝෂණය කරන ආණ්ඩුව විසින් ලේඛකයන් මර්ධනය කරමින් සිටින බවට ගුරු සංගම් නායකයකු චෝදනා කරයි.
“අද පොලිස් මාධ්‍ය ප්‍රකාශකලා මහ ලොකුවට උඩ දාගෙන මේ ICCPR පනත ගැන කතා කරන්නේ. ඒ පනත ගෙනාවේ මේ රටේ අදහස් ප්‍රකාශ කිරීමේ අයිතිය ආරක්ෂා කරන්නත්, මේ රටේ මානව හිමිකම් තහවුරු කරන්නත්, ඔය පොලිස් මාධ්‍ය ප්‍රකාශකලා කියනවා වගේ ICCPR එක ගෙනාවේ මිනිස්සු හිර කරන්න නෙමෙයි,” ලංකා ගුරු සංගමයේ ලේකම් ජෝසප් ස්ටාලින් පැවසීය.
සමාජ මාධ්‍ය ඔස්සේ පළ කරන ලද කෙටිකතාවක් හේතුවෙන් සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පිළිබද පනත (ICCPR) යොදා ගනිමින් දෙමාසයකටත් වැඩි කාලයක් තිස්සේ සිර ගත කර ඇති සම්මානලාභී ලේඛකයකු වන ශක්තික සත්කුමාර නිදහස් කරන ලෙස බල කරමින් 17 සඳුදා කොළඹ දී විරෝධතාවක් පැවතුණි.
සත්කුමාර විසින් ෆේස්බුක් සමාජ මාධ්‍ය ජාලයේ පළකරන ලද ‘අර්ධ’ නමැති කෙටි ප්‍රබන්ධය මගින් ආගමික ද්වේශයට අනුබල සපයා ඇති බවට ප්‍රදේශයේ ශාසනාරක්ෂක බල මණ්ඩලය හා බුදු දහම රැකගැනීමේ යොවුන් පෙරමුණ නමින් තමන් හඳුන්වාගත් අන්තවාදී සංවිධානයක් විසින් කරන ලද පැමිණිල්ලක් මත ලේඛකයාට එරෙහිව නීති මගින් ක්‍රියා කිරීමට පොල්ගහවෙල පොලිසිය ක්‍රියාකර තිබේ.
තම සැමියා සිර ගත කිරීම තුළ තමන් හා දරු දෙදෙනා දැඩි මානසික පීඩාවකට ලක්ව ඇති බව කිවිඳියක වන ශක්තිකගේ බිරිඳ යනුෂා ලක්මාලි කියා සිටියාය.
“ලේඛිකාවක් විදියට ගත්තාම මහත්තයට වෙච්ච දේ හෙට මට වෙන්න පුලුවන්. මේ අනිත් ලේඛක ලේඛිකාවන්ට වෙන්න පුලුවන්. ඒ නිසා මම ඉල්ලා සිටින්නේ මහත්තයාව හිර කරගෙන ඉන්නෙ නැතුව ඇප දෙන්න කියලා. දැන් දවස් 77 ගෙවිලා ඉවරයි ඒ මනුස්සා කායිකවත් මානසිකවත් ලොකු දුකක් විඳිනවා.” යැයි ඇය පැවසීය.
“ශක්තික සත්කුමාර සහෝදරයා සුදු වෑන් වලින් මිනිස්සුන්ව උස්සලා මෝරුන්ට කන්න දාලා හෙලිකෝප්ටර් වලින් ගිහිල්ලා මුහුදට දාලා නැහැ. ශක්තික සත්කුමාර සහෝදරයා බැඳුම්කර වංචාවට සම්බන්ධ නැහැ. ශක්තික සත්කුමාර සහෝදරයා අධිවේගී මාර්ග වලින්, ටෙන්ඩර් වලින් ගසා කාලා නැහැ. ශක්තික සත්කුමාර සහෝදරයා කරල තියෙන එකම වරද තමයි මේ කියන විදියට කෙටි කතාවක් ලියන එක,” යැයි විරෝධතාවයට එක්වු සාහිත්‍යවේදී විමල් කැටපෙආරච්චි කියා සිටියේය.
ආගමික බලාධිකාරිය විසින් මිනිසුන්ගේ ලෞකික හා කලා සංස්කෘතික ජිවිතයට බලපෑම් කිරීමට විරෝධය පෑමට මෙසේ උද්ඝෝෂණය සංවිධානය කළ බව ද විමල් කැටපෙආරච්චි සඳහන් කළේය.
“ප්‍රකාශනයේ නිදහස කියලා කියන්නේ මුලික අයිතිවාසිකමක් ඕනෑම මනුස්සයෙක්ගෙ. මේ මුලිකම අයිතිවාසිකම උල්ලංඝනය වෙනවා කියල කියන්නේ මම හිත්න්නේ ඒකට සියලු ශ්‍රී ලාංකිකයින් එළියට බැසිය යුතුයි, සියලු ශ්‍රී ලාංකිකයින් ඊට එරෙහි විය යුතුයි.” කලාකාරිනියක හා මාධ්‍යවේදිනියක වන නදී වාසලමුදලිආරච්චි අවධාරණය කළාය.
සාහිත්‍යවේදී ශක්තික සත්කුමාර සිර ගත කිරීමට එරෙහිව ශ්‍රේෂ්ඨාධිකරණයේ මුලික මිනිස් අයීතින් උල්ලංඝනය කිරීමේ යටතේ නඩුවක් පවරා ඇති අතර ඔහුට ඇප ලබා ගැනීම වෙනුවෙන් කුරුණෑගල මහාධිකරයේදී නඩු පවරා තිබේ.
2010 සහ 2014 වසරවල දී ජාතික යෞවන සම්මාන උළෙලේදී හොඳම කෙටිකතාකරුවා වශයෙන් සම්මාන ලද ශක්තික සත්කුමාර, වයඹ පළාත් සභාව මගින් සංවිධානය කළ පළාත් රාජ්‍ය සාහිත්‍ය උත්සවයන්හිදී දෙවරක් සම්මානයට පාත්‍ර වී ඇත.
Facebook Comments
