රගර් ක්‍රීඩක වසීම් තාජුදීන්, ප්‍රගීත් එක්නැලිගොඩ සහ කීත් නොයාර් මාධ්‍යවේදීන් ඇතුළු හමුදා නිලධාරීන්ද සම්බන්ධ විමර්ශන අපරාධ පරීක්ෂණ දෙපාර්තමේන්තුව විසින් “රණවිරු දඩයම්” චෝදනා වලට මුහුණ දෙමින් හොඳින්, අපහසුවෙන් පවත්වාගෙන යන බව පොලිස් මාධ්‍ය ප්‍රකාශකවරයා කියා සිටී.
‘රණවිරු දඩයමක’ යෙදෙන බවට මහින්ද රාජපක්ෂ ප්‍රමුඛ සිංහල ජාතිකවාදී බලවේග නගන චෝදනා පසෙක ලන පොලිසිය රණවිරුවකු බව සඳහන් කරමින් කිසිවකුටත් අපරාධ පරීක්ෂණ වලින් ගැලවී යා නොහැකි බව පොලිස් මාධ්‍ය ප්‍රකාශක කොළඹ පොලිස් මූලස්ථානයේදී මාධ්‍යවේදීන් හමුවේ කියා සිටියේය.
අපරාධ සම්බන්ධව සැකපිට හමුදා නිලධාරීන් අත් අඩංගුවට ගැනීම සහ පරීක්ෂණ පැවත්වීම “රණවිරු දඩයමක්” ලෙස හැඳින්වීමට ඕනෑම අයකුට අයිතියක් ඇති බව කී පොලිස් මාධ්‍ය ප්‍රකාශක ප්‍රිශාන්ත ජයකොඩි ප්‍රකාශ කළේ ඒ පිලිබඳ සත්‍යය දන්නේ පොලිසියම පමණක් බවයි.
හමුදා නිලධාරියකු වූ පමණින් යමකු අත් අඩංගුවට ගතයුතු නැතැයි කිසිවකු විශ්වාස කරන්නේ නම් ඒ තැනැත්තාගේ මානසික තත්වය පරීක්ෂා කළ යුතු බවට පොලිස් මාධය ප්‍රකාශක මෙහිදී අවධාරණය කර සිටි අතර හමුදා නිලධාරීන් පමණක් නොව ජ්‍යෙෂ්ඨ පොලිස් නිලධාරීන්ද පරීක්ෂණ වලට මුහුණ පාමින් සිර දඬුවම් විඳිමින් සිටින බවද සිහිපත් කළේය.
Facebook Comments
