රටේ ඇතිවී තිබෙන උද්ඝෝෂණ රැල්ල පාලනය කිරීමට සහ රට තුළ විනය සකස් කිරීම සඳහා විශේෂ තනතුරක් භාර ගන්නා ලෙස ජනාධිපතිවරයා විසින් ෆීල්ඩ් මාර්ෂල් සරත් ෆොන්සේකාගෙන් ඉල්ලා ඇත්තේ විදෙස් අයෝජකයන් ගෙන්වා ගැනීමට සුදුසු පරිසරය රට තුළ ඇති කිරිමේ අරමුණින් බව ජනාධිපති ලේකම් කාර්යාල ආරංචි මාර්ග පවසයි.
රටේ මානව හිමිකම් තත්ත්වය සහ ප්‍රජාතන්ත්‍රවාදය ශක්තිමත් වෙමින් පවතින මොහොතක අයෝජකයන් ශ්‍රී ලංකාව කෙරෙහි වැඩි උන්න්දුවක් දක්වන බවත් GSP+ බදු සහනය ලැබීමත් සමඟ විදෙස් අයෝජනයන් විශාල ප්‍රමාණයක් රටට ලැබෙනු ඇති බවට රජය විශ්වාසය පළ කරයි.
එවැනි තත්ත්වයක් තුළ රටේ මතු වෙමින් පවතින විරෝධතා රැල්ල හේතුවෙන් එම අයෝජන රටට නොලැබීමේ අවදානමක් පවතින බැවින් මෙවැනි ක්‍රීයාමාර්ගයක් ගැනීමට ජනාධිපතිවරයා සහ අගමැතිවරයා විසින් තීරණය කර ඇති බවටයි සිලෝන් ජර්නල්ස් වෙත වාර්තා වන්නේ.
විශේෂයෙන්ම පුද්ගලික වෛද්‍ය විද්‍යාල කෙරෙහි පවතින විරෝධය හේතුවෙන් මෙරට පුද්ගලික අධ්‍යාපනය සඳහා පැමිණිමට බලාපොරොත්තුවෙන් සිටින අයෝජන කිහිපයක්ම රටට නොලැබීමේ අවදානමක්ද පවතින බවයි එම ආරංච් මාර්ග පෙන්වා දෙන්නේ.
මාධ්‍යයෙන් ඉල්ලීමක්
මේ අතර පසුගියදා පැවති මාධ්‍ය හමුවකදී රටේ පවතින උද්ඝෝෂණ තාවකාලිකව නතර කර ගැනීම සඳහා මාධ්‍ය මඟින් එම උද්ඝෝෂණ වාර්තා කිරීම මසක කාලයකට නවතා දමන ලෙසට නිදහස් සන්ධාන මහලේකම් අමාත්‍ය මහින්ද අමරවීර සියලු මාධ්‍යයන්ගෙන් ඉල්ලීමක් කරනු ලැබුවා.
අද පවතින උද්ඝෝෂණ වලට සමාජයේ විරෝධයක් පවතින බව කී ඇමතිවරයා ඇතැම් උද්ඝෝෂණ පවත්වන්නේ සාධාරණ හේතු මත නොවන බවටයි ප්‍රකාශ කර සිටියේ.
මාධ්‍ය මඟින් උද්ඝෝෂණ වාර්තා කිරිම තාවකාලිකව නවතා දැමුවහොත් බොහෝ උද්ඝෝෂණ නතර වන බවත් මහජනතාවට සිදු වන හරිහැර එමඟින් නැවතී යනු ඇති බවටයි අමාත්‍ය මහින්ද අමරවීර එහිදී විශ්වාසය පළ කර සිටියේ.
Facebook Comments
